Kiko Lo Pasa ku Religion?

E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Tur religion ta bon?

No kabe duda ku den tur religion tin hende sinsero ku ke agradá Dios. E ta tuma nota di nan i ta interesá den nan. Pero lamentablemente, tin hende a hasi malu den nòmber di religion. Den pasado, lidernan religioso asta a torturá nan oponentenan. (2 Korintionan 4:3, 4; 11:13-15) Segun informenan di notisia, awe tin algun lider religioso ku ta instigá terorismo òf apoyá guera, òf nan ta enbolbí den maltrato i abusu seksual di mucha.—Lesa Mateo 24:3-5, 11, 12.

Ta dos tipo di religion so tin: religion berdadero i religion falsu. Esaki ta kuadra ku loke Beibel ta bisa. Religion falsu ta siña kosnan tokante Dios ku no ta bèrdat. Sinembargo, Yehova Dios ke pa hende sa e bèrdat tokante dje.—Lesa 1 Timoteo 2:3-5.

2. Kiko lo pasa ku religion?

Dios no ke pa hende ser gañá pa religion ku ta pretendé di ta stim’é, ma ku no ta siña hende ken e ta di bèrdat. De echo, e hendenan di e religionnan ei ta gusta amistat ku e mundu akí kontrolá pa Satanas e Diabel. (Santiago 4:4; 1 Huan 5:19) Segun e Palabra di Dios, religionnan ku ta preferá di ta leal na gobièrnu humano en bes di na Dios ta manera un prostituta. Beibel ta yama e prostituta akí “Babilonia e Grandi.” E nòmber ei ta derivá for di e stat di antigwedat kaminda religion falsu a kuminsá despues di e Diluvio di tempu di Noe. Pronto, Dios lo trese un fin repentino na tur religion ku ta gaña i oprimí hende.—Lesa Revelashon 17:1, 2, 5, 17; 18:8, 23, 24.

3. Kon Dios lo bendishoná hende di tur nashon?

E huisio ku lo bini riba religion falsu ta bon notisia. Rònt mundu, hende lo haña alivio di opreshon. Nunka mas religion falsu lo gaña humanidat i kousa divishon. E tempu ei, tur hende lo ta uní den adorashon di e úniko Dios berdadero.—Lesa Isaías 11:9; Revelashon 18:20, 21; 21:3, 4.

4. Kiko hende sinsero mester hasi?

Yehova no a lubidá e hendenan sinsero ku awe ta plamá den e religionnan falsu ku tin rònt mundu. Aktualmente, e ta rekohiendo e hendenan ei i ta trese nan huntu den union pa medio di un programa ku ta siña nan e bèrdat.—Lesa Mikéas 4:2, 5.

Ku brasa habrí Yehova ta risibí hende ku ke sirbié i ta laga nan bira parti di su famia. Kisas nos amigu- i famianan no ta keda kontentu ora nos kuminsá sirbi Yehova, pero nos ta risibí hopi benefisio si nos perseverá. Nos ta sera amistat ku Dios, nos ta haña un “famia” nobo ku ta masha kariñoso i nos lo tin e speransa di haña bida eterno.—Lesa Marko 10:29, 30; 2 Korintionan 6:17, 18.

Pa mas informashon, wak kapítulo 15 i 16 di e buki akí, Kiko Beibel Ta Siña Realmente?, publiká pa Testigunan di Yehova.

[Rekonosementu pa potret na página 26]

The Complete Encyclopedia of Illustration/J. G. Heck