Pregunta 1: Mi Bida Tin Propósito?

ROSALIND, kende a lanta na Inglatera, tabatin un set insasiabel pa konosementu, i e tabata ke yuda hende. Despues ku el a kaba skol, el a haña un bon trabou ku a enserá yuda hende ku no tabatin dak riba nan kabes. Ademas, e tabata yuda hende ku tabata físikamente desabilitá i esnan ku tabatin problema ku siñamentu. Apesar ku su trabou tabata dun’é satisfakshon i un bida kómodo materialmente, el a bisa: “Pa hopi aña mi tabata puntra mi mes, ‘Dikon nos ta riba tera?’ òf ‘Kiko ta e propósito di bida?’”

Dikon ta normal ku hende ta hasi e pregunta ei?

Pasobra hende no ta manera bestia ku no por rasoná. Nos por siña for di pasado, plania pa futuro i buska pa sa kiko ta e propósito di bida.

Kon algun hende ta kontestá e pregunta ei?

Hopi hende ta pensa ku e propósito prinsipal di bida ta pa bira riku òf famoso pasobra esei lo trese felisidat.

Kiko e kontesta ei ta enserá?

Ku ta nos mes ta pone nos prioridatnan den bida. I ku nos deseonan ta mas importante ku e boluntat di Dios.

Kiko Beibel ta siña?

Rei Sálomon, kende a akumulá hopi rikesa i a sigui tras di plaser, a yega n’e konklushon ku e kosnan ei no ta duna bida berdadero propósito. El a indiká kiko ta duna bida berdadero propósito ora el a skirbi: ‘E konklushon di tur loke ku a wòrdu tendí ta: Teme Dios i warda su mandamentunan, pasobra esaki ta aplikabel na kada persona.’ (Eklesiástes 12:13) Kiko ta enserá warda Dios su mandamentunan?

Dios su propósito ta, entre otro, pa nos disfrutá di bida. Sálomon a skirbi: “No tin nada mihó pa un hende ku kome i bebe i bisa su mes ku su trabou ta bon. Mi a ripará ku esaki tambe ta bini for di man di Dios.”—Eklesiástes 2:24.

Dios ke tambe pa nos stima i perkurá pa nos famia. Wak e siguiente konsehonan simpel i práktiko ku e ta duna kada miembro di famia.

“Esposonan mester stima nan esposa manera nan mes kurpa.”—Efesionan 5:28.
“E esposa mester tin rèspèt profundo pa su esposo.”—Efesionan 5:33.
“Yunan, obedesé boso mayornan.”—Efesionan 6:1.

Si nos ta apliká e prinsipionan bíbliko akí, nos lo disfrutá di un sierto grado di felisidat i satisfakshon. Sinembargo, e kos di mas importante ku nos mester hasi ta siña tur loke nos por tokante nos Kreador i sera un amistat estrecho kuné. De echo, Beibel ta invitá nos pa “hala serka Dios.” I despues, e ta agregá e promesa remarkabel akí: “Lo e hala serka boso.” (Santiago 4:8) Si bo aseptá e invitashon akí, bo bida lo haña berdadero propósito.

Awor sí, Rosalind, kende nos a menshoná anteriormente, ta sinti ku su bida tin berdadero propósito. Kon bini? Pa bo haña sa esei, lesa su eksperensia ku ta kuminsá na página 10 di La Atalaya di 1 di novèmber 2012.

Si bo ke sa mas tokante kon pa biba na un manera ku ta agradá Dios, wak kapítulo 12 di e buki Kiko Beibel Ta Siña Realmente? Bo por download e for di e website www.jw.org

Kiko Hesus A Bisa Tokante e Propósito di Bida?

Hesus tabata sa bon kla kiko ta e propósito di su bida. El a bisa: “Pa esaki mi a nase i pa esaki mi a bini na mundu: pa mi duna testimonio di e bèrdat.” (Huan 18:37) P’esei, Hesus a usa su bida pa siña hende tokante Dios i Su propósitonan.

Si nos sigui e ehèmpel di Hesus, nos bida tambe por tin berdadero propósito. De echo, Hesus mes a animá nos pa siña for di dje. (Mateo 11:29) Laga nos wak dos kos ku Hesus a siña su siguidónan:

Hesus a bisa ku pa nos ta felis, nos mester ta “konsiente di [nos] nesesidat spiritual.” (Mateo 5:3) Nos por satisfasé nos nesesidat spiritual si nos siña konosé “e úniko Dios berdadero, i esun ku [el] a manda, Hesukristu.”—Huan 17:3.

Hesus a duna su siguidónan e mandamentu pa siña otro hende loke el a siña nan. El a bisa nan: “P’esei bai, i hasi hende di tur nashon mi disipel, i batisá nan den nòmber di e Tata i di e Yu i di spiritu santu, i siña nan kumpli ku tur loke mi a manda boso.”—Mateo 28:19, 20.

Hende ku ta studia Beibel pa satisfasé nan nesesidat spiritual i ku ta apliká loke nan ta siña ta ripará ku nan kalidat di bida ta mehorá. Anto ora nan kuminsá yuda hende konosé Dios, nan ta bira mas konvensí ku nan bida tin berdadero propósito.