Moises—Un Hòmber Ku A Mustra Amor

KIKO TA AMOR?

Amor ta enserá un kariño profundo pa otro hende. Un persona amoroso ta demostrá ku echo i palabra kiko e ta sinti pa esnan ku e ta stima, maske esei ta enbolbé sakrifisio di su parti.

KON MOISES A DEMOSTRÁ AMOR?

Moises tabatin un gran amor pa Dios. Kon el a mustra esei? Wèl, kòrda e palabranan di 1 Huan 5:3: “Amor pa Dios ta nifiká ku nos ta kumpli ku su mandamentunan.” Moises a biba na armonia ku e prinsipio ei. Por ehèmpel, tur loke Dios a pidié hasi—for di loke a parse e tarea di mas simpel, esta, di ekstendé su bara riba Laman Kòrá, te na esun di mas difísil, esta, di enfrentá e Fárao poderoso—Moises a obedesé. Sea e mandamentu tabata fásil òf difísil pa kumpli kuné, Moises a obedesé. “Asina el a hasi.”—Éksodo 40:16.

Moises a demostrá amor pa e otro israelitanan. Nan tabata sa ku Yehova tabata guia su pueblo pa medio di Moises; p’esei, nan a akudí na dje ku nan problemanan. Beibel ta bisa: “E pueblo tabata pará rònt di Moises for di mainta te atardi.” (Éksodo 18:13-16) Imaginá kon kansá Moises lo tabata keda despues di skucha e israelitanan deshogá nan mes serka dje pa oranan largu! Sinembargo, Moises tabata kontentu ku e por a yuda nan.

Ademas di skucha nan, Moises a hasi orashon tambe pa e hendenan ku el a stima. El a asta hasi orashon pa esnan ku a hasi malu kuné! Por ehèmpel, ora Miriam, ruman muhé di Moises, a murmurá kontra Moises, Yehova a dal Miriam ku lepra. En bes di alegrá ku Dios a kastigá Miriam, Moises mesora a hasi orashon p’e, bisando: “O Dios, kur’é, mi ta pidi bo!” (Numbernan 12:13) Ta amor so por a motivá Moises pa hasi e supliká sinsero ei!

KI LÈS NOS POR SIÑA?

Nos por imitá Moises ora nos ta desaroyá un amor profundo pa Dios. E amor ei ta motivá nos pa obedesé su mandamentunan “di kurason.” (Romanonan 6:17) Ora nos ta obedesé Yehova di kurason, nos ta hasi su kurason kontentu. (Proverbionan 27:11) Esei ta bon pa nos mes tambe. Al fin i al kabo, ora nos ta sirbi Dios pa motibu ku nos di bèrdat ta stim’é, no solamente nos lo hasi loke ta korekto, sino ku nos lo tin goso tambe den loke nos ta hasi!—Salmo 100:2.

Tambe nos por imitá Moises ora nos ta desaroyá amor di sakrifisio propio pa otro hende. Ora nos amigunan òf famianan bini serka nos ku nan problemanan, amor lo motivá nos pa (1) duna nan nos atenshon di kurason, (2) pone nos mes na nan lugá, òf sinti loke nan ta sinti i (3) laga nan sa ku nos ta interesá den nan.

Meskos ku Moises, nos por hasi orashon pa nos sernan kerí. Tin biaha nos por sinti nos malu ku nos no por yuda nan ora nan konta nos nan problema. Nos por asta lamentá: “Ta duel mi ku tur loke mi por hasi pa bo ta orashon.” Pero kòrda: “Supliká di un hende hustu tin hopi poder i ta masha efektivo.” (Santiago 5:16) De echo, nos orashonnan lo por impulsá Yehova pa hasi algu pa e persona ku otro ora lo E no a hasi. Realmente, tin algu mas mihó ku nos por hasi pa nos sernan kerí ku no ta di resa na Dios pa nan?a

Bo no ta haña ku nos por siña hopi for di Moises? Maske e tabata un hòmber masha gewon, el a pone un ekselente ehèmpel di fe, humildat i amor. Mas nos imitá su ehèmpel, mas esei lo benefisiá nos mes i tambe otro hende.—Romanonan 15:4.