PREGUNTA KU BEIBEL TA KONTESTÁ

Dikon Hesus ta ser yamá Yu di Dios?

Dios no tin un kasá literal ku kende e tin yu. E ta e Kreador di bida. El a krea hende ku e kapasidat pa imitá su kualidatnan. P’esei, Beibel ta yama e promé hende ku Dios a krea, esta, Adam, “yu di Dios.” E ta yama Hesus tambe “Yu di Dios” pasobra Hesus a ser kreá ku e mesun kualidatnan ku e Tata tin.—Lesa Lukas 3:38; Huan 1:14, 49.

Na ki tempu Dios a krea Hesus?

Dios a krea Hesus promé ku el a krea Adam. De echo, Dios a krea Hesus i despues, pa medio di Hesus, el a krea tur sobrá kos, inkluso e angelnan. P’esei Beibel ta yama Hesus “e promé di tur kreashon” di Dios.—Lesa Kolosensenan 1:15, 16.

Promé ku Hesus a nase na Bètlehèm, el a biba komo un kriatura spiritual den shelu. Ora e tempu a yega, Dios a transferí e bida di Hesus for di shelu den matris di Maria pa e por a nase komo hende.—Lesa Lukas 1:30-32; Huan 6:38; 8:23.

Dikon Dios a laga Hesus nase komo hende riba tera? Ki papel spesial Hesus a kumpli kuné? Bo por haña kontesta riba e preguntanan akí den Beibel, i nan lo duna bo mas komprondementu i apresio pa loke Dios i Hesus a hasi pa bo.