PREGUNTA KU BEIBEL TA KONTESTÁ

Nos pikánan por ser pordoná?

Beibel ta trese dilanti ku tur hende ta pekadó. Nos a heredá e tendensia di peka for di nos promé tata, Adam. P’esei, tin biaha nos ta hasi malu i despues nos ta lamentá loke nos a hasi. E Yu di Dios, Hesukristu, a muri pa nos i asina a paga pa nos pikánan. Pa medio di su morto nos por haña pordon pa nos pikánan. E sakrifisio di reskate ei ta un regalo di Dios.—Lesa Romanonan 3:23, 24.

Tin hende a kometé piká serio, i nan ta puntra nan mes si un dia Dios lo pordoná nan. Ta bon pa sa ku e Palabra di Dios ta bisa: “E sanger di Hesus, su Yu, ta limpia nos di tur piká.” (1 Huan 1:7) Pues, Yehova ta dispuesto pa pordoná e pikánan di mas serio, basta nos ta arepentí di kurason.—Lesa Isaías 1:18.

Kiko nos tin ku hasi pa Dios pordoná nos?

Si nos ke pa Yehova Dios pordoná nos, nos mester siña konos’é. Esei ta enserá komprondé su kamindanan, su konsehonan i loke e ta ferwagt di nos. (Huan 17:3) Yehova ta kla pa pordoná hende ku ta arepentí di nan pikánan i hasi esfuerso pa kambia.—Lesa Echonan 3:19.

No ta imposibel pa haña e aprobashon di Dios. Yehova konosé nos debilidatnan. E ta un Dios miserikòrdioso i bondadoso. Esei no ta duna bo e deseo pa siña mas enkuanto kon bo por agrad’é?—Lesa Salmo 103:13, 14.