Dios Ta Invitá Bo pa Hala Serka Dje

DIKON TIN HENDE TA DUDA: Hopi hende ku ta kere den Dios ta sinti ku e ta leu for di nan. Christina, un señora di Irlanda ku tabata bai misa tur siman, ta bisa: “Mi tabata mira Dios simplemente komo esun ku a krea tur kos. Pero mi no tabata konos’é. Nunka e no a atraé mi.”

LOKE BEIBEL TA SIÑA: Yehova no ta laga nos pa nos kuenta ora nos sinti nos mes desampará. Hesus a mustra kuantu interes Dios tin den nos: “Si un hende tin 100 karné i ún di nan dual, lo e no laga e 99 karnénan riba seru i bai buska esun ku a dual?” Kiko esaki ta siña nos? “Asina tambe mi Tata ku ta den shelu no ta deseá pa ni ún di e chikitunan akí bai pèrdí.”—Mateo 18:12-14.

Kada “ún di e chikitunan akí” ta presioso den bista di Dios. Kon Dios ta “bai buska esun ku a dual?” E teksto sitá na kuminsamentu di e artíkulo akí ta mustra ku Yehova ta hala hende serka di dje.

Laga nos wak kon Dios a tuma inisiativa pa hala hende di kurason sinsero serka dje. Den promé siglo, Dios a manda e disipel Felipe pa bai serka un ofisial di Etiopia ku tabata lesando un profesia di Beibel pa splik’é su nifikashon. (Echonan 8:26-39) Mas despues, Dios a dirigí apòstel Pedro pa bai bishitá un ofisial romano ku yama Kornelio, kende tabata hasi orashon i tabata hasi esfuerso pa adorá Dios. (Echonan 10:1-48) Tambe Dios a guia apòstel Pablo i su kompañeronan na un riu pafó di e stat di Filipo. Ei nan a topa Lidia, un señora ku tabata “temeroso di Dios.” Anto, “Yehova a habri su kurason kompletamente pa e aseptá” e kosnan ku nan a papia kuné.—Echonan 16:9-15.

Den kada un di e kasonan akí, Yehova a hasi sigur ku esnan ku tabata busk’é a haña e chèns pa konos’é. Ken ta esnan ku awe ta bishitá hende na kas i den áreanan públiko pa kompartí e mensahe di Beibel tokante Dios? Hopi hende lo kontestá ku ta e Testigunan di Yehova. Puntra bo mes: ‘Akaso Dios ta usa nan pa hala mi serka dje?’ Nos ta animá bo pa bo pidi Dios p’e yuda bo aseptá su invitashon pa hala serka dje.a