Yehova Ta Bendishoná Hende Generoso

NOS Kreador a duna hende un regalo masha balioso: boluntat liber. Ademas, e ta bendishoná esnan ku na un manera inegoista ta usa nan boluntat liber pa promové adorashon berdadero, pa santifiká su nòmber santu i pa apoyá su magnífiko propósito. Yehova no ke pa nos obedes’é djis pasobra nos tin miedu òf ta sinti nos obligá. Mas bien, e ta keda kontentu ora nos ta sirbié pasobra nos ta stim’é i ta gradisidu na dje.

Por ehèmpel, tempu ku e israelitanan tabata den e desierto di Sinaí, Yehova a duna nan instrukshon pa konstruí un lugá di adorashon. El a bisa nan: “Tuma for di meimei di boso un ofrenda pa SEÑOR; esun ku su kurason ta dispuesto, lag’é hiba esaki komo ofrenda pa SEÑOR.” (Éks. 35:5) Kada israelita por a duna loke e tabata por. I kada kontribushon boluntario—sin importá kiko òf kuantu e tabata—por a ser usá pa kumpli ku e boluntat di Dios. Kon e israelitanan a reakshoná?

“Tur hende ku su kurason tabata konmov’é,” esta ku tabatin un kurason dispuesto, a duna ofrenda boluntario. Boluntariamente, hòmber i muhé a trese algu pa e trabou di Yehova. Nan a trese: borstspeld, renchi di orea, renchi-di-seyo, oro, plata, bròns, hilu blou, púrpura i skarlata, lino fini, lana di kabritu, kueru di karné chubatu tinzjá kòrá, kueru di dòlfein, palu di akasia, piedra presioso i vários tipo di zeta. Finalmente, e material ku nan a duna “tabata sufisiente, i mas ku sufisiente, pa tur e trabou ku mester a wòrdu hasí.”—Éks. 35:21-24, 27-29; 36:7.

Loke a hasi Yehova mas kontentu no tabata e ofrendanan riba nan mes sino e generosidat di e hendenan ku a apoyá adorashon berdadero mediante nan donashonnan. Tabatin hende tambe ku a sinti nan motivá pa duna di nan tempu i a kontribuí ku nan trabou. E relato ta bisa ku “tur e muhénan eksperto tabata hila ku nan man.” Sí, ‘tur e muhénan ku nan kurason tabata konmové nan tabata hila lana di kabritu.’ Ademas, Yehova a duna Bezaleel ‘sabiduria, komprondementu i konosementu den tur obra.’ De echo, Yehova a duna Bezaleel i Aholiab e kapasidat pa hasi tur trabou ku el a asigná nan.—Éks. 35:25, 26, 30-35.

Ora Yehova a animá e israelitanan pa kontribuí, e tabatin tur konfiansa ku tur hende ku ‘kurason dispuesto’ lo a apoyá adorashon berdadero. I Yehova, na su turno, a bendishoná e hendenan akí rikamente, guiando nan i hasiendo nan masha felis. Di e manera ei, Yehova a demostrá ku, ora e bendishoná su sirbidónan ku ta generoso, e ta hasi sigur ku nan no ta falta rekurso ni e kapasidat nesesario pa kumpli ku su boluntat. (Sal. 34:9) Pues, si nos ta sirbi Yehova na un manera inegoista, nos por ta sigur di su bendishon.