Tene Kuidou! Satanas Ke Habraká Bo

1. Splika kon un angel a bira Satanas.

UN TEMPU, e tabatin un bon relashon ku Yehova. Pero dado momento, el a kuminsá deseá pa hende ador’é. En bes di rechasá e mal deseo ei, el a laga esaki krese i esei a pon’é peka. (Sant. 1:14, 15) Ta di ken nos ta papia? Di un angel ku a rebeldiá kontra Yehova i ku awe nos konosé komo Satanas. Beibel ta bisa ku “e no a keda firme den e bèrdat” i a bira “e tata di mentira.”—Huan 8:44.

2, 3. Kiko e nòmbernan “Satanas,” “Diabel,” “kolebra” i “dragon” ta revelá tokante Yehova su enemigu di mas grandi?

² E angel rebelde akí ta e enemigu di mas grandi di Yehova i di humanidat. Beibel ta dun’é vários título, i nan ta yuda nos mira kon malbado e ta realmente. Por ehèmpel, Satanas ta nifiká “Resistidó” òf Opositor. I esei ta indiká ku e angel malbado akí no ta someté su mes na e gobernashon di Dios, sino mas bien ta lucha kontra dje ku tur su forsa. E deseo di mas grandi di Satanas ta di kaba ku e gobernashon di Yehova.

³ Na Revelashon 12:9, nos ta haña mas nòmber pa Satanas. Un di nan ta “Diabel,” ku ta nifiká “Kalumniadó.” Esei ta pasobra Satanas a daña e reputashon di Yehova ora el a akusá Dios di ta un mentiroso. E ekspreshon “kolebra original” ta laga nos kòrda e dia tristu ku e angel akí a usa un kolebra pa gaña Eva. I e ekspreshon “dragon grandi” ta transmití e idea di un mònster spantoso. Esaki ta un bon deskripshon di Diabel, pasobra e ta feros, kruel i malbado. E ke pa e propósito di Yehova frakasá, i e ke kaba ku e pueblo di Dios.

4. Kiko nos lo analisá den e artíkulo akí?

⁴ Ta bisto anto ku Satanas ta masha peligroso i e ta desididu pa pone nos bira infiel na Dios. Ta p’esei Beibel ta spièrta nos: “Mantené boso sano huisio i sea alerta. Boso atversario, Diabel, ta kana rònt manera un leon ku ta grita, buskando ken e por habraká.” (1 Ped. 5:8) E artíkulo akí lo analisá tres karakterístika di Satanas ku ta demostrá dikon nos tin ku tene masha kuidou kuné.

SATANAS TA PODEROSO

5, 6. (a) Menshoná algun ehèmpel ku ta mustra ku e angelnan ta masha poderoso. (b) Den ki sentido Diabel tin “e medio pa kousa morto”?

⁵ E angelnan ta kriaturanan spiritual masha poderoso. (Sal. 103:20) Nan ta hopi mas fuerte i inteligente ku nos. Ta klaru ku e angelnan fiel ta usa nan poder pa hasi bon. Por ehèmpel, un biaha un angel di Yehova a hasi algu ku lo tabata imposibel pa un hende hasi: el a mata 185.000 sòldá enemigu di Israel; un hazaña difísil asta pa henter un ehérsito! (2 Rei. 19:35) Na un otro okashon, un angel a usa su abilidat i poder sobrehumano pa saka e apòstelnan di Hesus for di prizòn. Aunke tabatin wardadó di prezu pará na porta, nan no a ripará ku un angel a habri e portanan di prizòn, saka e apòstelnan pafó i despues bolbe sera e portanan na yabi!—Echo. 5:18-23.

⁶ Pues, miéntras ku angelnan fiel ta usa nan poder pa hasi bon, Satanas ta usa su poder pa hasi malu. Anto ta basta poder i influensia e tin! Beibel ta yam’é “e gobernante di e mundu akí” i “e dios di e mundu akí.” (Huan 12:31; 2 Kor. 4:4) Satanas e Diabel asta tin “e medio pa kousa morto.” (Heb. 2:14) Esaki no ta nifiká ku e ta mata tur hende direktamente. Kiko e ta nifiká anto? Wèl, ta Satanas a gaña Eva i pone ku Adam a desobedesé Dios, i komo resultado piká i morto a pasa pa tur hende. (Rom. 5:12) Ademas, e ta esun ku a sembra odio i violensia den e mundu akí. Den e sentido ei, Diabel tabatin “e medio pa kousa morto.” Manera Hesus a bisa, e ta “un matadó.” (Huan 8:44) Sin duda, e ta un enemigu poderoso.

7. Kon e demoñonan a demostrá ku nan ta poderoso?

⁷ Ora nos ta oponé Satanas, nos ta oponé tambe tur esnan ku ta tuma parti p’e i ku ta rebeldiá kontra e gobernashon di Dios. Esei ta inkluí un grupo grandi di angel rebelde ku Beibel ta yama demoño. (Rev. 12:3, 4) Hopi biaha, e demoñonan a usa nan forsa sobrehumano pa tormentá hende i pa pone nan sufri. (Mat. 8:28-32; Mar. 5:1-5) No lubidá nunka kon poderoso e angelnan malbado ei i nan gobernante, Diabel, ta. (Mat. 9:34) Sin e yudansa di Yehova, hamas nos lo por gana e bataya kontra Satanas.

SATANAS TA KRUEL

8. (a) Kiko ta e “plato prinsipal” di Satanas? (Wak e promé plachi.) (b) For di loke bo mes a mira, kon e mundu djawe ta reflehá e spiritu kruel i malisioso di Satanas?

⁸ Apòstel Pedro a bisa ku Satanas ta manera “un leon ku ta grita.” Segun un buki di konsulta, e palabra griego tradusí komo “grita” ta transmití e idea di “un bestia masha hambrá.” Esaki ta un bon deskripshon di e aktitut kruel i malisioso di Diabel, pasobra aunke e tin henter e mundu den su gara, e ta sigui purba di habraká mas hende; su apetit ta insasiabel. (1 Huan 5:19) Den su bista, e mundu ta simplemente e “aperitivo.” Su “plato prinsipal” ta e ungínan ku ta riba tera i nan kompañeronan, esta, e ‘otro karnénan.’ (Huan 10:16; Rev. 12:17) Satanas ta desididu pa kaba ku e pueblo di Dios. E atakenan di persekushon ku el a lansa kontra kristiannan berdadero for di e promé siglo te ku awe ta demostrá kon kruel i malisioso Satanas ta.

9, 10. (a) Kon Satanas a ataká e antiguo nashon di Israel? (Duna algun ehèmpel.) (b) Dikon Satanas tabatin un motibu spesial pa ataká Israel? (c) Kon bo ta kere Satanas ta sintié kada biaha ku un sirbidó di Yehova kometé un piká serio?

⁹ Diabel a demostrá su krueldat na un otro manera mas. Un leon hambrá no ta sinti niun tiki duele di su proi. E ta mat’é sin kompashon i no ta sinti niun remordimentu despues. Di igual manera, Satanas no tin niun tiki duele di e personanan ku e ta ataká. Por ehèmpel, den pasado, kuantu biaha Satanas lo no tabata lur den bisindario pa wak kon e israelitanan ta kai den piká manera inmoralidat seksual i golosidat? Ora ku Zimri a kometé un akto inmoral i Gehazi a hasi ko’i golos, nan dos a sufri konsekuensianan amargo. Imaginá bo kon Satanas lo a grita di goso ora el a mira esei.—Num. 25:6-8, 14, 15; 2 Rei. 5:20-27.

¹⁰ Satanas tabatin un motibu spesial pa ataká e nashon di Israel: ta den e nashon ei e Mesías lo a nase, esun ku lo a aplast’é i demostrá ku Yehova tin e derecho di goberná. (Gén. 3:15) Satanas no tabata ke pa e israelitanan tin e aprobashon di Dios, pues el a hasi tur su posibel pa kontaminá nan ku piká. No kere ku e tabatin duele di David ora ku el a kometé adulterio ni ku el a sinti pa Moises ora ku e profeta a pèrdè e oportunidat di drenta e Tera Primintí. Al kontrario! Satanas ta gosa sinfin kada biaha ku e mira un sirbidó di Dios kometé un piká serio. De echo, e ta usa e viktorianan ei pa hasi bofon di Yehova.—Pro. 27:11.

11. Dikon probablemente Satanas a ataká Sara?

¹¹ Promé ku e nashon di Israel a ser formá tabatin un famia ku Satanas a odia spesialmente: e famia di Abraham, ya ku ta for di su liña di desendensia e Mesías lo a bini. Laga nos wak un suseso ku ta demostrá esei. Dios a primintí Abraham ku lo el a bira “un nashon grandi.” (Gén. 12:1-3) Poko despues, miéntras Abraham ku Sara tabata biba na Egipto, e Fárao su bista a kai riba Sara i el a duna òrdu pa trese Sara na su palasio p’e por a kasa kuné. Afortunadamente, Yehova a intervení na tempu i a skapa Sara di e situashon difísil ei. (Gén. 12:14-20, NW) Djis promé ku Isak a nase, kasi e mesun kos a bolbe pasa ku Sara den e stat di Gerar. (Gén. 20:1-7) Ta Satanas lo tabata tras di e situashonnan ei? Kòrda ku Sara a bandoná e stat riku di Ur pa bai biba den tènt. Kisas Satanas a pensa ku lo e por a hink’é den tentashon ku e palasionan luhoso di Fárao i Abimelek? Podisé Satanas a kere ku Sara lo a traishoná su kasá—i Yehova—i kometé adulterio? Beibel no ta bisa; loke sí nos sa ta ku e Diabel lo a keda masha kontentu si e por a stroba Sara di bira parti di e liña di desendensia di e Mesías. Lo no a duel Satanas niun tiki si e por a kaba ku Sara su bon reputashon, su matrimonio i su relashon ku Yehova. Esta kruel i malisioso Satanas ta!

12, 13. (a) Kon Satanas a demostrá despues ku Hesus a nase ku e ta kruel i malisioso? (b) Kiko bo ta kere Satanas ta pensa di mucha- i hóbennan ku ta stima Yehova i ta hasi nan bèst pa sirbié awe?

¹² Hesus a nase siglonan despues di Abraham. Bo ta kere ku Satanas a pensa ku esaki sí tabata un yuchi dushi i bunita i ku e tabatin gana di karg’é den su brasa? Klaru ku nò! E tabata sa ku e yu akí lo a krese i bira e Mesías primintí. De echo, Hesus tabata e parti prinsipal di e desendensia di Abraham, esun ku despues lo “destruí e obranan di Diabel.” (1 Huan 3:8) Akaso Satanas lo a rasoná ku lo ta muchu kruel pa mata un mucha indefenso? Niun ora so! Satanas ta sin eskrúpulo; e no tin kunes ku loke ta bon òf malu. I den kaso di e mucha Hesus, e no a pèrdè pa gana i a purba di mat’é. Kon?

¹³ Rei Heródes a rabia mashá ora ku astrólogonan a bin puntra pa e “rei di e hudiunan,” i e kier a mata e bebi. (Mat. 2:1-3, 13) Pa hasi sigur ku e ta logra su meta, el a manda mata tur mucha hòmber di dos aña di edat bai abou na Bètlehèm i den henter e region ei banda. (Lesa Mateo 2:13-18.) Afortunadamente, Hesus a sobrebibí e matansa teribel ei. Pero kiko esaki ta siña nos di nos enemigu Satanas? Nos bida no bal nada den bista di Diabel. E no tin kunes ku mucha. Di bèrdat e ta un ‘leon ku ta buska hende pa habraká.’ Nos no mester deskuidá niun momento, pasobra Diabel ta masha masha peligroso i kruel mes!

SATANAS TA ENGAÑOSO

14, 15. Kon Satanas “a siega mente di esnan ku no ta kreyente”?

¹⁴ E úniko manera ku Satanas por alehá hende for di nos Dios stimá, Yehova, ta si e logra gaña nan. (1 Huan 4:8) Satanas ta gaña hende di tal manera ku nan no ta “konsiente di nan nesesidat spiritual,” es desir, nan no ta realisá ku nan tin mester di Dios. (Mat. 5:3) Diabel “a siega mente di esnan ku no ta kreyente” pa “lus di e glorioso bon notisia tokante Kristu, kende ta e imágen di Dios, no bria riba nan.”—2 Kor. 4:4.

¹⁵ Un di e medionan prinsipal ku Satanas ta usa pa gaña hende ta religion falsu. E sa ku Yehova ta e Dios ku ta eksigí deboshon eksklusivo; e “no ta tolerá ningun otro dios.” (Éks. 20:5, BPK) Pues, nos por imaginá nos ku Satanas ta keda masha kontentu ora e mira kuantu hende ta adorá antepasado, naturalesa, bestia òf kualke otro persona òf kos ku no ta Yehova. Tambe e ta laga hopi hende kere ku nan ta adorando Dios manera mester ta, miéntras ku en realidat e tin nan sklabisá na doktrinanan falsu i ritonan ku no ta yuda ku nada. Nan ta den e mesun situashon lamentabel ku e israelitanan den tempu di Isaías. Yehova a supliká nan: “Pakiko boso ta gasta plaka na loke no ta pan, i ta gasta boso suèldu na loke no ta satisfasé? Skucha mi bon i kome loke ta bon, i laga boso alma gosa den abundansia.”—Isa. 55:2.

16, 17. (a) Dikon Hesus a bisa Pedro: “Kita for di mi dilanti, Satanas”? (b) Kiko Satanas ta hasi awe pa pone nos lubidá ku e tempu ta urgente?

¹⁶ Satanas por gaña asta un sirbidó zeloso di Yehova. Por ehèmpel, wak kiko a pasa ora ku Hesus a bisa su disipelnan ku pronto hende lo a mat’é. Pedro a hala Hesus un banda i, ku tur su bon intenshon, a bis’é: “Sea bondadoso ku bo mes, Señor; esei sigur lo no pasa ku bo.” Ma Hesus a kontestá Pedro ku firmesa: “Kita for di mi dilanti, Satanas!” (Mat. 16:22, 23) Dikon Hesus a bisa Pedro esei? Pasobra Hesus tabata sa ku e tabata aserkando un di e momentonan di mas importante den historia. E tabata a punto di sakrifiká su bida komo reskate i demostrá ku Diabel ta un mentiroso. No tabata e momento p’e ta “bondadoso” ku su mes. Pero esei ta loke Satanas lo tabata ke. Esta felis lo el a sintié si Hesus lo a floha su vigilansia i bai tras di Pedro!

¹⁷ Nos tambe ta biba den un tempu krítiko: fin di e mundu akí ta serka. Satanas lo ke pa nos floha nos vigilansia—‘ser bondadoso’ ku nos mes—i trata di tin un bida mas kómodo posibel den e mundu akí. E ke pa nos lubidá kon urgente e tempu akí ta! Pero no dun’é e satisfakshon ei! Al kontrario, hasi loke Hesus a manda: “Keda vigilá.” (Mat. 24:42) No kere e mentira di Diabel ku e fin ta leu ainda òf ku e fin lo no yega nunka.

18, 19. (a) Satanas ta purba konvensé nos di kiko? (b) Kon Yehova ta yuda nos mantené nos sano huisio i keda alerta?

¹⁸ Satanas ta usa un otro engaño mas ku ta dun’é bon resultado. E ta purba di konvensé nos ku Dios no stima nos i ku nos pikánan ta imperdonabel. Pero eseinan ta mentira di Satanas. Si nos pensa bon, ken ta esun ku en realidat no meresé e amor di Yehova? Ta Satanas. I ken ta esun ku en realidat no meresé pordon? Ta Satanas. En kambio, Beibel ta duna nos e siguransa: “Dios no ta inhustu pa lubidá boso trabou i e amor ku boso a mustra pa su nòmber.” (Heb. 6:10) Yehova ta apresiá e esfuerso ku nos ta hasi pa agrad’é, i nos sirbishi no ta enbano. (Lesa 1 Korintionan 15:58.) P’esei, no laga e mentiranan di Satanas gaña bo.

¹⁹ Pues, manera nos a mira, Satanas ta poderoso, kruel i engañoso. Kon nos por gana e bataya kontra un enemigu temibel asina? Solamente ku e yudansa di Yehova. Su Palabra ta siña nos tokante e métodonan di Satanas, i debí na esei “su trikinan no ta deskonosí pa nos.” (2 Kor. 2:11) Ora nos ta komprondé kon Satanas ta ataká, ta mas fásil pa nos mantené nos sano huisio i keda alerta. Pero djis konosé su trikinan no ta basta. Beibel ta bisa: “Oponé Diabel, i lo e hui for di boso.” (Sant. 4:7) E siguiente artíkulo lo trata tres área den kua nos por gana e bataya kontra Satanas.