PREGUNTA DI LEKTOR

Ken ta Gòg di Magòg menshoná den e buki di Ezekiel?

Pa hopi aña, nos publikashonnan a bisa ku Gòg di Magòg ta e nòmber ku ta referí na Satanas e Diabel despues ku a sak’é for di shelu. E splikashon akí tabata basá riba e echo ku e buki di Revelashon ta bisa ku Satanas e Diabel ta e lider di e atake mundial kontra e pueblo di Dios. (Rev. 12:1-17) Pues, nos a pensa ku Gòg mester ta un otro nòmber profétiko pa Satanas.

Pero e splikashon ei a lanta vários pregunta importante. Pa kuminsá, Yehova a bisa Gòg kon e ta bai destruyé: “Lo mi duna bo komo kuminda na tur sorto di para di rapiña i na bestia di mondi.” (Eze. 39:4) Kaba Yehova a agregá: “Riba e dia ei lo mi duna Gòg un lugá pa dera ayanan na Israel . . . Asina nan lo dera Gòg ayanan, huntu ku henter su multitut.” (Eze. 39:11) Pero kon ta posibel ku “para di rapiña” i “bestia di mondi” por kome Satanas ku ta un kriatura spiritual? Kon por dera Satanas riba tera? Es mas, Beibel ta bisa bon kla ku Satanas lo ser bentá den abismo pa 1.000 aña. Lo e no ser komé ni derá.—Rev. 20:1, 2.

Di otro banda, Beibel ta bisa nos ku na fin di e 1.000 aña Satanas lo ser librá for di e abismo, i “lo e sali bai pa gaña e nashonnan na e kuater skinanan di tera, Gòg i Magòg, i pa reuní nan huntu pa e guera.” (Rev. 20:8) Pero si Satanas ta Gòg, kon e por gaña Gòg? Pues, e “Gòg” menshoná den e profesia di Ezekiel i den e buki di Revelashon no ta referí na Satanas.

Ken anto ta Gòg di Magòg? Pa kontestá e pregunta ei, nos tin ku komprondé for di e Skritura ta ken ta ataká e pueblo di Dios. Beibel ta menshoná tres atake: di ‘Gòg di Magòg,’ di “e rei di nort” i di “e reinan di tera.” (Eze. 38:2, 10-13; Dan. 11:40, 44, 45; Rev. 17:14; 19:19) Akaso esakinan ta atakenan separá? Probablemente ku nò. Beibel ta referí sin duda na e mesun atake pero bou di un otro nòmber. Kon nos por sa? Pasobra Beibel ta bisa nos ku tur e nashonnan di tera lo ta enbolbí den e atake final akí ku lo start e guera di Armagedon.—Rev. 16:14, 16.

Ora nos kompará tur e pasashinan akí den Beibel ku ta papia di e atake final kontra di e pueblo di Dios ku otro, nos por mira klaramente ku e nòmber Gòg di Magòg no ta referí na Satanas, sino na un koalishon, òf grupo, di nashon. Ta ken lo dirigí e koalishon akí? Lo ta e “rei di nort”? Nos no sa sigur. Pero parse ku e splikashon ei ta kuadra ku loke Yehova ta bisa Gòg: “Lo bo bini for di bo lugá, for di e partinan mas alehá di nort, abo i hopi pueblo huntu ku bo, nan tur riba kabai, un multitut grandi i un ehérsito poderoso.”—Eze. 38:6, 15.

Asina tambe profeta Daniel, kende a biba den e mesun tempu ku Ezekiel, a bisa lo siguiente tokante e rei di nort: “Rumornan for di pariba i for di nort lo molesti’é, i ku gran furia e lo sali pa destruí i kaba ku hopi hende. I e lo lanta su tèntnan real entre e lamannan i e bunita Seru Santu; ma e lo yega na su fin, i ningun hende lo no yud’é.” (Dan. 11:44, 45) Esaki ta kasi meskos ku loke e buki di Ezekiel ta bisa ku Gòg lo hasi.—Eze. 38:8-12, 16.

Kiko lo sosodé komo resultado di e atake final akí? Daniel ta konta nos: “E tempu ei, Miguel [Hesukristu], e gran prens ku [desde aña 1914] ta protehá e yu hòmbernan di bo pueblo, lo lanta [na Armagedon]. I lo tin un tempu di angustia [e tribulashon grandi] manera nunka tabatin for di tempu ku tabata eksistí un nashon te na e tempu ei; i e tempu ei bo pueblo, tur hende ku su nòmber wòrdu hañá skirbí den e buki, lo wòrdu reskatá.” (Dan. 12:1) Revelashon 19:11-21 tambe ta duna un deskripshon similar di loke Hesus, e representante di Dios, lo hasi.

Awor bon, Revelashon 20:8 ta papia di “Gòg i Magòg.” Ken e Gòg i Magòg akí ta? Na fin di e 1.000 aña lo tuma lugá un prueba final i lo tin hende ku ta rebeldiá kontra Yehova. Nan lo aktua ku e mesun odio asesino ku ‘Gòg di Magòg,’ e koalishon di nashonnan ku a ataká e pueblo di Dios djis promé ku Armagedon. Pero e resultado pa tur dos grupo di enemigu di Yehova lo ta presis meskos: morto eterno! (Rev. 19:20, 21; 20:9) P’esei, tur kos ta indiká anto ku ta e hendenan ku rebeldiá na final di e 1.000 aña Beibel ta yama “Gòg i Magòg.”

Komo studiante diligente di e Palabra di Dios, nos ta ansioso pa sa ta ken lo asumí e papel di “e rei di nort” den futuro serkano. Pero sin importá ken ta esun ku lo enkabesá e grupo di nashon ku lo ataká e pueblo di Dios, nos ta sigur di dos kos: (1) Gòg di Magòg ku su ehérsitonan lo ser derotá i destruí, i (2) nos Rei, Hesukristu, lo salba e pueblo di Dios i hiba nan den un mundu nobo di berdadero pas i siguridat.—Rev. 7:14-17.