Bo Mester Ta Interesá den e Kuater Koredónan di Kabai?

Bo Mester Ta Interesá den e Kuater Koredónan di Kabai? E kabainan ta bula sali na kareda, i nan patanan ta zona duru manera zonido di bos. E esena di e kabainan poderoso ku nan koredónan ta pinta un kuadro asina bibu ku kasi nan ta bula sali for di e páginanan di Beibel. E promé kabai ta blanku, i su koredó ta un rei glorioso ku a kaba di ser koroná. Tras di dje ta bini un kabai koló di kandela, i su koredó ta kita pas for di riba tera. Despues ta sigui e di tres kabai, e ta pretu manera mei anochi, i su koredó tin un balansa den su man komo un mensahe di spièrtamentu pa proklamá ku lo no tin sufisiente kuminda. Anto e di kuater kabai tin un koló blek, i e ta trese malesa i menasanan mortal. Su koredó ta Morto mes. I Graf, es desir, e graf komun di humanidat, ta sigui nèt su tras i ta kolekta e mortonan.—Revelashon 6:1-8.

“Mi a haña miedu e promé biaha ku mi a lesa tokante e kuater koredónan di kabai. Mi a sinti manera e Dia di Huisio tabata biniendo, i komo ku mi no tabata prepará p’e, lo mi no a sobrebibí.”—Crystal.

“E kuater distinto koredónan di kabai riba kabainan di diferente koló a fasiná mi. Ora mi a komprondé loke e vishon ta nifiká, mi a hañ’é lógiko.”—Ed.

Bo ta sinti meskos ku Crystal a sinti pa ku e kuater koredónan di kabai? Òf bo ta pensa manera Ed? En todo kaso, e kareda impreshonante di e koredónan ei ta un di e esenanan mas konosí den Revelashon, e último buki di Beibel. Bo tabata sa ku bo por benefisiá di e vishon akí ora bo komprond’é? Kon asina? Dios ta primintí ku bo por haña berdadero felisidat ora bo lesa e buki profétiko akí, siña for di dje i biba di akuerdo ku e kosnan skirbí den dje.—Revelashon 1:1-3.

Aunke e vishon di e kuater koredónan di kabai ta duna algun hende miedu, e no ta skirbí pa spanta bo. De fakto, miónes di hende a mira ku e vishon akí ta fortalesé nan fe i a asta siña nan tokante un speransa pa un futuro briante. Esei por ta den bo kaso tambe! E siguiente artíkulo lo duna mas detaye.