No Laga Bo Amor Fria

1, 2. (a) Na promé instante, na ken e palabranan di Hesus na Mateo 24:12 a apliká? (b) Kon e buki di Echonan ta indiká ku mayoria di e promé kristiannan a sigui demostrá amor? (Wak e promé plachi.)

UN ASPEKTO di e señal ku Hesus a duna relashoná ku e “konklushon di e era akí” ta ku “amor di mayoria di hende lo fria.” (Mat. 24:3, 12) Den e promé siglo, e hudiunan ku a bisa ku nan tabata e pueblo di Dios a laga nan amor pa Dios fria.

² Pero di otro banda, mayoria di kristian di e tempu ei a sigui “deklará e bon notisia tokante Hesus, ku ta e Kristu,” i nan a demostrá amor pa Dios, pa nan rumannan i pa hende ku no tabata konosé Dios. (Echo. 2:44-47; 5:42) Apesar di esei, algun di Hesus su siguidónan den e promé siglo a laga nan amor fria.

3. Kiko lo por a pone amor di algun kristian fria?

³ Ora Hesukristu resusitá tabata papia ku e kristiannan di promé siglo ku tabata biba na Efeso, el a bisa: “Esaki mi tin kontra bo: bo a pèrdè e amor ku bo tabatin na kuminsamentu.” (Rev. 2:4) Kiko por tabata un motibu pakiko esaki a sosodé? Kisas e promé kristiannan ei di Kristu a laga e manera di pensa karnal di e mundu akí influensiá nan. (Efe. 2:2, 3) Manera hopi stat awendia, den promé siglo, Efeso tabata kankan di maldat. E tabata un stat riku, i su habitantenan a pone hopi énfasis riba luho, plaser i un bida kómodo. Di mes, ku tur e plasernan egoista ei, hende no tabatin espasio mas pa demostrá amor sin egoismo. Ademas, kondukta sinbèrgwensa i inmoralidat repugnante tabata na òrdu di dia.

4. (a) Awe, den ki maneranan amor di hopi hende a fria? (b) Den ki tres área nos amor por ser poné prueba?

⁴ Hesus su profesia ku hende su amor lo fria ta kumpli awe tambe. Awe, hende tin kada bes ménos amor pa Dios. Miónes di hende a bira lomba p’e i ta akudí na institutonan humano pa resolvé problemanan di humanidat. Pa e motibu ei, e amor di hende ku no ta adorá Yehova Dios ta sigui fria. Manera a pasa den promé siglo ku e kongregashon na Efeso, awe tambe kristiannan por bira negligente i laga nan amor fria. Laga nos analisá tres área kaminda nos amor por ser poné na prueba: (1) Amor pa Yehova, (2) amor pa e bèrdatnan di Beibel i (3) amor pa nos rumannan.

AMOR PA YEHOVA

5. Dikon nos mester tin amor pa Dios?

⁵ Mas promé, riba e mesun dia ku Hesus a spièrta su siguidónan ku amor di hende lo fria, el a enfatisá e amor di mas importante. El a bisa: “‘Stima Yehova bo Dios ku henter bo kurason, ku henter bo alma i ku henter bo mente.’ Esaki ta e mandamentu di mas grandi i esun di promé.” (Mat. 22:37, 38) En bèrdat, amor profundo pa Dios ta yuda nos pa obedesé Yehova su mandamentunan, pa perseverá i pa odia loke ta malu. (Lesa Salmo 97:10.) Pero, Satanas i su mundu ta hasi hopi esfuerso pa suak nos amor pa Dios.

6. E echo ku hende su amor pa Dios a fria a trese ki konsekuensia?

⁶ E mundu rònt di nos tin un punto di bista robes di amor. En bes di mustra amor na e Kreador, hende ta “stima nan mes.” (2 Tim. 3:2) E mundu akí goberná pa Satanas ta fomentá e “deseo di karni, deseo di wowo i [e idea di] kana broma ku loke bo tin.” (1 Huan 2:16) Apòstel Pablo a spièrta su rumannan kristian kontra e tendensia di bai tras di deseonan karnal ora el a bisa: “Mente fihá riba karni ta nifiká morto, . . . pasobra mente fihá riba karni ta nifiká enemistat ku Dios.” (Rom. 8:6, 7) Sí, hende ku a dediká tur nan tempu na kore tras di kosnan material òf na satisfasé nan deseonan seksual a keda desepshoná i a kousa nan mes hopi doló.—1 Kor. 6:18; 1 Tim. 6:9, 10.

7. Ki peliger kristiannan ta kore awe?

⁷ Den algun pais, tin ateista, agnóstiko i evolushonista ku den un forma abierto ta promové ideanan pa suak amor pa Dios i tambe pa hende no kere mes ku e ta eksistí. Nan a konvensé hopi hende ku ta solamente un persona naïf òf bobo ta kere den un Kreador. Na mes momento, hende ta atmirá sientífikonan, i esei ta kita nan atenshon for di nos Kreador. (Rom. 1:25) Si nos skucha na e kosnan ei, nos por alehá for di Yehova i nos amor p’e por fria.—Heb. 3:12.

8. (a) Ki sirkunstansianan desanimante hopi di Yehova su sirbidónan ta enfrentá? (b) Ki garantia nos ta haña na Salmo 136?

⁸ Algu otro ku por pone nos amor pa Dios fria i debilitá nos fe ta desanimashon. Den e mundu malbado akí bou di kontrol di Satanas, nos tur por pasa den sirkunstansianan difísil ku por desanimá nos. (1 Huan 5:19) Kisas aworakí nos ta enfrentá problema ku ta bini ku edat avansá, problema ku salú òf problema finansiero. Òf kisas nos ta lucha ku e sintimentu ku nos no ta sirbi pa nada, ekspektativanan ku no a kumpli òf e idea ku nos a frakasá. Pero, hamas nos mester laga sirkunstansia- i sintimentunan asina konvensé nos ku Yehova a bandoná nos. Mas bien, nos mester meditá riba e pasashinan trankilisante di Beibel ku ta garantisá nos di e gran amor ku Yehova tin pa nos. Un di nan ta na Salmo 136:23, ku ta bisa: “[El] a kòrda riba nos den nos humiashon, pasobra su miserikòrdia [òf, “amor leal,” NW] ta pa semper.” Sí, Yehova su amor leal pa su sirbidónan no ta kambia. P’esei nos por ta sigur ku e ta skucha nos “súplikanan” pa yudansa i lo e kontestá nos.—Sal. 116:1; 136:24-26.

9. Kiko a yuda Pablo haña e forsa pa mantené su amor pa Dios fuerte?

⁹ Meskos ku e salmista, Pablo a meditá riba e echo ku konstantemente Yehova a apoy’é i esei a fortales’é. El a skirbi: “Yehova ta mi ayudante; lo mi no tin miedu. Kiko hende por hasi mi?” (Heb. 13:6) E konfiansa firme ei den Yehova su kuido amoroso a yuda Pablo lucha ku problema di bida. E no a laga sirkunstansianan negativo desanim’é. De fakto, tempu e tabata den prizòn, el a skirbi vários karta di animashon. (Efe. 4:1; Flp. 1:7; Flm. 1) Sí, asta ora Pablo tabata bou di prueba severo, el a keda ku su amor pa Dios. Kiko a dun’é forsa pa hasi esaki? El a sigui dependé riba e “Dios di tur konsuelo, kende ta konsolá nos den tur nos tribulashonnan.” (2 Kor. 1:3, 4) Kon nos por imitá Pablo su ehèmpel i mantené nos amor pa Yehova fuerte?

10. Kon nos por mantené nos amor pa Yehova fuerte?

¹⁰ Pablo a menshoná un manera importante ku nos por mantené nos amor pa Yehova fuerte. El a skirbi su rumannan: “Hasi orashon konstantemente.” Despues el a skirbi: “Perseverá den orashon.” (1 Tes. 5:17; Rom. 12:12) Pa nos por tin un bon relashon ku Dios, orashon ta masha importante. (Sal. 86:3) Nos ta hala mas serka di nos Tata selestial, kende “ta skucha orashon,” ora nos tuma tempu pa ekspresá nos sintimentu- i pensamentunan di mas profundo na dje. (Sal. 65:2) Ademas, ora nos mira ku Yehova ta kontestá nos orashonnan, nos amor p’e ta krese. Anto mas i mas nos ta bin realisá ku Yehova “ta serka di tur esnan ku ta sklama na dje.” (Sal. 145:18) Nos konfiansa den Yehova su apoyo duná ku amor lo yuda nos trata ku e pruebanan di fe ku nos lo bai haña den futuro.

AMOR PA E BÈRDATNAN DI BEIBEL

11, 12. Kon nos por haña un amor profundo pa e bèrdatnan di Beibel?

¹¹ Komo kristiannan, nos ta balorá i ta aseptá e bèrdat. E Palabra di Dios ta e úniko fuente di e bèrdat. Hesus a bisa su Tata den orashon: “Bo palabra ta e bèrdat.” (Huan 17:17) P’esei, amor pa e bèrdat ta kuminsá ora nos haña konosementu eksakto di e Palabra di Dios. (Kol. 1:10) Pero esei ta enserá mas ku djis yena nos mente ku informashon. Wak kon e eskritor inspirá di Salmo 119 ta yuda nos komprondé kiko ta nifiká stima e bèrdatnan di Beibel. (Lesa Salmo 119:97-100.) Durante dia, bo ta tuma tempu pa pensa òf meditá riba pasashinan di e Skritura? Nos apresio pa e bèrdatnan di Beibel lo krese ora nos meditá riba e benefisionan ku nos ta haña segun ku nos ta apliká nan den nos bida.

¹² E salmista a sigui bisa: “Ki dushi bo palabranan ta pa mi shel’i boka, mas dushi ku miel den mi boka!” (Sal. 119:103) Di igual manera, nos por saboriá e dushi kuminda spiritual basá riba Beibel ku nos ta risibí di Dios su organisashon. Nos por lag’é smak, na moda di papia, den nos shel’i boka ora nos tuma tempu pa studia i meditá, i asina kòrda e “palabranan agradabel” di e bèrdat, anto usa nan pa yuda otro hende.—Ekl. 12:10.

13. Kiko a yuda Yeremías stima e bèrdatnan di e Skritura, i ki efekto esei tabatin riba dje?

¹³ Profeta Yeremías tabata stima e bèrdatnan di e Skritura. Tuma nota di e efekto ku e palabranan di Dios tabatin riba su kurason. El a bisa: “Bo palabranan a wòrdu hañá i mi a kome nan, i bo palabranan a bira un goso pa mi i e delisia di mi kurason; pasobra mi a wòrdu yamá na bo nòmber, o SEÑOR Dios di ehérsitonan.” (Yer. 15:16) Den un sentido figurativo, Yeremías a kome i digerí Dios su palabranan presioso ora el a meditá riba nan. Di e manera ei, el a haña apresio di kurason pa e privilegio di karga e nòmber di Yehova. Nos amor pa e bèrdatnan di Beibel a motivá nos pa rekonosé e privilegio úniko ku nos tin di karga e nòmber di Dios i di proklamá su Reino den e tempu di fin akí?

14. Kon nos por haña mas amor pa e bèrdatnan di Beibel?

¹⁴ Ademas di lesa Beibel i nos publikashonnan basá riba Beibel, kiko mas nos por hasi pa nos amor pa e bèrdatnan di Beibel por bira mas profundo? Nos por haña mas amor pa e bèrdatnan di Beibel ora nos asistí regularmente na reunion. E estudio semanal di Beibel ku yudansa di E Toren di Vigilansia ta e kanal prinsipal via kua nos ta ser siñá. Pa nos por komprondé e tópiko ku ta ser tratá, nos mester prepará bon pa kada Estudio di Toren di Vigilansia. Un manera ku nos por hasi esei ta ora nos lesa kada teksto di Beibel menshoná. Awe, nos por download E Toren di Vigilansia for di e website jw.org òf wak e riba JW Library app den hopi idioma. Algun di e formatonan elektróniko akí ta permití nos haña akseso fásil i lihé na e tekstonan di Beibel menshoná den kada artíkulo di estudio. Pero sea kual sea e formato ku nos ta usa, ora nos lesa i meditá riba e tekstonan akí, nos amor pa e bèrdatnan di Beibel lo bira mas fuerte.—Lesa Salmo 1:2.

AMOR PA NOS RUMANNAN

15, 16. (a) Segun Huan 13:34 i 35, ki obligashon nos tin? (b) Kon amor pa nos rumannan ta ligá ku nos amor pa Dios i pa Beibel?

¹⁵ Riba Hesus su último anochi riba tera, el a bisa su disipelnan: “Mi ta duna boso un mandamentu nobo: stima otro; meskos ku ami a stima boso, boso tambe stima otro. Na esaki tur hende lo sa ku boso ta mi disipelnan, esta, si boso ta stima otro.”—Huan 13:34, 35.

¹⁶ E amor ku nos tin pa Yehova ta estrechamente ligá ku e amor ku nos tin pa nos rumannan. De echo, nos no por tin esun sin e otro. Apòstel Huan a skirbi: “Esun ku no ta stima su ruman, ku e ta mira, no por stima Dios, ku e no ta mira.” (1 Huan 4:20) Ademas, nos amor pa Yehova i pa nos rumannan ta konektá ku nos amor pa Beibel. Dikon? Pasobra amor pa e bèrdatnan di Beibel ta motivá nos pa obedesé di kurason e mandamentu di e Skritura pa stima Dios i pa stima nos rumannan.—1 Ped. 1:22; 1 Huan 4:21.

17. Den ki manera asina nos por mustra amor?

¹⁷ Lesa 1 Tesalonisensenan 4:9, 10. Den ki maneranan práktiko nos por mustra amor pa nos rumannan? Kisas un ruman di edat mester di transpòrt pa bai reunion. Òf kisas un biuda mester di yudansa pa drecha algun kos na su kas. (Sant. 1:27) Rumannan ku ta deskurashá òf deprimí òf ku ta pasa den otro pruebanan, sea ku nan ta yòn òf di edat, mester di nos atenshon, animashon i konsuelo. (Pro. 12:25; Kol. 4:11) Nos ta duna prueba ku di bèrdat nos tin amor pa nos rumannan ora nos ta demostrá ku abla i akshon ku nos tin interes profundo “pa ku nos rumannan den fe.”—Gal. 6:10.

18. Kiko lo yuda nos resolvé desakuerdonan chikitu ku nos rumannan?

¹⁸ Beibel a profetisá ku den “e último dianan” di e sistema malbado akí, un spiritu di egoismo i golosidat lo reina. (2 Tim. 3:1, 2) P’esei, komo kristiannan, nos mester traha duru pa sigui krese den amor pa Dios, pa e bèrdatnan di Beibel i pa nos rumannan. Ta bèrdat ku tin biaha nos lo por tin desakuerdonan chikitu ku nos rumannan. Pero, ki un bendishon lo ta pa henter e kongregashon ora nos laga amor motivá nos pa resolvé nos desakuerdonan na un manera pasífiko. (Efe. 4:32; Kol. 3:14) P’esei, hamas nos lo ke laga nos amor fria! Mas bien, laga nos sigui demostrá amor intenso pa Yehova, pa su Palabra i pa nos rumannan.