1919​—Shen Aña Pasá

E tratado a habri kaminda pa un organisashon nobo lanta ku tabata yama Liga di Nashonnan. Meta di e organisashon ei tabata “pa promové kooperashon internashonal i logra pas i siguridat.” Hopi religion supuestamente kristian a apoyá e Liga. Konseho Federal di e Iglesianan di Kristu na Merka a mustra nan apoyo na e Liga bisando ku “e ta un organisashon polítiko ku ta representá e Reino di Dios riba tera.” E konseho ei a manda representante na e Konferensia di Pas di Paris. Un di e representantenan a bisa ku e konferensia “a marka e komienso di un era nobo den historia di mundu.”

I di bèrdat un era nobo tabata kuminsando. Pero, e hendenan responsabel pa esei lo no tabata esnan ku a partisipá na e konferensia di pas. Na 1919, un era nobo a kuminsá pa e trabou di predikashon ora Yehova a duna su pueblo forsa pa prediká manera nunka promé. Pero, promé ku tur kos, un kambio drástiko tabata na kaminda pa Studiantenan di Beibel.

UN DESISHON DIFÍSIL

E elekshon anual di e direktornan di Watch Tower Bible and Tract Society tabata planiá pa djasabra 4 di yanüari 1919. E tempu ei, Joseph F. Rutherford tabata esun ku tabata dirigí e pueblo di Yehova. Pero, Ruman Rutherford huntu ku shete otro ruman hòmber tabata inhustamente será na Atlanta, Merka. Pues, awor e pregunta tabata si mester a reeligí e rumannan ei òf mester a remplasá nan.

Ruman Rutherford tabata preokupá tokante e futuro di e organisashon. E tabata sa ku algun ruman a pensa ku tabata mas mihó pa eligí un otro presidente. P’esei, for di su sèl el a skirbi un karta pa e rumannan presente na e elekshon i a rekomendá Evander J. Coward komo presidente. Den e karta, Rutherford a deskribí Coward komo un ruman “kalmu,” “prudente” i “leal na Señor.” Ma, hopi di e presentenan a preferá di posponé e elekshon pa seis luna. E tim di abogado ku a defendé e rumannan den prizòn a opiná meskos. Segun ku e reunion tabata kana, e ambiente a bira mas tenso.

Richard H. Barber a splika ku djei algu a pasa ku a plakia e situashon. Un di e rumannan presente a tuma palabra i a bisa: “Mi no ta abogado, pero ora ta trata asuntu di lealtat, mi sa kiko esei ta enserá. Loke Dios ta ferwagt ta lealtat. E mihó manera pa demostrá nos lealtat na Dios ta di dal bai ku e elekshon i reeligí Ruman Rutherford komo presidente.”—Sal. 18:25.

Alexander H. Macmillan, kende tambe tabata será, a konta ku e dia despues di e elekshon Ruman Rutherford a bati na muraya di su sèl i bis’é: “Saka bo man.” Rutherford a dun’é un telegram. Macmillan a mira e mensahe kòrtiku i mesora e tabata sa kiko esei tabata ke men. E mensahe a bisa: “RUTHERFORD WISE VAN BARBER ANDERSON BULLY I SPILL DIREKTOR PROMÉ TRESNAN PRESIDENTE STIMA BOSO TUR.” Esei tabata ke men ku a reeligí tur e miembronan di e komité di direktor i ku Joseph Rutherford lo sigui fungi komo presidente i William Van Amburgh komo visepresidente.

NAN A SALI LIBER!

Miéntras e ocho rumannan tabata den prizòn, Studiantenan di Beibel a sirkulá un petishon eksigiendo libertat di e rumannan. E Studiantenan di Beibel fiel ei tabatin hopi kurashi i a kolektá mas ku 700.000 firma. Djárason 26 di mart 1919, promé ku nan por a entregá e petishon, Ruman Rutherford i e shete otro rumannan a sali liber.

Ruman Rutherford a dirigí algun palabra na e hendenan ku a risibié. El a bisa: “Mi ta konvensí ku tur loke a pasa ta pa prepará nos pa tempu mas difísil. . . . Boso lucha no tabata pa saka boso rumannan for di prizòn. Esei tabata djis algu sekundario. . . . Boso lucha a sirbi pa duna testimonio di e Bèrdat, i esnan ku a partisipá den dje a haña un bendishon maravioso.”

E sirkunstansianan relashoná ku e huisio di nos rumannan a indiká ku Yehova tabata dirigí e asuntu. Riba 14 di mei 1919, korte di apelashon a dikta: “E akusadonan den e kaso akí no tabatin e . . . huisio imparsial ku nan tabatin derecho riba dje, i pa e motibu ei lo revoká e sentensia.” A akusá e rumannan di un krímen masha serio i nan lo a keda ku un karchi di kastigu, òf strafblat, si a djis apsolvé òf redusí nan kastigu. Pero, korte a anulá e sentensia. I niun otro akusashon no a ser lantá kontra e rumannan. Komo resultado, Ruman Rutherforda a sigui fungi komo abogado i por a defendé e pueblo di Yehova dilanti Korte Supremo di Merka. I el a hasi esei na vários okashon despues ku el a sali liber.

DETERMINÁ PA PREDIKÁ

Ruman Macmillan a konta: “Nos no tabata pa bai sinta man krusá, wak pariba, wak pabou sperando pa Señor hiba nos shelu. Nos a realisá ku nos mester a hasi algu pa haña sa kiko realmente tabata e boluntat di Señor.”

Pero, e rumannan na Bètel no por a djis reanudá e trabou ku nan tabata hasi pa años. Dikon? Pasobra durante e periodo ku e rumannan tabata será, tur e partinan di e mashin di imprenta ku nan tabata usa a ser destruí. Esei a desanimá e rumannan i algun di nan a puntra nan mes si e trabou di prediká a terminá.

Lo tabatin hende ku ainda tabata interesá den e mensahe di Reino ku Studiantenan di Beibel tabata prediká? Pa kontestá e pregunta ei, Ruman Rutherford a disidí di duna un diskurso. Tur hende tabata bon biní. Ruman Macmillan a bisa: “Si niun hende no a bini na e reunion, e trabou di prediká a terminá.”

E diskurso tabata riba djadumingu 4 di mei 1919. Apesar ku Ruman Rutherford tabata hopi malu, el a duna e diskurso “Speransa pa Humanidat Afligí” na Los Angeles, California. Rònt di 3.500 hende a asistí i sientos di otro no por a drenta ya ku no tabatin lugá. E siguiente dia, 1.500 hende a asistí. E rumannan a haña e kontesta ku nan tabata buska: Ainda hende tabata interesá!

Loke e rumannan a hasi despues a influensiá e trabou di prediká di Testigunan di Yehova te den nos dia.

KLA PA FUTURO KRESEMENTU

E Toren di Vigilansia di 1 di ougùstùs 1919 na ingles, a anunsiá ku na kuminsamentu di sèptèmber lo a tene un kongreso na Cedar Point, Ohio. Un Studiante di Beibel yòn di Missouri ku yama Clarence B. Beaty a konta: “Tur hende a sinti ku nan tabatin ku bai.” Mas ku 6.000 ruman a bai e kongreso ei, un kantidat ku niun hende a spera. Loke a hasi e okashon mas emoshonante ainda tabata ku 200 hende a batisá den Lago Erie.

Riba 5 di sèptèmber 1919, e di sinku dia di e kongreso, Ruman Rutherford a duna su “Diskurso pa Kolaboradónan.” Den e diskurso ei, el a anunsiá un revista nobo ku yama The Golden Age (E Époka di Oro).b Meta di e revista ei tabata pa “trese notisia aktual i importante, dunando splikashon bíbliko dikon e susesonan grandi ei [tabata] pasando.”

Tur Studiante di Beibel a haña animashon pa tene kurashi i usa e revista nobo pa prediká. Un karta ku a duna instrukshon tokante kon pa organisá e obra a bisa: “Laga kada kristian konsagrá [batisá] kòrda riba e gran privilegio ku e tin di sirbi, i probechá awor di e oportunidat di partisipá den duna e gran testimonio na mundu.” Studiantenan di Beibel a reakshoná tremendo. Pa desèmber, e publikadónan zeloso ei a sera mas ku 50.000 abonamènt di e revista nobo.

Pa fin di 1919, e pueblo di Yehova tabata reorganisá i fortalesí. Ademas, vários profesia importante tokante e último dianan a kumpli. E tèst di refinamentu di e pueblo di Dios menshoná na Malakías 3:1-4 a terminá. E pueblo di Yehova a ser librá for di “Babilonia e Grandi” i Hesus a nombra “e esklabo fiel i prudente.”c (Rev. 18:2, 4; Mat. 24:45) Awor, Studiantenan di Beibel tabata kla pa e trabou ku Yehova tabatin pa nan.