Sea Hacidornan—No Djis Tendedornan
1 Cristiannan berdadero awe ta tuma na pechu e animacion bíblico pa ta hacidornan dje palabra, no djis tendedornan. (Sant. 1:22) Esaki ta pone nan na contraste skerpi cu esnan cu, aunke pretendiendo di ta cristian, ta sirbi Dios cu palabra so, no cu echo. (Isa. 29:13) Jesus a declará claramente cu solamente esnan cu ta haciendo e boluntad di Dios lo ser salbá.—Mat. 7:21.
2 Adoracion sin obranan piadoso ta en bano. (Sant. 2:26) Pues nos mester puntra nos mes, ‘Di ki manera mi obranan ta duna prueba cu mi fe ta berdadero? Kico ta mustra cu mi realmente ta biba na armonia cu loke mi ta kere? Con mi por imitá Jesus mas plenamente?’ Contestanan onesto na e preguntanan aki lo yuda nos mira ki progreso nos a haci of ainda mester haci den hacimentu di Dios su boluntad.
3 Como siguidornan di Jesus, nos mester tin den bida e mésun meta principal cu esun expresá dor dje salmista: “Den Dios nos lo ofrecé alabansa henter dia i te na tempu indefiní bo nomber nos lo elogiá.” (Sal. 44:8) Cristianismo ta un moda di biba cu ta manifestá su mes tur dia i den tur cos cu nos ta haci. Ki satisfaccion nos ta haña ora nos ta demostrá den tur nos actividadnan nos deseo sincero pa alabá Jehova!—Fil. 1:11.
4 Dunando Alabansa na Jehova ta Enbolbé Mas cu Hiba un Bida Recto: Si conducta excelente tabata tur loke Dios a rekerí, nos lo por a simplemente concentrá riba refiná nos personalidad. Sin embargo, nos adoracion ta enbolbé tambe declará na tur parti e excelencianan di Jehova i haci declaracion público di su nomber!—Heb. 13:15; 1 Ped. 2:9.
5 E predicacion público dje bon nobo ta un di e obranan di mas importante cu nos ta efectuá. Jesus a dedicá su mes na e obra aki pasobra e tabata sa cu esei a nificá bida eterno pa esnan cu lo a scucha. (Juan 17:3) Awe “e ministerio dje palabra” no ta ménos importante; esei ta e único medio via cua hende por ser salbá. (Echo. 6:4; Rom. 10:13) Siendo conciente dje beneficionan di largu alcanse, nos por comprendé pakico Pablo a amonestá nos pa “predicá e palabra” i pa ‘ta ocupá den dje urgentemente.’—2 Tim. 4:2.
6 Te na ki grado dunando alabansa na Jehova mester ocupá nos bida? E salmista a bisa cu esei tabata den su mente henter dia. Nos no ta sinti mescos? Sí, i nos lo considerá tur contacto cu un otro persona como un posibel ocasion pa papia tocante e nomber di Jehova. Nos lo busca oportunidadnan apropiado pa dirigí nos combersacion den direccion di asuntunan spiritual. Tambe nos lo haci esfuerso pa participá regularmente den actividadnan di sirbishi di veld organisá dor dje congregacion. Esnan kende nan circunstancianan ta permití esei por pensa seriamente riba e sirbishi di pionero, pasobra esaki ta yuda nos pone e trabou di predicá na promé lugá den nos bida diario. E Palabra di Dios ta sigurá nos cu dor di ser hacidornan persistente dje boluntad di Dios, nos lo ta felis.—Sant. 1:25.