Preparacion​—⁠E Clave pa Tin Exito

¹ Preparacion di antemano pa e ministerio lo yuda vence cualkier vacilacion cu un persona por tin tocante participá den e sirbishi di veld. Segun cu bo ta acercá e casnan, lo bo sa kico bo kier bisa e doñonan di cas. Lo bo no tin cu ta temeroso di situacionnan difícil cu lo bo por topa. Despues di bolbe cas for di sirbishi, lo bo sintí bo animá, sabiendo cu bo a haci un bon esfuerso den e ministerio. Sí, preparacion cabal ta e clave pa haci nos abilidadnan di predicá i di siña mas eficas.

² Pablo a enfatisá pa ser prepará dor di insta nos pa tin nos “pianan bistí cu e ekipo dje bon nobo di pas.” (Efe. 6:15) Esaki ta incluí preparando nos mente i curason i tambe adkerí un punto di bista positivo i un actitud dispuesto. Ora nos ta prepará pa compartí e berdad cu otro hende, nos labor lo ser recompensá cu fruta di Reino, haciendo nos felis.​—⁠Echo. 20:35.

³ Con pa Prepará pa e Trabou di Predicá: Nos mester scoge un presentacion cu nos ta sinti nos cómodo cuné, kisas un di esnan sugerí den e buki Razonamiento of di esnan riba e último página di Nos Ministerio di Reino. Pensa cuidadosamente riba e texto bíblico cu bo ta planeá pa usa, determinando ki palabranan of frase bo ta bai enfatisá pa resaltá bo punto principal. No ta necesario pa siña e presentacion for di cabes; mas bien, ta mihó pa haña e idea den mente, pon’é den bo mes palabranan i expres’é den un manera cu bo ta pensa lo atraé bo oyente.

⁴ Examiná e publicacion cu bo ta planeá pa ofrecé i scoge algun punto di combersacion interesante. Scoge algu cu bo ta kere lo interesá e hendenan den bo teritorio. Pensa con lo bo por adaptá bo presentacion pa diferente doño di cas​—⁠un hende homber, un hende muher, un persona di edad of un hóben.

⁵ Bo a purba di tene sesionnan di práctica? Reuní huntu cu miembronan di famia of otro publicadornan pa considerá ki presentacionnan lo por ta eficas i despues ensayá nan na bos haltu di manera cu tur lo tin nan bon na mente. Trata na simulá situacionnan i obhecionnan di bida real cu por ser topá den e teritorio. Tal sesion di práctica lo mehorá bo fluides den papia, aumentá bo eficacia den predicá i edificá bo confiansa.

⁶ Ademas di prepará i practicá bo presentacion, bo mester puntra bo mes, ‘E pañanan cu mi ta planeá pa bisti ta apropiado pa e ministerio? Mi tin loke mi mester den mi tas, incluyendo e literatura cu mi ta planeá pa usa? E ta den bon condicion? Mi tin mi buki Razonamiento, tratadonan, registronan di cas-pa-cas i un pen?’ Planeamentu cuidadoso di antemano lo contribuí na un dia mas productivo den sirbishi.

⁷ Una bes nos a haci lo mihó cu nos por pa prepará nos mes, nos mester pidi den oracion pa Jehova su spiritu yuda nos pa ser exitoso. (1 Juan 5:​14, 15) Dunando atencion cuidadoso na preparacion lo resultá cu nos ta haña mayor goso den nos trabou, segun cu nos ta ‘cumpli cu nos ministerio plenamente.’​—2 Tim. 4:⁠5.