Nunca Nos Tabata Asina Bon Pará Spiritualmente!
1 Mayoria hende ta anhelá e dia cu nan por bisa, “Nunca nos tabata asina bon pará!” Den nan mente, e dia ei lo yega ora nan tin un abundancia di cosnan material, permitiendo nan pa “bai trankil, come, bebe i pasa bon.” (Luc. 12:19) Na contraste, awor aki mes nos por bisa cu den un sentido spiritual, nos no ta faltando nada cu ta bon. (Sal. 34:10) Con esei ta posibel?
2 Proverbionan 10:22 ta declará cu “e bendicion di Jehova—esei ta loke ta haci ricu.” Nos cu ta experenciá tal fabor divino berdaderamente por bisa cu Dios “ta percurá pa nos tur cos ricamente pa nos por disfrutá di nan.” (1 Tim. 6:17) Esaki ta haci nos e hendenan di mas ricu riba tera!
3 Contando Nos Bendicionnan: Poco di nos tin un abundancia di cosnan material. Sin embargo, nos ta bendicioná pasobra nos no ta demasiado anshá tocante nos necesidadnan diario. Jehova sa loke nos tin mester, i e ta primintí di percurá nan. (Mat. 6:31-33) Su siguransa ta duna nos pas mental cu berdaderamente ta preciosísimo.
4 Sin embargo, nos bendicionnan spiritual ta asta mas grandi. Nos bida ta dependé di alimento spiritual for di Jehova. (Mat. 4:4) Esnan cu ta acudí na fuentenan mundano pa sosten spiritual ta keda cu hamber miéntras cu nos ta come i bebe alimento spiritual te keda satisfecho. (Isa. 65:13) E ‘esclabo fiel’ ta duna nos acceso na un suministro inagotabel di conocimentu cu ta hiba na bida eterno.—Mat. 24:45; Juan 17:3.
5 Nos precioso hermandad mundial ta percurá nos cu e compañerismo caluroso di rumannan amoroso bibando den tur parti dje tera. (Juan 13:35) E congregacion local ta un refugio di pas, caminda nos por haña consuelo i refrescamentu. E ancianonan ta cuida nos, yudando nos enfrentá cu hopi clase di problema. (Heb. 13:17) Halando cerca di nos rumannan ta resultá den un intercambio di animacion, fortaleciendo nos pa perseverá.—Rom. 1:11, 12.
6 Asta nos trabou ta un bendicion. Hopi empleo seglar ta laf i no ta duna satisfaccion. Compartiendo e bon nobo ta trece goso na otronan i felicidad na nos mes. (Echo. 20:35) Nos berdaderamente por mira e bon pa tur nos trabou duru.—Ecl. 2:24.
7 Mas cu tur cos, nos tin un maraviyoso speransa pa futuro. (Rom. 12:12) Nos ta mira padilanti na un perfecto mundu nobo di husticia, caminda nos lo biba cu nos stimánan den felicidad i pas pa semper! E speransa aki ta un tesoro cu ta bal mas cu cualkier cos cu e mundu aki tin pa ofrecé.—1 Tim. 6:19.
8 Con Nos Por Demostrá Nos Aprecio? Nunca nos por paga Jehova bek pa loke el a haci pa nos. Nos solamente por expresá nos aprecio dor di (1) gradicié tur dia pa su bondad inmerecí (Efe. 5:20), (2) demostrá nos amor dor di ser obediente (1 Juan 5:3), (3) santificá su nomber dor di predicá e bon nobo (Sal. 83:18) i (4) apoyá e congregacion cristian dor di nos cooperacion di henter curason.—1 Tim. 3:15.
9 Nos tin tur motibu pa ta e hendenan di mas felis riba tera. (Sal. 144:15b) Cu nos actitud, conducta i sirbishi reflehá e goso cu nos ta sinti den nos paradijs spiritual. Nunca nos tabata asina bon pará!