Con pa Haci Disipel cu e Buki Conocimentu

¹ Un meta deseabel pa tur cristian ta pa siña e berdad na otronan i pa haci disipel di esnan cu ta “corectamente dispuesto pa bida eterno.” (Echo. 13:48; Mat. 28:19, 20) Jehova su organisacion a pone den nos man un instrumento maraviyoso pa logra esaki—e buki Conocimentu cu Ta Hiba na Bida Eterno. Su título ta resaltá e gran importancia di studio di Bijbel na cas, pasobra bida eterno ta dependé di gana conocimentu di Jehova, e único Dios berdadero, i di su Yu, Jesucristo.—Juan 17:3.

² E buki Conocimentu ta awor e publicacion principal dje Sociedad pa conducí studionan di Bijbel na cas. Usand’e, nos por siña otro hende e berdad di un manera simpel, cla i den corto tempu. Esaki lo yuda pa yega n’e curason di esnan cu ta ser siñá. (Luc. 24:32) Naturalmente, ta necesario pa e conductor usa bon técnicanan di duna siñansa. Cu e propósito ei, e suplemento aki a ser prepará pa duna sugerencia i recordatarionan relacioná cu métodonan di duna siñansa cu a proba di ta eficas. Usando dicernimentu, i segun circunstancianan individual, lo ta posibel pa bo aplicá progresivamente algun of tur loke ta ser presentá aki. Warda e suplemento aki, i repas’é frecuentemente. Vários punto den dje por yudá bo ser mas eficas den usa e buki Conocimentu pa haci disipel.

³ Conducí un Studio di Bijbel Progresivo: Demostrá un berdadero interes personal den e studiante como un potencial disipel cristian i ruman spiritual. Sea caluroso, amigabel i entusiasmá. Dor di ser un bon scuchador, bo por yega na conocé e otro persona—su antecedente i situacion den bida—locual lo yudá bo dicerní cua ta e mihó manera pa yud’é spiritualmente. Sea dispuesto pa duna di bo mes na fabor dje studiante.—1 Tes. 2:8.

⁴ Una bes un studio ta establecé, ta preferibel pa studia e capítulonan di e buki Conocimentu di dilanti bai patras. Esaki lo permití e studiante haña un comprendimentu progresivo dje berdad, ya cu e buki ta desaroyá tópiconan bíblico den e secuencia mas lógico posibel. Tene e studio simpel i interesante di manera cu e studio ta bai animá i ta avansá. (Rom. 12:11) Dependiendo dje circunstancia i abilidad dje studiante, lo por ta posibel pa bo cubri mayoria capítulo den un solo sesion di un ora i picu, sin pura e studio. Studiantenan lo haci mihó progreso ora tantu e maestro como e studiante ta tene nan n’e cita pa studia tur siman. Pues, cu mayoria persona, lo por ta posibel pa completá e 19 capítulonan dje buki den un lapso di alrededor di seis luna.

⁵ Introducí cada sesion cu comentarionan breve cu ta stimulá interes den e material. Lo bo ripará cu e título di cada capítulo ta su tema, cua tin cu ser enfatisá. Cada subtema ta concentrá riba un punto principal, yudando bo pa keda enfocá riba e tema dje capítulo. Soru pa bo no papia di mas. Mas bien, purba na laga e studiante expresá su mes. Haciendo preguntanan guiador specífico n’e studiante, basá riba loke e sa caba, lo yud’é razoná i yega na conclusionnan corecto. (Mat. 17:24-26; Luc. 10:25-37; mira Guía para la Escuela, página 51, §10.) Pega estrechamente n’e informacion imprimí den e buki Conocimentu. Introduciendo detayenan adicional lo por kita atencion for dje puntonan principal of lo stroba nan sali na cla i lo haci e studio bira mas largu. (Juan 16:12) Si presentá un pregunta cu no tin di haci cu e tópico cu ta ser studiá, den mayoria caso lo bo por contest’é na final dje studio. Esaki lo permití bo cubri e les dje siman ei sin ser desviá. Splica e studiante cu, cu tempu, mayoria di su preguntanan personal lo ser contestá den transcurso dje studio.—Mira Guía para la Escuela, página 94, §14.

⁶ Si e studiante ta kere firmemente den Trinidad, inmortalidad di alma, fiernu di candela of otro doctrinanan falsu asina, i loke ta ser presentá den e buki Conocimentu no ta satisfac’é, lo bo por dun’é e buki Razonamiento of cualkier otro publicacion cu ta trata e tópico. Bis’é cu lo bo considerá e tópico cuné despues cu e pensa riba loke e ta lesa.

⁷ Cuminsando i terminando e studio cu oracion pidiendo pa Jehova su guia i bendicion, ta duna dignidad n’e ocasion, ta pone esnan presente den un estado di ánimo respetuoso, i ta hala atencion na Jehova como e berdadero Maestro. (Juan 6:45) Si e studiante ainda ta usa tabaco, cu tempu lo bo tin cu pidié pa no huma durante e studio.—Echo. 24:16; Sant. 4:3.

⁸ Duna Siñansa Eficasmente Usando e Scritura, Ilustracionnan i Preguntanan di Repaso: Sin importá cuantu biaha e por a studia e material anteriormente, un maestro ábil lo repasá cada les teniendo e studiante en particular na mente. Esaki ta yuda anticipá algun dje studiante su preguntanan. Pa duna siñansa eficasmente, haña un comprendimentu cla dje puntonan principal den e capítulo. Busca e textonan pa mira con nan ta aplicá n’e material, i dicidí cua mester ser lesá durante e studio. Pensa riba con bo por siña usando e ilustracionnan i e preguntanan di repaso na fin dje capítulo.

⁹ Dor di haci uso eficas dje textonan, lo bo yuda e studiante apreciá cu en berdad e ta studiando e Bijbel. (Echo. 17:11) Usando e cuadro “Bira Familiarisá cu Bo Bijbel,” na página 14 dje buki Conocimentu, siñ’é con pa haña e textonan. Mustr’é con pa identificá e versículonan citá den e les, esta ora un texto of porcion dje texto ta aparecé entre comiya. Segun tempu permití, busca i lesa e textonan no-citá; esaki ta ora ta mencioná solamente e buki bíblico, e capítulo i versículo. Laga e studiante comentá riba con e textonan ta apoyá of clarificá loke ta ser bisá den e paragraf. Enfatisá porcionnan clave dje textonan di manera cu e studiante por yega na apreciá e motibunan p’e puntonan principal dje les. (Neh. 8:8) Generalmente, no ta necesario p’e maestro incorporá mas texto den e consideracion cu esnan cu e buki ta duna. Comentá riba e balor di sa e nomber i secuencia dje bukinan di Bijbel. Tal bes ta útil p’e studiante lesa página 27-30 di La Atalaya di 15 di juni, 1991. Ora ta apropiado, animá p’e usa e Traducción del Nuevo Mundo. Progresivamente lo bo por demostrá con pa usa su vários rasgonan, manera e referencianan den márgen i e index di palabranan bíblico.

¹⁰ Studio 34 den e buki Guía para la Escuela del Ministerio Teocrático [na papiamento mira suplemento di Nos Ministerio di Reino di september 1993, pág. 9] ta splica cu ilustracionnan ta stimulá un hende su proceso di pensa i ta hacié mas fácil pa capta pensamentunan nobo. Nan ta haci un apelacion n’e facultad di pensa i a la bes ta haci un impacto emocional, di manera cu e mensahe ta ser transmití cu un forsa cu hopi bes no ta posibel cu djis bisa cu algu ta un echo. (Mat. 13:34) E buki Conocimentu tin cantidad di ilustracionnan instructivo cu ta simpel pero tog poderoso. Por ehempel, un ilustracion usá den capítulo 17 ta desaroyá aprecio p’e manera cu, den un sentido spiritual, Jehova ta percurá cuminda, paña i proteccion mediante e congregacion cristian. E buki Conocimentu su plachinan bunita por ser usá eficasmente pa stimulá emocion. Bou dje subtema “E Resureccion Gososo,” na página 185, lo bo fortalecé e impacto di §18 dor di laga e studiante bai bek n’e plachi na página 86. Esaki por conmov’é na pensa dje resureccion como un realidad bou dje Reino di Dios.

¹¹ Studiantenan di Bijbel tin cu haci progreso spiritual cu cada les. P’e motibu aki, no keda sin haci e preguntanan di repaso den e cuadro “Test Bo Conocimentu” cu ta aparecé na fin di cada capítulo. Wak si e ta duna mas cu djis un contesta corecto di loke a ser studiá. Vários dje preguntanan aki ta diseñá pa saca un reaccion personal for dje curason. Por ehempel, mira página 31, caminda ta puntra e studiante: “Cua cualidadnan di Jehova Dios specialmente ta atraé bo?”—2 Cor. 13:5.

¹² Entrená Studiantenan pa Prepará p’e Studio: Un studiante cu ta lesa e les di antemano, ta marca e contestanan i ta pensa riba con pa expresá nan den su mes palabranan lo haci progreso spiritual mas lihé. Mediante bo ehempel i animacion, bo por entrená e studiante pa prepará p’e studio. Mustr’é bo buki, den cua bo a marca cu ‘highlighter’ of a subrayá e palabranan i frasenan clave. Splik’é con pa haña contesta directo pa e preguntanan imprimí. Preparando un capítulo huntu kisas ta útil p’e studiante. Anim’é pa expresá su mes den su mes palabranan. Solamente e ora ei ta bira cla si e ta comprendé e informacion. Si e ta lesa su contesta for dje buki, bo por stimulá su pensamentu dor di puntr’é con lo e splica e punto ei na un otro hende den su mes palabranan.

¹³ Animá e studiante pa lesa e textonan no-citá como parti di su preparacion semanal, ya cu kisas lo no tin tempu pa lesa nan tur durante e studio. Encomend’é pa e esfuerso cu e ta hinca den su lesnan. (2 Ped. 1:5; mira Toren di Vigilancia di 15 di augustus, 1993, página 13-14, pa sugerencianan adicional en cuanto kico tantu e maestro como e studiante por haci pa mehorá e proceso di siñamentu durante un studio di Bijbel.) Den e manera aki, e studiante ta ser entrená pa prepará i duna comentarionan significativo na reunionnan di congregacion. Lo e ta siñando con pa desaroyá bon custumbernan di studio personal cu lo ekip’é pa sigui haci progreso den e berdad despues cu e completá su studio personal di Bijbel for dje buki Conocimentu.—1 Tim. 4:15; 1 Ped. 2:2.

¹⁴ Dirigí Studiantenan na Jehova Su Organisacion: Ta e responsabilidad di un hacidor di disipel pa dirigí e studiante su interes na Jehova su organisacion. E studiante lo progresá mas lihé na madures spiritual si e ta reconocé i ta apreciá e organisacion i ta realisá e necesidad di bira parti di dje. Nos kier p’e haña placer asociando cu e pueblo di Dios i p’e mira cu anticipacion pa ta huntu cu nos n’e Salon di Reino, caminda e por ricibí e apoyo emocional i spiritual cu e congregacion cristian ta ofrecé.—1 Tim. 3:15.

¹⁵ E foyeto Testigo di Jehova ta haci unidamente e boluntad di Dios den tur e mundo a ser producí pa cera individuonan conocí cu e único organisacion visibel cu Jehova ta usando awe pa cumpli cu su boluntad. Una bes e studio ta establecé, pakico no duna e studiante un ehemplar? For di principio mes, sigui invitá e studiante pa e reunionnan. Splik’é con nan ta ser conducí. Lo bo por bis’é e título di un binidero discurso público of mustr’é e artículo cu lo ser considerá durante e Studio di Toren di Vigilancia. Kisas lo bo por hib’é bai wak e Salon di Reino ora no tin reunion pa asina aliviá cualkier ansiedad cu kisas e tin pa bai na un lugá nobo pa promé biaha. Tal bes bo por ofrecé transportacion pa yega n’e reunionnan. Ora e asistí, lagu’e sinti su mes bon biní i cómodo. (Mat. 7:12) Introducié na otro Testigonan, incluyendo e ancianonan. Nos ta spera cu lo e cuminsá mira e congregacion como su famia spiritual. (Mat. 12:49, 50; Mar. 10:29, 30) Lo bo por pone un meta p’e, por ehempel pa asistí na un reunion tur siman, i progresivamente subi e meta.—Heb. 10:24, 25.

¹⁶ Segun cu den e studio di Bijbel boso ta pasa dor dje buki Conocimentu, enfatisá e partinan cu ta resaltá e necesidad di tin asociacion regular cu e congregacion n’e reunionnan. Tuma nota specialmente di página 52, 115, 137-9, 159, i tambe capítulo 17. Expresá bo propio sintimentunan profundo di aprecio pa Jehova su organisacion. (Mat. 24:45-47) Papia di manera positivo dje congregacion local i tocante loke bo ta siña n’e reunionnan. (Sal. 84:10; 133:1-3) Lo ta bon si e studiante lo por wak cada un dje videonan dje Sociedad, cuminsando cu Los testigos de Jehová... La organización tras el nombre. Pa mas ideanan en cuanto con pa dirigí esnan interesá n’e organisacion, mira La Atalaya di 1 di november, 1984, página 14-18, i e suplemento di Nos Ministerio di Reino di april 1993.

¹⁷ Animá Studiantenan pa Testificá na Otro Hende: Nos meta pa studia cu hende ta pa haci disipel cu ta testificá tocante Jehova. (Isa. 43:10-12) Esei kier men cu e maestro mester animá e studiante pa papia cu otronan tocante loke e ta siñando for di Bijbel. Por haci esaki simplemente dor di puntra: “Con lo bo splica e berdad aki na bo famia?” of “Ki textonan bíblico lo bo usa pa proba esaki na un amigu?” Enfatisá lugánan clave den e buki Conocimentu caminda ta ser animá pa testificá, manera na página 22, 93-5, 105-6, i tambe capítulo 18. Ora ta apropiado, por duna e studiante algun tratado pa usa ora di testificá informalmente na otronan. Sugirié pa invitá su miembronan di famia pa bin sinta durante su studio. E tin amigunan cu tambe lo kier studia? Pidié p’e dirigí bo na esnan cu ta interesá.

¹⁸ Dor di asistí n’e Scol di Ministerio Teocrático i e Reunion di Sirbishi, e disipel prospectivo por ricibí mas entrenamentu i estímulo cu lo yud’é bira un publicador dje bon nobo. Ora e ta expresá un interes den inscribí su mes den e scol of pa bira un publicador no-bautisá, e principionan cu ta ser describí na página 98 i 99 dje buki Nos Ministerio lo ta aplicabel. Si un aspecto di su bida ta previnié di cualificá, bo por busca den e publicacionnan dje Sociedad pa informacion útil cu tin di haber cu e asuntu i compartié cuné. Por ehempel, un studiante tal bes tin dificultad pa vence un adiccion di tabaco of otro droganan. E buki Razonamiento ta duna motibunan bíblico fuerte pakico cristiannan ta evitá custumbernan perhudicial asina, i na página 130 [na ingles página 112] e ta describí un manera cu a proba di ta exitoso den yuda otro hende libra di custumbernan perhudicial. Haci oracion cuné tocante e asuntu, siñand’e pa dependé cada bes mas riba Jehova pa yudansa.—Sant. 4:8.

¹⁹ E procedura cu tin cu sigui pa determiná si un persona ta cualificá pa participá den e ministerio público ta ser describí den e Toren di Vigilancia di 15 di januari, 1996, página 16, §6. Ora e studiante ta cualificá, lo ta útil pa conducí un sesion di práctica pa prepar’é pa su promé dia den sirbishi di veld. Den un manera positivo, considerá e hendenan su reaccion i obhecionnan cu ta comun den bo teritorio. Si ta posibel lagu’é cuminsá promé den e trabou di cas-pa-cas, i progresivamente entren’é den otro rasgonan dje ministerio. Si bo tene bo presentacion corticu i simpel, lo ta fácil p’e imitá esei. Sea edificante i animante, reflehando goso den e trabou, di manera cu e ta ripará bo actitud mental gososo i ta refleh’é. (Echo. 18:25) E meta di un disipel nobo lo mester ta pa bira un publicador regular i celoso dje bon nobo. Kisas bo por yud’é traha un programa práctico pa sirbishi. Pa yud’é progresá den su abilidad di testificá na otronan, bo por sugirié p’e lesa e edicionnan di La Atalaya di 15 di augustus, 1984, página 15-25; 15 di juli, 1988, página 9-20; 15 di januari, 1991, página 15-20; i 1 di januari, 1994, página 20-5.

²⁰ Motivá Studiantenan den Direccion di Dedicacion i Bautismo: Mester ta posibel pa un studiante di curason onrado siña suficiente mediante un studio dje buki Conocimentu pa haci un dedicacion na Dios i cualificá pa bautismo. (Compará cu Echonan 8:27-39; 16:25-34.) Sin embargo, promé cu un persona ser motivá pa haci un dedicacion, e tin cu desaroyá debocion na Jehova. (Sal. 73:25-28) Den transcurso dje studio, busca oportunidadnan pa desaroyá aprecio p’e cualidadnan di Jehova. Expresá bo propio sintimentunan profundo pa cu Dios. Yuda e studiante pensa den direccion di desaroyá un relacion caluroso i personal cu Jehova. Si e realmente yega na conocé i stima Dios, e ora ei lo e sirbi Dios fielmente, pasobra debocion piadoso tin di haci cu e manera cu nos ta sinti pa cu Jehova como un persona.—1 Tim. 4:7, 8; mira Guía para la Escuela, página 76, §11.

²¹ Haci esfuerso pa yega n’e curason dje studiante. (Sal. 119:11; Echo. 16:14; Rom. 10:10) E tin cu mira con e berdad ta afect’é personalmente i dicidí kico lo e mester haci cu loke el a siña. (Rom. 12:2) E realmente ta kere e berdad cu ta ser presentá na dje siman tras siman? (1 Tes. 2:13) Cu e fin ei, bo por saca kico tin den bo studiante dor di haci preguntanan dicernidor di punto di bista, manera: Kico abo ta pensa di esaki? Con bo por aplicá esaki den bo bida? Mediante su comentarionan lo bo por dicerní unda mas yudansa ta necesario pa yega na su curason. (Luc. 8:15; mira Guía para la Escuela, página 52, §11.) E palabranan cu ta compañá e plachinan na página 172 i 174 dje buki Conocimentu ta puntra: “Bo a haci un dedicacion na Dios den oracion?” i “Kico ta strobá bo di ser bautisá?” E preguntanan aki eficasmente por motivá e studiante na accion.

²² E procedura pa sigui ora un publicador no-bautisá ta deseá di ser bautisá ta ser describí den e Toren di Vigilancia di 15 di januari, 1996, página 17, §9. E buki Conocimentu a ser skirbí cu e meta di ekipá e persona pa contestá e seccion di “Pregunta pa Esnan cu Tin Deseo di Bautisá,” hañá den e apéndix dje buki Nos Ministerio, locual e ancianonan lo repasá cuné. Si bo a enfatisá e contestanan n’e preguntanan imprimí den e buki Conocimentu, e studiante lo ta bon ekipá pa e sesionnan di pregunta cu e ancianonan lo tin cuné den preparacion pa su bautismo.

²³ Yuda Esnan Cu Completá e Studio di Bijbel: Ta di spera cu pa ora un persona caba di studia e buki Conocimentu, lo a bira bisto cu e ta sincero i tin un interes profundo pa sirbi Dios. (Mat. 13:23) Ta p’esei e último subtema dje buki ta puntra, “Kico Abo Lo Haci?” E paragrafnan di conclusion ta apelá n’e studiante pa enfocá riba e relacion cu e mester a desaroyá cu Dios, e necesidad pa aplicá e conocimentu cu el a gana, i e necesidad pa actua lihé pa demostrá su amor pa Jehova. No ta haci ningun percuracion pa studia publicacionnan adicional cu esnan cu completá e buki Conocimentu. Di un manera bondadoso i cla splica un studiante cu no ta reaccioná faborablemente n’e conocimentu di Dios loke e tin cu haci pa progresá spiritualmente. Lo bo por keda den contacto cuné periódicamente, lagando e caminda habrí p’e dal e pasonan cu ta hiba na bida eterno.—Ecl. 12:13.

²⁴ Un disipel nobo cu ta aceptá e berdad i ta ser bautisá lo tin cu crece hopi mas ainda den su conocimentu i comprendimentu afin di bira plenamente stabilisá den e fe. (Col. 2:6, 7) En bes di sigui cu su studio di Bijbel na cas despues cu bo completá e buki Conocimentu, bo por haci bo mes disponibel pa duna cualkier yudansa personal cu lo e por tin mester pa asina madurá spiritualmente. (Gal. 6:10; Heb. 6:1) Di su parti, e studiante por completá su comprendimentu dor di lesa Bijbel diariamente, studia E Toren di Vigilancia i otro publicacionnan dje “esclabo fiel” personalmente, prepará pa i asistí n’e reunionnan i considerá e berdad cu compañeronan creyente. (Mat. 24:45-47; Sal. 1:2; Echo. 2:41, 42; Col. 1:9, 10) Ta di vital importancia p’e lesa e buki Nos Ministerio i aplicá loke e ta contené p’e bira teocráticamente organisá pa cumpli cu su ministerio plenamente.—2 Tim. 2:2; 4:5.

²⁵ Desaroyá e Arte di Siña: Nos a ser comisioná pa “haci disipel di hende . . . , siñando nan.” (Mat. 28:19, 20) Siendo cu e arte di siña ta inseparablemente conectá cu hacimentu di disipel, nos kier haci esfuerso pa mehorá como maestronan. (1 Tim. 4:16; 2 Tim. 4:2) Pa sugerencianan adicional en cuanto con pa desaroyá e arte di siña, tal bes bo ta deseá na lesa: “Desaroyando e Arte di Siña” i “Yegando n’e Curason di Bo Oyentenan” den e buki Guía para la Escuela, studionan 10 i 15; “Maestro, Siñansa” den Perspicacia, Volúmen 2 [na ingles “Teacher, Teaching” Volúmen 2]; i e artículonan den La Atalaya “Edificando cu Material cu Ta Resistí Candela” i “Ora Bo Ta Siña, Yega n’e Curason,” 1 di augustus, 1984; “Bo ta Razoná Eficasmente for dje Scritura?,” 1 di mart, 1986; i “Con pa Haña Goso den Hacimentu di Disipel,” E Toren di Vigilancia di 15 di februari, 1996.

²⁶ Segun cu bo ta haci esfuerso pa haci disipel, usando e buki Conocimentu, semper pidi den oracion pa Jehova, esun “cu ta hacié crece,” bendicioná bo esfuersonan pa yega na curasonnan humano cu e bon nobo di Reino. (1 Cor. 3:5-7) Nos ta spera cu bo ta experenciá e goso di siña otronan comprendé, apreciá i actua riba e conocimentu cu ta hiba na bida eterno!