Imitá Jehova dor di Ta Berdaderamente Interesá den Otronan
1 Jehova ta e ehempel di mas grandi di un persona cu ta manifestá berdadero interes den otronan. Como e Soberano Universal, e ta masha conciente i interesá den e necesidadnan di su creacion humano. (1 Ped. 5:7) Jesus a animá su siguidornan pa manifestá e característicanan di su Tata, kende ta laga solo sali i awaceru cai riba hende hustu i inhustu. (Mat. 5:45) Bo por imitá Jehova dor di mustra berdadero interes den otronan—dor di ta cla pa compartí e mensahe di Reino cu tur hende cu bo topa. Dor di ta cabalmente familiarisá cu e foyetonan cu lo ser usá den e ministerio durante juli, lo bo ta den un bon posicion pa ofrecé yudansa spiritual na otronan. E siguiente sugerencianan ta duna algun idea en cuanto con bo por prepará pa e bishita inicial i despues bolbe caminda hende a mustra interes, cu rebishitanan oportuno.
2 Ora di ofrecé e foyeto “Dios Realmente Ta Interesá den Nos?” lo bo por bisa:
◼ “Bo a yega di puntra bo mes pakico Dios ta permití hende sufri si realmente e ta interesá den nan? [Permití contesta.] E foyeto aki no solamente ta duna e contesta satisfactorio n’e pregunta aki, sino tambe ta mustra cu Dios a primintí di eliminá tur e daño cu hende a trece riba su mes i riba su cas terenal.” Lesa §23 na página 27. Mustra e plachi bou di dje i lesa Salmo 145:16 den §22. Ofrecé e foyeto. Si e persona aceptá e foyeto, haci un pregunta cu por ser contestá n’e siguiente bishita, manera: “Lo bo kier sa con Dios lo logra su propósito di trece bendicionnan pa humanidad i transformá e tera den un paradijs?” Sea sigur di mencioná cu nos ta pidi un contribucion p’e foyeto.
3 Ora di bolbe bek cerca esnan cu ken bo a laga e foyeto “Dios Realmente Ta Interesá den Nos?” lo bo por cuminsá un otro consideracion e manera aki:
◼ “Ultimo biaha cu mi a pasa, nos a considerá cu Dios en berdad ta interesá den nos i cu ta su propósito di eliminá tur e daño cu hende a trece riba su mes i riba su cas terenal.” Habri e foyeto n’e plachi na página 2-3 i bisa: “Nos a terminá nos combersacion cu e pregunta, Con Dios lo logra su propósito di trece bendicionnan pa humanidad i transformá e tera den un paradijs? Kico bo ta pensa?” Permití contesta. Bai na página 17, i lesa §2 i Daniel 2:44. Despues di esei, lesa §12 na página 18. Puntra e doño di cas si lo e kier considerá parti 9 dje foyeto. Si e kier, studi’é cuné.
4 Ata aki un introduccion cu lo por ser usá ora di ofrecé e foyeto “Ora un Persona Stimá Muri.” Mustra su portada i bisa:
◼ “Awe nos ta compartiendo e foyeto aki cu a trece consuelo i speransa na miyones di hende cu a perde stimánan den morto. Bo a yega di puntra bo mes ki speransa tin pa e mortonan? [Permití contesta.] Bijbel claramente ta declará Dios su promesa di un resureccion.” Lesa Juan 5:28, 29. Habri e foyeto i comentá riba e puntonan presentá den e último paragraf na página 28 i e promé paragraf na página 31. Mustra e plachinan adhunto. Ofrecé e foyeto. Bo por prepará e caminda pa un rebishita dor di puntra, “Con nos por ta sigur cu, cu tempu, morto lo ser eliminá completamente?”
5 Caminda bo a laga e foyeto “Ora un Persona Stimá Muri,” kisas bo kier usa e presentacion aki na e rebishita:
◼ “Biaha pasá cu nos a papia, nos a considerá e speransa maraviyoso di un resureccion. E foyeto cu mi a laga cu bo ta splica pakico nos por ta sigur cu, cu tempu, morto lo ser eliminá completamente. Bo no a haña e promesanan di Dios consolador i trankilisante?” Permití contesta. Anto bai na página 31 den e foyeto, i lesa e di dos i di tres paragraf, huntu cu Revelacion 21:1-4. Resaltá e prospecto cu nos tin di disfrutá di bida sin muri hamas. Dependiendo dje interes mustrá i e circunstancianan n’e momento ei, bo por ofrecé un studio di Bijbel den e buki Conocimentu of haci un otro pregunta pa habri e caminda pa e siguiente rebishita.
6 Lo bo por bisa lo siguiente ora di presentá e foyeto “¿Qué propósito tiene la vida? ¿Cómo descubrirlo?”:
◼ “Hopi hende a puntra nan mes kico ta e propósito di bida. Nan a puntra nan mes: ‘Pakico mi ta’ki? Unda mi ta bayendo? Kico e futuro tin aden pa mi?’ Unda bo ta kere nos por haña e contestanan? [Permití contesta.] Tuma nota di loke Bijbel ta bisa. [Lesa Salmo 36:9.] No ta razonabel pa concluí cu e Creador di hende ta den e mihó posicion pa splica pakico nos ta’ki? [Permití contesta.] E foyeto aki ta mustra e gran propósito cu Dios tin reservá pa nos.” Bai na página 20-1, lesa e palabranan bou dje plachi, i bisa algu tocante e plachi mes; anto ofrecé e foyeto. Si e persona acept’é, puntra: “Con nos por ta sigur cu ta Dios su propósito ainda pa hende biba pa semper den Paradijs riba tera?” Fiha un ora pa bolbe bek.
7 Si bo a laga e foyeto “¿Qué propósito tiene la vida? ¿Cómo descubrirlo?,” lo bo por bisa algu asina aki ora bo bolbe bek:
◼ “Na mi bishita anterior, realmente mi a disfrutá di considerá cu bo e punto di bista bíblico di cu bida di hende realmente tin un propósito.” Mustra e plachi na página 31 i puntra, “Con nos por ta sigur cu ta Dios su boluntad ainda pa hende biba pa semper den Paradijs riba tera?” Lesa §3 na página 20. Considerá puntonan bou dje subtema, “Ainda Esei Ta e Propósito di Dios,” na página 21. Bai na e kaft patras dje foyeto, i lesa tocante e oferta di un studio di Bijbel grátis na cas. Introducí e buki Conocimentu, i ofrecé pa demostrá con nos ta us’é como un yudansa pa studia e Bijbel.
8 Nos ministerio lo mester reflehá e interes sincero cu nos tin den yuda esnan di curason onrado pa “yega na un conocimentu exacto dje berdad.” (1 Tim. 2:4) P’esei, traha tempu den bo orario di sirbishi pa rebishitá cada persona cerca ken bo a laga un foyeto. Dor di manifestá berdadero interes den nan por resultá cu bo por yuda esnan cu ta suspirando i kehando riba e cosnan detestabel cu ta ser practicá den religion falsu, pa ser identificá pa sobrebibencia. (Eze. 9:4, 6) Lo bo experenciá tambe e goso i satisfaccion cu ta bini di sa cu bo ta imitando Jehova dor di ta berdaderamente interesá den otronan.—Compará cu Filipensenan 2:20.