No Tin Cuenta di Stop di Declará e Bon Nobo

¹ E cristiannan di promé a tuma nan ministerio masha na serio. Lucas a informá: “Tur dia den e tempel i di cas pa cas nan a sigui sin stop siñando i declarando e bon nobo tocante Cristo, Jesus.” (Echo. 5:42) Nada, ni sikiera persecucion, por a stop nan! (Echo. 8:⁠4) Nan a papia cu otro hende tocante e berdad tur dia.

² Ki tal di nos? Puntra bo mes: ‘Mi ta sinti e urgencia dje tempu? Mi ta incliná na sigui declará e bon nobo sin stop?’

³ Ehempelnan Actual di Predicá Sin Stop: Un ruman muher, víctima di polio, tabata restringí den un mashin di hala rosea. E no por a bai Salon di Reino ni asistí na un asamblea. Pero e tabata intensamente ocupá cu declará e bon nobo. Durante e 37 añanan den e mashin, el a logra yuda 17 hende siña e berdad! Con el a haci esei? Aunke e no por a bai di cas pa cas, el a haña tur dia un manera pa duna testimonio informal na esnan cu a bini den contacto cuné.

⁴ Nos rumannan na Bosnia tabatin cu enfrentá guera i scarcedad di promé necesidadnan. No obstante, nan ta sigui predicá regularmente na otronan. Na Sarajevo e publicadornan tin un averahe di 20 ora tur luna papiando cu otronan tocante e bon nobo, i nan ta conducí un averahe di dos studio di Bijbel pa cada publicador. Apesar di nan circunstancianan pertá, nan ta predicá i siña otro hende sin stop.

⁵ Esnan hóben tambe ta manifestá celo pa e ministerio. Un famia di Testigonan na Ruanda a ser poné den un cuarto unda soldatnan a prepará pa mata nan. E famia a pidi permit pa haci oracion promé. Esaki a ser otorgá, i e yu muher chikitu, Deborah, a haci oracion na bos haltu: “Jehova, e siman aki ami cu Papi a laga cincu revista. Con nos ta haci bai bek cerca e hendenan aki pa siña nan e berdad i yuda nan haña bida?” Debí na su fe fuerte i su amor p’e ministerio, henter e famia a ser di spar.

⁶ Awe, ta necesario pa ta alerto pa oportunidadnan pa testificá na otronan i pa busca te haña esnan “corectamente dispuesto pa bida eterno.” (Echo. 13:48) Di acuerdo cu circunstancianan local, ancianonan di congregacion ta haci areglonan pa testificacion den grupo na oranan cumbiniente, sea mainta, atardi of anochi. Artículonan den Nos Ministerio di Reino i partinan den Reunionnan di Sirbishi, asambleanan di circuito i congresonan di districto ta ofrecé sugerencianan i animacion oportuno pa participá den vários rasgo di testificacion di Reino. Ademas di esaki, superintendentenan di circuito i di districto ta entrená publicadornan den testificacion riba caya, ta mustra con pa traha teritorio di negoshi, i ta indicá otro maneranan pa duna un testimonio na cualkier lugá cu por haña hende. Tur esaki ta enfatisá cu no tin cuenta di stop di declará e bon nobo!

⁷ E apostelnan di Jesus a declará cu curashi: “Nos no por stop di papia tocante loke nos a mira i a tende.” Con nan a logra perseverá apesar di tur obstáculo? Nan a pidi Jehova yuda nan, locual el a haci, i “nan tur sin excepcion a ser yená cu spiritu santu i tabata papia e palabra di Dios cu curashi.” (Echo. 4:​20, 29, 31) Tal bes no tur ruman ta ser bendicioná cu experencianan sobresaliente den e ministerio, pero si nos berdaderamente ta deseá na declará e bon nobo sin stop i si nos ta forsa pa haci esei asta riba un base diario, Jehova lo yuda nos.