Predicá e Bon Nobo Tur Caminda

¹ E cristiannan di promé a predicá e bon nobo tur caminda. Nan tabata asina celoso cu dentro di 30 aña despues dje resureccion di Jesucristo, e mensahe di Reino a ser “predicá den tur creacion cu ta bou di shelu.”​—⁠Col. 1:⁠23.

² Jehova su sirbidornan celoso djawe tin e mésun meta, esta, di alcansá tur hende te con leu cu ta posibel cu e bon nobo di Reino. Kico por yuda nos logra e meta aki? Mas i mas hende ta trahando henter dia i hopi bes no ta na cas ora nos pasa. Ora nan no ta trahando, kisas nan ta di biahe, di compra, of participando den un of otro forma di recreo. Con ta alcansando esnan merecedor entre nan cu e mensahe di Reino?​—⁠Mat. 10:⁠11.

³ Ta haña contacto cu algun hende na nan lugá di empleo. Asta pueblonan chikitu tin un seccion di negoshi caminda hopi hende ta mayor parti di dia. Den stadnan grandi, hende cu ta traha den parkenan industrial of edificionan haltu di oficina i esnan cu ta biba den apartamentonan di alta siguridad ta ricibiendo un testimonio​—⁠hopi di nan pa promé biaha. Den fin di siman, algun hende cu e rumannan a topa relahando den parkenan, sitionan di recreo, terenonan pa kampeer, of na ‘weekendhuisnan’ of miéntras nan tabata sperando den lugánan di parkeer of den centronan comercial a resultá di tin un disposicion faborabel pa cu e bon nobo.

⁴ Cada bes mas publicador ta haciendo un esfuerso special pa testificá den lugánan público, na unda cu ta cu por haña hende. Na principio, e Testigonan aki a sinti nan insigur i un poco nervioso debí cu nan a custumbrá di predicá den circunstancianan mas formal, manera di cas pa cas. Con nan ta sinti awor?

⁵ “Esaki a revitalisá mi ministerio!” un ruman homber experenciá den sirbishi di veld a sclama. Un otro ruman ta agregá: “Esaki ta mantené mi atencion enfocá.” Un pionero di mas edad a comentá: “Esaki tabata mentalmente, físicamente i spiritualmente stimulante, . . . i mi ta bai sigui expand’é.” Un publicador ta comentá cu awor e ta alcansando hopi hende cu nunca a papia cu Testigonan di Jehova promé. Hóbennan tambe ta tumando parti entusiasmá den e trabou gososo aki. Un hóben ta expresá su mes asina aki: “Ta dushi pasobra bo ta haña chens di papia cu asina tantu hende.” Un otro hóben ta bisa: “Mi ta lagando mas literatura cu nunca promé!” Tur esaki ta tumando lugá den teritorio cu ta ser trahá bes tras bes.

⁶ Superintendentenan Biahero Ta Hibando e Delantera: Reconociendo cu “e esena dje mundu aki ta cambiando,” Sociedad recientemente a sugerí pa superintendentenan biahero ahustá nan orario di sirbishi di veld di siman pa siman di manera cu por alcansá mas tantu hende posibel cu e bon nobo. (1 Cor. 7:31) Pa añanan, superintendentenan di circuito a apartá maintanan den siman pa participá den e trabou di cas-pa-cas, miéntras cu e atardinan tabata dedicá na haci rebishita i conducí studionan di Bijbel na cas. Den algun área, e orario aki ainda por ta práctico. Den otro áreanan, tal bes poco ta ser lográ trahando di cas pa cas durante cierto dianan di siman. Den casonan asina, e superintendente biahero por dicidí cu trempan den dia lo ta bon pa participá den e trabou di negoshi-pa-negoshi of testificacion riba caya. Of e por haci areglo pa gruponan chikitu testificá den edificionan haltu di oficina, áreanan comercial, lugánan di parkeer, of otro lugánan público. Dor di laga publicadornan haci uso mas eficas dje tempu disponibel pa sirbishi di veld, lo haña contacto cu hopi mas tantu hende.

⁷ Informenan ta indicá cu e ahuste aki tabatin masha bon acohida tantu cerca e superintendentenan biahero como tambe cerca e publicadornan. Un cantidad di cuerpo di anciano a invitá e superintendente di circuito pa entrená un par di publicador den e rasgonan dje trabou cu tin mester di atencion localmente. Tabata útil pa e publicadornan aki compañá e superintendente biahero ora e ta participá den un dje actividadnan aki. Na nan turno, e publicadornan entrená aki, tabata capas pa entrená otronan. (2 Tim. 2:⁠2) Como resultado, awor ta alcansando mas hende cu e bon nobo.

⁸ Naturalmente, bo no tin cu warda te n’e bishita dje superintendente di circuito pa purba algun dje otro maneranan di predicá aki. Ata aki vários idea cu bo por haña práctico den bo teritorio:

⁹ Testificacion Riba Caya: ‘Unda tur hende ta?’ nos ta puntra nos mes tin biaha ora nos ta bishitá áreanan residencial desolá riba un mainta den siman. Algun dje hendenan cu no ta na cas kisas ta haciendo diligencia of ta di compra. Bo a purba alcansá nan via testificacion riba caya? Ora e rasgo aki dje ministerio ser hací manera mester ta, e por ta masha productivo. En bes di para den un lugá cu e revistanan, ta mihó pa acercá hende i cuminsá un combersacion amigabel. No ta necesario pa duna un testimonio na tur hende cu pasa forbij. Papia cu esnan cu no ta purá, manera hende cu ta wak den ‘showcase,’ esnan den autonan stacioná, of hende cu ta warda riba transporte público. Na promé instante bo por simplemente extendé un saludo amigabel i warda riba un reaccion. Si e persona ta dispuesto pa papia, puntra su opinion riba un tópico cu bo ta kere por interes’é.

¹⁰ Un superintendente biahero a invitá seis publicador pa djoin e cu su casá den testificacion riba caya. Cu ki resultado? “Nos tabatin un mainta maraviyoso!” el a informá. “Nos no tabatin e problema di no haña hende na cas. Nos a laga ochenta revista i hopi tratado. Nos tabatin vários combersacion stimulante. Un dje publicadornan, cu pa promé biaha a participá den predicá riba caya, a sclama: ‘Mi ta den e berdad pa años i mi no a realisá loke mi tabata perdiendo!’ Ya pa fin dje siman, tur e cantidad di mas di revista cu e congregacion tabatin a caba.”

¹¹ Sirbiendo e siguiente congregacion, e mésun superintendente biahero a haña sa cu vários publicador a participá den testificacion riba caya un mainta trempan pero nan tabatin masha poco éxito. Un ruman muher a papia cu solamente dos persona durante henter e periodo di testificacion, ya cu tur sobrá hende cu el a topa tabata purando pa yega trabou. E superintendente biahero a sugerí pa nan tur bolbe bek n’e mésun caya un poco mas lat den e mainta. Nan a haci esei, i a keda te diesdos’or di merdia. E ruman muher cu mas trempan den mainta a papia cu solamente dos hende, tabatin hopi mas éxito ora el a bolbe. El a laga 31 revista i 15 foyeto, a haña nomber i adres di shete persona, i a cuminsá dos studio di Bijbel na cas! Otronan den e grupo tabatin resultadonan animador similar.

¹² Ora bo topa un persona cu ta mustra interes, purba obtené e persona su nomber, adres i number di telefon. En bes di puntra direct p’e informacion, lo bo por bisa: “Mi a disfrutá dje combersacion aki. Ta posibel cu nos por sigui cuné na un otro ocasion?” Of puntra: “Ta posibel cu mi por haña contacto cu bo na cas?” Hopi hende cu e rumannan a topa dje manera aki a bai di acuerdo pa ser rebishitá.

¹³ Si bo papia cu un persona interesá cu ta biba den teritorio asigná na un otro congregacion, bo mester pasa e informacion pa nan di manera cu e rumannan ei por sigui traha riba e interes. Testificacion riba caya lo ta un manera eficas pa plama e bon nobo den bo área? Si ta asina, repasá e artículo “Hañando Esnan Interesá Mediante Testificacion Eficas den Caya” den e edicion di juli 1994 di Nos Ministerio di Reino. Anto haci areglo pa participá den testificacion riba caya na un ora di dia oportuno cu lo haci posibel pa bo alcansá mas tantu hende posibel.

¹⁴ Testificando den Transporte Público: Un mainta un cantidad di pionero a dicidí di testificá na hende cu tabata pará ta warda convoi [bus] cerca di un universidad local. Aunke nan tabatin algun combersacion agradabel, tabatin un problema. Pa ora nan tabata meimei dje combersacion, e convoi tabata yega, terminando e combersacion abruptamente. E pioneronan a resolvé e problema dor di subi e convoi i sigui duna testimonio na e pasaheronan segun cu nan tabata biahando te n’e otro punta di stad. Na fin dje ruta, e pioneronan tabata bolbe cu e convoi, testificando den e convoi. Despues di vários biahe bai bini, nan a suma e resultado total di nan esfuersonan: Nan a laga mas cu 200 revista i a cuminsá seis studio di Bijbel. Algun pasahero di nan mes a duna nan adres i number di telefon di manera cu por bishitá nan na cas. E siguiente siman, e pioneronan a bolbe n’e parada di convoi i a sigui e mésun método anterior. Nan a laga 164 revista i a cuminsá un studio bíblico mas. Na un parada un pasahero a subi e convoi i a sinta den e único asiento disponibel​—⁠banda di un pionero. El a wak e ruman homber i a bisa cu un sonrisa: “Mi sa, bo tin un Toren di Vigilancia pa mi.”

¹⁵ Hopi publicador ta duna un testimonio eficas segun cu nan ta biaha cu bus of convoi, trein of avion. Con bo por cuminsá un combersacion cu un pasahero sintá banda di bo? Un publicador di 12 aña simplemente a cuminsá lesa un copia di Spierta! den convoi, sperando di lanta e curiosidad di un mucha muher tiener sintá banda di dje. Esei a sosodé. E mucha muher a puntr’é kico e tabata lesando, i e hóben a contestá cu e tabata lesando tocante e solucion pa problemanan cu hende hóben mester enfrentá. El a agregá cu el a beneficiá mashá dje artículo i cu e artículo lo por yuda e mucha muher tambe. Gustosamente e mucha muher a aceptá e revistanan. Dos otro hóben a tende nan combersacion i tambe a pidi pa ehemplarnan dje revistanan. Cu esaki, e shofer dje convoi a para na cantu di caminda i a puntra pakico tabatin asina tantu interes den e revistanan aki. Ora el a haña sa, e tambe a aceptá algun. Naturalmente, nada di esaki lo tabata posibel si e publicador hóben no tabatin un suministro amplio di revista pa compartí cu tur hende cu a mustra interes!

¹⁶ Testificando den Parke i Lugánan di Parkeer: Testificacion den parke i lugánan di parkeer ta un manera excelente pa alcansá hende. Bo a purba di testificá den e lugá di parkeer di un centro comercial? Semper tuma un par di minuut pa observá bo alrededor. Busca un hende cu no ta purá of un cu ta sperando den un auto stacioná i purba start un combersacion amigabel. Si e combersacion continuá, bini cu e mensahe di Reino. Purba traha bo so pero cu un otro publicador den becindario. Evitá di tin un tas grandi i burusí of di hala atencion di otro manera na bo trabou. Sea discreto. Tal bes ta mihó pa dedicá solamente un tempu corticu den un lugá di parkeer i despues sigui pa un otro. Si un persona no ta deseá na combersá cu bo, cortesmente sigui bo caminda i busca un otro hende pa papia cuné. Usando e métodonan aki, un ruman homber a laga 90 revista den un luna testificando den lugánan di parkeer.

¹⁷ Algun hende ta bai un parke pa relahá; otronan ta bai ei pa hunga un wega of pa pasa tempu cu nan yunan. Sin interferí indebidamente den nan actividadnan, busca un oportunidad pa duna un testimonio. Un ruman homber a cuminsá un combersacion cu e persona encargá pa cuida e parke i a haña sa cu e persona tabata preocupá tocante droga i e futuro di su yunan. E ruman a cuminsá un studio di Bijbel i e tabata ser conducí regularmente den e parke.

¹⁸ Testificacion Informal den Centronan Comercial: Aunke no ta semper posibel pa predicá formalmente di negoshi pa negoshi den centronan comercial debí na restriccionnan local riba actividadnan asina, algun publicador ta crea oportunidadnan pa testificá einan informalmente. Nan ta sinta riba un banki i ta cuminsá un combersacion amigabel cu otro hende cu ta cai sinta pa sosegá. Ora e persona mustra interes, nan discretamente ta ofrecé un tratado of un revista i ta purba haci areglo pa un rebishita. Despues di dedicá un par di minuut testificando den un seccion dje centro comercial, nan ta sigui pa un otro seccion i ta cuminsá un combersacion cu otro hende. Naturalmente, nos mester tene cuidou pa no hala indebido atencion ora di testificá informalmente den e manera aki.

¹⁹ Ora di cumindá un persona, cuminsá e combersacion den un forma amigabel. Si bo oyente reaccioná faborablemente, haci un pregunta, anto scucha atentamente segun cu e ta expresá su mes. Demostrá un interes personal den loke e ta bisando. Mustra cu bo ta considerá su opinion como importante. Caminda ta posibel, bai eens cuné.

²⁰ Un ruman muher tabatin un combersacion agradabel cu un señora di mayor edad dor di mencioná con haltu costo di bida a bira. E señora unbes a bai di acuerdo, i esei a hiba na un combersacion animá. Tabata posibel p’e ruman muher haña nomber i adres dje señora, i e mésun siman ei el a rebishit’é.

²¹ Trahando di Negoshi pa Negoshi: Algun congregacion tin áreanan di negoshi como parti di nan teritorio asigná. E ruman homber encargá cu teritorio por prepará karchinan special cu mapa dje seccionnan aki hopi concentrá cu negoshi. Cualkier mapa di teritorio residencial cu tin seccionnan di negoshi den nan mester indicá claramente cu e negoshinan no tin cu ser trahá como parti dje teritorio. Den otro teritorionan, lugánan di negoshi por ser trahá huntu cu e residencianan. E ancianonan por invitá publicadornan cualificá pa traha e teritorionan di negoshi riba un base regular di manera cu e trabou di negoshi-pa-negoshi no ta ser neglishá.

²² Si bo ser invitá pa participá den e trabou aki i nunca promé bo a hacié, un bon manera pa “cobra ánimo” ta pa traha un par di negoshi chikitu promé; anto, ora bo sinti mas confiansa, traha esnan mas grandi. (1 Tes. 2:⁠2) Ora di traha di negoshi pa negoshi, bisti mescos cu ora bo ta asistí na un reunion na Salon di Reino. Si ta posibel, drenta den e negoshi ora no tin cliente ta warda pa ser yudá. Pidi pa papia cu e manager of cu e persona encargá. Sea caluroso, i mas cu tur cos, sea breve. No ta necesario pa tin un actitud di ta lihé pa pidi dispensa. Hopi negoshi ta orientá riba cliente i nan sa cu nan por spera interupcion.

²³ Despues di saludá un doño di negoshi, lo bo por bisa esaki: “Hende di negoshi hopi bes ta asina ocupá cu masha poco biaha nos ta topa nan na cas, di manera cu nos ta bishitando bo aki na bo lugá di negoshi pa laga cu bo un artículo pa bo lesa cu ta duna material pa pensa ariba.” Anto duna un of dos comentario tocante un dje revistanan cu ta ser ofrecé.

²⁴ Of lo bo por purba esaki ora di acercá un manager: “Nos a ripará cu hende di negoshi ta trata na keda bon-informá. E edicion mas recien di E Toren di Vigilancia (of Spierta!) ta presentá un artículo cu ta afectá nos tur personalmente.” Splica kico esei ta, i concluí bisando: “Nos ta sigur cu lo bo disfrutá di les’é.”

²⁵ Si tin empleadonan, i ta parce apropiado, lo bo por agregá: “Lo bo tin algu contra si mi duna e mésun presentacion breve na bo empleadonan?” Si e duná bo permit, corda cu bo a primintí di ta breve, i e manager lo spera di bo cu lo bo tene bo mes na bo palabra. Si cualkier empleado ta deseá di bai den un discusion largu, lo ta mihó pa bishit’é na cas.

²⁶ Recientemente, un par di publicador den un pueblo chikitu a djoin e superintendente di circuito den e trabou di negoshi-pa negoshi. Algun dje publicadornan tabata un poco temeroso na principio, ya cu nunca nan no a haci e trabou ei promé; pero pronto nan a relahá i a cuminsá disfrutá di dje. Den ménos cu un ora, nan a papia cu 37 hende i a laga 24 revista i 4 foyeto. Un dje ruman hombernan a remarcá cu normalmente lo no tabata posibel pa nan haña contacto cu asina tantu hende den un luna di traha di cas-pa-cas manera nan a topa trahando di negoshi pa negoshi den e tempu corticu ei.

²⁷ Creando Oportunidadnan pa Predicá: Jesus no a limitá su testificacion na circunstancianan formal so. El a plama e bon nobo na tur ocasion apropiado. (Mat. 9:9; Luc. 19:​1-10; Juan 4:​6-15) Tuma nota con algun publicador ta creando oportunidadnan pa predicá.

²⁸ Algun publicador ta hacié un custumber pa predicá na mayornan cu ta sperando pa nan yunan cerca dje entrada di scol. Ya cu hopi mayor ta yega te cu 20 minuut promé cu scol caba, tin tempu pa enbolbé nan den un combersacion stimulante riba un tópico bíblico.

²⁹ Hopi pionero ta conciente pa alcansá hende cu por tin un interes special den un tópico en particular cu ta ser tratá den nos revistanan. Por ehempel, un ruman muher a haña bon reaccion bishitando seis scol den e teritorio di su congregacion cu e serinan “Scolnan den Crísis,” cu a aparecé den e ¡Despertad! di 22 di december, 1995. Tambe el a bishitá servicionan di gobiernu di asuntunan social cu revistanan en cuanto bida di famia i abusu di mucha i a ser invitá pa sigui trece futuro edicionnan cu ta trata cu tópiconan similar. El a describí e reaccion cu el a ricibí na e oficina di desempleo relacioná cu e Spierta! di 8 di mart en cuanto desempleo, como “impresionante.”

³⁰ Un superintendente di districto ta informá cu e i su esposa regularmente ta testificá informalmente segun cu nan ta cumprando comestibel. Nan ta bai di compra n’e ora di dia cu e tienda no tin demasiado hende, i e clientenan ta canando trankilamente entre e gangnan dje rekinan di producto. Nan ta informá di hopi combersacionnan excelente.

³¹ Hopi publicador ta informá bon resultadonan di testificá na hende den waserètnan público. Nan no ta simplemente laga revista ora no tin ningun hende ei. Nan meta ta di alcansá hende cu e bon nobo, pues nan ta purba di papia personalmente cu esnan cu ta usando e facilidadnan.

³² Den algun localidad, publicadornan selectá tin autorisacion pa predicá na aeropuertonan. Tin biaha, nan tabatin e goso di a testificá na biaheronan internacional cu ta biba den paisnan caminda e pueblo di Jehova ta poco na cantidad. Ora nan a topa personanan interesá, nan a ofrecé un tratado of e revistanan.

³³ Si no ta ser permití pa testificá personalmente na habitantenan di apartamentonan di alta siguridad den e teritorio dje congregacion, algun publicador a hacié un custumber pa testificá cu tacto na e guardianan di siguridad cu tin na warda of n’e managernan den e oficinanan cu ta huur e apartamentonan. E mésun método ta ser usá den áreanan di bibienda cu ta privá i cerá cu portanan di siguridad. Un superintendente di circuito i un par di publicador a bishitá shete compleho di apartamento den e manera aki. Den tur caso, nan e bisa e manager cu aunke no tabata permití pa nan bishitá e apartamentonan den nos manera usual, nan no tabata kier pa e perde e informacion den e revistanan di mas recien. Managernan na tur e shete complehonan gustosamente a aceptá e revistanan i a pidi p’e siguiente edicionnan tambe! Por tuma contacto cu e residentenan di complehonan asina via telefon. Lo bo haña informacion práctico riba e tema di testificacion via telefon den e suplemento “Testificacion via Telefon​—⁠Un Manera pa Alcansá Hopi Hende” den Nos Ministerio di Reino di augustus 1993.

³⁴ Haci Esfuerso pa Predicá Tur Caminda: Cumpli cu nos dedicacion ta incluí tin un sintimentu di urgencia pa cu nos asignacion di predicá e mensahe di Reino. Afin di alcansá hende na un ora cu ta cumbiní nan, nos tin cu pone un banda nos preferencianan personal di manera cu nos “di tur manera por salba algun.” Tur sirbidor dedicá di Jehova lo kier por bisa, manera apostel Pablo: “Mi ta haci tur cos pa causa dje bon nobo, pa mi por bira un participante di dje cu otronan.”​—⁠1 Cor. 9:​22, 23.

³⁵ Pablo a skirbi mas aleu: “P’esei, cu muchu gustu mi ta preferá di gaba en cuanto mi debilidadnan, p’e poder di Cristo por keda riba mi manera un tent. . . . Pasobra ora mi ta swak, e ora ei mi ta poderoso.” (2 Cor. 12:​9, 10) Cu otro palabra, ningun di nos lo por efectuá e trabou aki riba nos mes forsa. Nos tin cu pidi Jehova den oracion pa su poderoso spiritu santu. Si nos ta pidi Dios den oracion pa fortalesa, nos por tin sigur cu lo e contestá nos oracionnan. Anto nos amor pa hende lo impulsá nos pa busca oportunidadnan pa predicá e bon nobo na nan, na unda cu ta cu por haña nan. Durante e siman binidero, pakico no purba un dje sugerencianan presentá den e suplemento aki?