Bo Ta Manehando e Palabra di Dios Corectamente?
1 Jesucristo tabata e maestro di mas grandi cu a yega di biba riba tera. El a papia den un manera cu a toca hende su curason, a conmové nan emocionnan i a motivá nan na practicá bon obra. (Mat. 7:28, 29) Semper el a usa e Palabra di Dios como e base pa su siñamentu. (Luc. 24:44, 45) El a duna Jehova Dios e mérito pa tur loke e tabata sa i por a siña otronan. (Juan 7:16) Jesus a pone un ehempel excelente pa su siguidornan dor di manehá e Palabra di Dios corectamente.—2 Tim. 2:15.
2 Apostel Pablo tambe a sirbi como un ehempel sobresaliente dor di manehá e Palabra di Dios eficasmente. El a haci mas cu djis lesa e Scritura pa otro hende; el a splica i a razoná riba loke el a lesa, presentando prueba for dje Palabra di Dios cu Jesus tabata e Cristo. (Echo. 17:2-4) Di igual manera, e disipel elocuente Apólos, tabata “bon versá den e Scritura,” i el a maneh’é corectamente dunando un presentacion convincente dje berdad.—Echo. 18:24, 28.
3 Sea un Maestro dje Palabra di Dios: Proclamadornan di Reino di tempu actual tabatin excelente éxito den siña hende di curason onrado dor di referí n’e Bijbel i razoná for di dje. Den un caso, tabata posibel pa un ruman homber usa Ezekiel 18:4 i otro textonan relacioná pa razoná cu un pastor i tres di su parokianonan riba e destino di hende malbado i di hende hustu. Como resultado, algun miembro dje iglesia a cuminsá studia i un di nan cu tempu a aceptá e berdad. Den un otro caso, a ser pidí na un ruman muher pa splica n’e esposo opositor di un persona interesá pakico Testigonan di Jehova no ta celebrá Pascu ni cumpleaño. Segun cu e ruman muher tabata lesa e contestanan bíblico directamente for dje buki Razonamiento, e homber tabata expresá cu e tabata di acuerdo. E esposa a keda asina contentu cu su casa a aceptá e contestanan aki cu e esposa a bisa: “Nos lo bini boso reunionnan.” I e esposo a bai di acuerdo!
4 Usa e Yudansa cu Tin Disponibel: Nos Ministerio di Reino i e programa di Reunion di Sirbishi ta ofrecé guia excelente pa yuda nos den manehá e Palabra di Dios. Hopi publicador a expresá aprecio pa e variedad di presentacionnan sugerí cu ta ser publicá i demostrá pa nos beneficio i cu a proba di ta masha oportuno i eficas. Razonamiento a partir de las Escrituras ta contené un abundancia di idea en cuanto con pa elaborá corectamente riba mas cu 70 tema principal cu ta ser tratá den e Palabra di Dios. Conocimentu cu Ta Hiba na Bida Eterno ta percurá un resúmen breve di tur e siñansanan bíblico fundamental cu esnan nobo tin cu comprendé. Studionan 24 i 25 den e buki Guía para la Escuela del Ministerio Teocrático ta mustra nos con maestronan ábil ta introducí, lesa i aplicá textonan corectamente. Nos mester haci bon uso di tur e yudansa aki cu ta fácilmente disponibel pa nos.
5 Ora nos ta manehá e Palabra di Dios corectamente, nos lo ripará cu e “ta bibu i ta ehercé poder . . . i ta capas pa dicerní pensamentu i intencion dje curason” di esnan na ken nos ta predicá. (Heb. 4:12) E éxito cu nos tin cu e Palabra di Dios lo impulsá nos pa papia e berdad cu asta mas frankesa!—Echo. 4:31.