Inscripcion den Scol di Ministerio Teocrático

¹ E Scol di Ministerio Teocrático tabata principalmente responsabel p’e entrenamentu di miyones di Testigo di Jehova como minister dje bon nobo. Hopi di nos ta corda con temeroso i inadecuá nos a sinti ora nos na principio a inscribí den e scol aki, i awor cu gratitud nos ta reconocé su papel den nos desaroyo spiritual como orador i maestro dje Palabra di Dios. (Compará cu Echonan 4:13.) Abo a inscribí den e scol único aki?

² Ken por inscribí? Página 73 dje buki Organisá pa Cumpli cu Nos Ministerio ta contestá: “Tur cu ta asociá activamente cu e congregacion por inscribí, incluyendo hende cu recientemente ta asistiendo n’e reunionnan, tanten cu nan no ta hiba un bida cu no ta na armonia cu principionan cristian.” Nos ta invitá tur cu ta cualificá​—⁠hende homber, muher i mucha​—⁠pa bai cerca e superintendente di scol i pidié inscribí bo.

³ Programa di Scol pa 1997: E programa pa Scol di Ministerio Teocrático pa 1997 ta abarcá un variedad amplio di siñansa bíblico. Ademas di yuda desaroyá nos abilidadnan oratorio i di duna siñansa, nos ta siña for dje hopi hoyanan spiritual cu ta ser hañá den e programa dje scol tur siman. (Pro. 9:⁠9) Si nos prepará p’e scol, locual ta incluí haci e lesamentu semanal di Bijbel, i ta regularmente presente, nos por saca gran beneficio spiritual for dje programa.

⁴ Pa 1997 mayor parti dje lesamentu di Bijbel pa Parti Num. 2 ta mas corticu cu den añanan anterior. Ora di prepará pa e asignacion aki, e studiante mester midi e tempu di su lesamentu cuidadosamente i e ora ei determiná cuantu dje cincu minuutnan asigná pa su parti por ser usá den e introduccion i e conclusion. Esaki lo permití e studiante utilisá su tempu plenamente i pa desaroyá tantu su abilidad di lesa como e arte di papia sin manuscrito.​—⁠1 Tim. 4:⁠13.

⁵ Testificacion informal a ser agregá como un posibel marco di circunstancia pa Parti Num. 3, cua ta basá riba e buki Conocimentu. Pues, un ruman muher por scoge sea un rebishita, un studio di Bijbel na cas of testificacion informal como e marco di circunstancia pa e asignacion aki. Naturalmente, mester sigui pone e énfasis principal riba dunamentu di siñansa eficas i no riba e marco di circunstancia.

⁶ Sea bo tin e privilegio di duna e discurso di instruccion, puntonan sobresaliente di Bijbel of un parti di studiante, bo por mustra aprecio p’e Scol di Ministerio Teocrático dor di prepará i ensayá bo parti bon, dor di present’é cu conviccion i entusiasmo, dor di no pasa e tempu asigná, dor di scucha na e conseho dje superintendente di scol i aplik’é, i dor di semper haci bo esfuerso pa cumpli cu bo asignacion fielmente. Dje manera ei bo inscripcion den e scol lo resultá di ta un bendicion tantu pa bo como pa tur esnan presente.