BIBLIOTEKA ONLINE Watchtower
Watchtower
BIBLIOTEKA ONLINE
Papiamentu (Kòrsou)
  • BEIBEL
  • PUBLIKASHON
  • REUNION
  • km 3/97 pág. 3-6
  • Tuma un Curashi pa Haci Rebishita

No tin vidio disponibel pa esaki.

Despensa, tin un problema pa habri e vidio.

  • Tuma un Curashi pa Haci Rebishita
  • Nos Ministerio di Reino—1997
  • Informashon Similar
  • Rebishita Ta Hiba na Studio di Beibel
    Nos Ministerio di Reino—2003
  • Ta Busca—Mas Studio di Bijbel
    Nos Ministerio di Reino—1998
  • Dependé Riba Jehova pa Haci Cosnan Crece
    Nos Ministerio di Reino—1997
  • Parti 11: Kon pa Kondusí Estudio di Beibel Progresivo
    Nos Ministerio di Reino—2005
Mas Artíkulo
Nos Ministerio di Reino—1997
km 3/97 pág. 3-6

Tuma un Curashi pa Haci Rebishita

1 Bo ta gusta haci rebishita? Hopi publicador ta gusta. Tal bes bo tabatin poco miedu na principio, specialmente ora di rebishitá doñonan di cas cu a mustra solamente poco interes ora a papia cu nan n’e promé bishita. Pero segun bo ta ‘tuma un curashi mediante nos Dios pa papia e bon nobo’ ora di haci rebishita, kisas lo ta un sorpresa pa bo ora bo nota con fácil i recompensador e trabou aki por ta. (1 Tes. 2:2) Con asina?

2 En realidad, tin un diferencia importante entre un rebishita i e bishita inicial. E rebishita ta ser hací cerca un conocí, no un hende desconocí, i generalmente ta mas fácil pa combersá cu un conocí cu combersá cu un hende desconocí. Pa loke ta e recompensanan ricu cu ta resultá dor di participá den e trabou aki, rebishitanan por hiba na studionan di Bijbel productivo.

3 Ora nos ta traha di cas pa cas, nos ta yama bes tras bes na porta di hendenan cu no tabata interesá ora nos a bishitá nan anteriormente. Pakico, anto, nos ta sigui pasa? Nos ta realisá cu hende su circunstancianan ta cambia i cu un persona cu a parce indiferente, of asta contra, na un bishita anterior por ta interesá e siguiente biaha cu nos pasa. Cu esei na mente, nos ta prepará bon i ta pidi den oracion pa Jehova su bendicion pa e biaha aki nos bisa algu cu lo causa un reaccion faborabel.

4 Si, den nos trabou di cas-pa-cas, nos ta predicá gustosamente na hende cu anteriormente no a mustra niun tiki interes, nos no mester rebishitá asta mas gustosamente un persona cu ta mustra algu di interes den e mensahe di Reino?—Echo. 10:34, 35.

5 Hopi di nos ta den e berdad awe pa motibu cu un publicador tabatin e pacenshi di rebishitá nos. Si bo ta un hende cu a haña e berdad asina, bo por puntra bo mes: ‘Ki impresion inicial mi a haci riba e publicador ei? Mi a aceptá e mensahe di Reino mesora ora mi a tend’é pa promé biaha? Por ta cu mi a parce indiferente?’ Nos mester ta contentu cu e publicador cu a pasa bek a haña cu nos tabata digno di un rebishita, a ‘tuma un curashi pa medio di Dios,’ a haci e rebishita i a procedé na siña nos e berdad. Kico di e personanan cu na promé instante ta mustra algu di interes pero despues ta parce di evitá nos? Un actitud positivo ta vital, manera e siguiente experencia ta ilustrá.

6 Testificando den caya un mainta trempan, dos publicador a topa un señora hóben pushando un garoshi di baby. E señora a tuma un revista i a invitá e rumannan pa bini su cas e siguiente diadomingo. Nan a yega na e ora palabrá, pero e doño di cas a bisa nan cu e no tabatin tempu pa papia. Sin embargo, el a primintí di ta disponibel e siguiente siman. E ruman muhernan tabata duda cu lo e tene su mes n’e afsprak, pero e señora tabata wardando riba nan ora nan a bolbe bek. Nan a cuminsá un studio, i e progreso dje señora tabata asombroso. Den poco tempu, el a cuminsá asistí regularmente n’e reunionnan i participá den sirbishi di veld. Awor e ta bautisá.

7 Pone Fundeshi n’e Bishita Inicial: E fundeshi pa un rebishita exitoso hopi bes ta ser poné n’e bishita inicial. Scucha cuidadosamente e comentarionan dje doño di cas. Kico nan ta bisá bo? E tin inclinacion religioso? E ta preocupá cu cuestionnan social? E ta interesá den ciencia? historia? e medio ambiente? Na fin di bo bishita, bo por plantia un pregunta cu ta stimulá pensamentu i primintí di considerá e contesta bíblico ora bo bolbe bek.

8 Por ehempel, si e doño di cas ta reaccioná faborablemente n’e Bijbel su promesa di un tera paradísico, por ta apropiado pa tene un consideracion mas aleu riba e tópico ei. Djis promé cu bo bai, lo bo por puntra: “Con nos por ta sigur cu Dios lo cumpli cu e promesa aki?” Anto agregá: “Kisas mi por pasa ora e resto dje famia ta na cas, anto mi por mustra boso e contesta di Bijbel n’e pregunta aki.”

9 Si e doño di cas no a mustra interes den ningun tópico en particular, lo bo por plantia un dje preguntanan cu ta bin padilanti den e presentacionnan parti patras di Nos Ministerio di Reino i usa esei como e base pa bo siguiente consideracion.

10 Tene Registronan Skirbí Exacto: Bo registro di cas-pa-cas mester ta exacto i completo. Skirbi e nomber i adres dje doño di cas asina cu bo sali for dje cas. No rei kico e number di cas of e nomber dje caya lo ta—chek e informacion pa bo ta sigur cu e ta exacto. Skirbi un descripcion dje persona. Haci un nota dje tópico cu bo a considerá, e textonan cu bo a lesa, cualkier literatura cu bo a laga i e pregunta cu lo bo contestá ora bo bolbe bek. Incluí dia i ora dje bishita inicial i ki dia i ora bo a bisa cu lo bo bolbe bek. Awor cu bo registro ta completo, no perd’é! Ward’é den un lugá sigur di manera cu bo por referí na dje despues. Keda pensa riba e persona i con lo bo trata e rebishita e siguiente biaha.

11 Sa Kico Bo Metanan Ta: Promé, dor di ta caluroso i amigabel, haci bo best pa laga e doño di cas sintié cómodo. Mustra cu bo ta interesá den dje como persona, sin ser indebidamente familiar. Siguientemente, record’é di cualkier pregunta cu bo a plantia na e bishita anterior. Scucha cuidadosamente na su opinion, i expresá aprecio sincero pa su comentarionan. Caba, mustra pakico e punto di bista bíblico ta práctico. Si ta posibel, dirigié na un pensamentu relacioná cu esei den e buki Conocimentu cu Ta Hiba na Bida Eterno. Tene bon na mente cu bo meta principal na rebishitanan ta pa cuminsá un studio di Bijbel.

12 E manera direct dje buki Conocimentu a inspirá hopi di nos pa ‘tuma un curashi’ na studionan di Bijbel pa animá studiantenan pa asistí n’e reunionnan i asociá cu e organisacion di Jehova. Den pasado, nos tabatin tendencia di warda te ora cu personanan a studia pa basta tempu promé cu nos invitá nan pa asociá cu nos. Awor, hopi studiante ta asistiendo n’e reunionnan asina cu nan cuminsá studia, i como resultado nan ta progresando muchu mas lihé.

13 Un pareha a testificá informalmente na un colega. Ora el a expresá interes den e berdad, nan a invit’é pa tin un studio di Bijbel for dje buki Conocimentu. Na mésun tempu, nan a bis’é cu e mester asistí n’e reunionnan, caminda hopi di su preguntanan lo ser contestá. E homber no solamente a aceptá gustosamente nan invitacion pa un studio, sino tambe tabata studia dos bes pa siman i a cuminsá asistí n’e reunionnan na Salon di Reino regularmente.

14 Usa e Foyeto Kico Dios Ta Rekerí di Nos?: Na e Congresonan di Distrito “Mensaheronan di Pas Divino,” nos a ricibí e foyeto Kico Dios Ta Rekerí di Nos? E foyeto aki ta útil pa cuminsá studionan di Bijbel cu personanan temeroso di Dios sin importá nan nivel di educacion. E ta contené un curso completo di studio di Bijbel, abarcando e siñansanan básico di Bijbel. E publicacion aki lo ta un herment masha eficas pa compartí e conocimentu di Dios. E ta splica e berdad asina cla i simpel cu prácticamente cada un di nos lo por us’é pa siña otro hende e rekisitonan di Dios. Probablemente, hopi publicador lo tin e privilegio di conducí un studio di Bijbel for dje foyeto aki.

15 Algun persona cu ta haña cu nan no tin tempu pa studia e buki Conocimentu tal bes ta dispuesto pa tene sesionnan breve studiando e foyeto Rekerí. Nan lo keda encantá cu loke nan ta siña! Den solamente dos of tres página, nan lo haña contesta pa preguntanan cu hende pa siglonan a pensa hopi ariba: Ken Dios ta? Ken e Diabel ta? Kico ta Dios su propósito pa e tera? Kico ta e Reino di Dios? Con bo por haña e religion berdadero? Aunke e foyeto ta presentá e berdad usando palabranan simpel, su mensahe ta masha poderoso. E ta abarcá puntonan clave cu e ancianonan lo repasá cu candidatonan pa bautismo i por sirbi como un trampolin pa un studio mas cabal for dje buki Conocimentu.

16 Pa ofrecé un studio durante un rebishita, bo por simplemente bisa: “Bo tabata sa cu dor di tuma djis un par di minuut, bo por haña e contesta pa un pregunta importante di Bijbel?” Anto, haci un pregunta cu ta aparecé na principio di un dje lesnan den e foyeto. Por ehempel, si bo ta bishitando un persona di mas edad, lo bo por bisa: “Nos sa cu den pasado Cristo a cura hende. Pero den futuro, kico Jesus lo haci pa hende enfermo? hende bieu? e mortonan?” Ta haña e contestanan den les 5. Un persona cu inclinacion religioso tal bes ta keda fasiná cu e pregunta: “Dios ta scucha tur oracion?” E ta ser contestá den les 7. Miembronan di famia lo kier sa: “Kico Dios ta rekerí di mayornan i di yunan?” Nan lo haña sa esei segun cu nan studia les 8. Otro preguntanan ta: “E mortonan por haci daño na e bibunan?” splicá den les 11; “Pakico tin asina tantu religion cu ta afirmá di ta cristian?” considerá den les 13; i “Kico bo mester haci pa bira un amigu di Dios?” abarcá den les 16.

17 Yuda Esnan Cu Ta Papia un Otro Idioma: Kico di doñonan di cas cu ta papia un otro idioma? Si ta posibel, mester siña nan den e idioma cu nan conocé mas mihó. (1 Cor. 14:9) E superintendente di ciudad (of riba e islanan, e superintendente di circuito) lo por duna informacion relacioná cu congregacion i gruponan di idioma stranhero den e área. E secretario e ora ei lo por manda cualkier Papel di Adres di Otro Idioma pa Bishitá (S-70) cu e ta ricibí for dje miembronan di congregacion na e debido congregacion of grupo di idioma stranhero. Si no tin ningun congregacion of grupo cerca i no tin publicadornan local cu por papia e idioma dje doño di cas, e publicador por purba studia cu e doño di cas, usando e foyeto Rekerí den e dos idiomanan.

18 Un publicador di abla ingles a cuminsá un studio cu un homber cu ta papia vietnames i cu su casá, kende ta papia tai. Publicacionnan i Bijbelnan na ingles, vietnames i tai tabata ser usá durante e studio. Aunke e barera di idioma tabata un desafio na principio, e publicador ta skirbi: “E pareha su crecementu spiritual tabata inmediato. Nan a mira e necesidad di cuminsá asistí n’e reunionnan cu nan dos yunan, i nan ta lesando e Bijbel tur anochi como famia. Nan yu muher di seis aña ta conducí su mes studio di Bijbel.”

19 Ora di studia cu hende cu ta papia un otro idioma, papia slow, articulá claramente i usa palabra i frasenan simpel. Sin embargo, corda cu mester trata hende cu ta papia un otro idioma cu dignidad. No mester trata nan como si fuera nan ta mucha chikitu.

20 Haci bon uso dje bunita plachinan dje foyeto Rekerí. Si “un plachi ta papia mil palabra,” e cantidad di plachinan den e foyeto lo papia volúmennan yen na e doño di cas. Invit’é pa lesa e textonan den su mes Bijbel. Sin duda lo ta probechoso si por conducí e studio na un ora cu un miembro di famia cu sa ingles ta disponibel pa traducí.—Mira Nuestro ministerio del Reino, october 1990, página 7-8; mei 1984, página 4 [na ingles, 3/84 pág. 8].

21 Haci Rebishita Sin Tarda: Cuantu bo tin cu warda promé cu haci un rebishita? Algun publicador ta pasa bek dentro di un of dos dia despues dje contacto inicial. Otronan ta bolbe mas despues riba e mésun dia! Esei ta muchu lihé? Generalmente, ta parce cu e doñonan di cas no tin nada contra. Hopi bes ta e publicador cu ta haci e rebishita ta esun cu tin cu cultivá un actitud mas positivo huntu cu un poco curashi. Considerá e siguiente experencianan.

22 Un publicador di 13 aña tabata trahando di cas pa cas un dia ora el a mira dos señora canando huntu. Cordando riba e animacion pa predicá na hende na unda cu nos haña nan, el a acercá e señoranan riba caya. Nan a mustra interes den e mensahe di Reino, i cada un a aceptá un buki Conocimentu. E ruman homber hóben a haña nan adres, a bolbe dos dia despues, i a cuminsá un studio di Bijbel cu cada un di nan.

23 Un ruman muher ta haci areglo pa pasa bek e siguiente siman. Pero un of dos dia despues dje bishita inicial, e ta pasa pa duna e doño di cas un revista riba e tópico cu nan a considerá anteriormente. E ta bisa e doño di cas: “Mi a mira e artículo aki i mi a pensa cu lo bo kier les’é. Mi no por para papia awor, pero lo mi bolbe bek diarason atardi manera nos a palabrá. Ainda e ora ei ta cumbiniente pa bo?”

24 Ora un persona mustra interes den e berdad, nos por ta sigur cu lo e haña oposicion den un of otro forma. E echo cu nos ta yama bek pronto despues cu a haci e contacto inicial lo fortalec’é pa resistí cualkier presion cu e enfrentá for di famia, amigunan íntimo i otronan.

25 Cultivá Interes di Esnan Hañá den Lugánan Público: Hopi di nos ta gusta predicá riba caya, na lugánan di parkeer, den transporte público, den centronan comercial, den parkenan, etcétera. Ademas di laga literatura, nos tin cu cultivá interes. Cu e meta ei, mester haci un esfuerso pa obtené e nomber, adres i, si ta posibel, number di telefon di tur persona interesá cu nos topa. Pa obtené e informacion aki no ta dje difícil ei manera kisas bo ta pensa. Segun cu e combersacion ta yegando su fin, saca bo buki di haci nota i puntra: “Tin un manera cu nos por sigui e combersacion aki na un otro ora?” Of bisa: “Lo mi tin gana pa bo lesa un artículo cu mi tin sigur lo interesá bo. Mi por trec’é na bo cas of oficina?” Tin un ruman homber cu ta djis puntra: “Na ki number di telefon mi por hañá bo?” E ta informá cu den tres luna tur hende, cu excepcion di tres, gustosamente a dun’é nan number di telefon.

26 Usa Telefon pa Haña i Cultivá Interes: Un ruman muher pionero ta usa telefon pa alcansá hende cu ta biba den edificionan di alta siguridad. E ta haci su rebishitanan tambe dje mésun manera. Na e yamada inicial, e ta bisa: “Mi sa cu bo no conocé mi. Mi ta haciendo un esfuerso special pa tuma contacto cu hende den bo área pa compartí un pensamentu for di Bijbel. Si bo tin un ratu, lo mi kier a lesa e promesa hañá na . . .” Despues di lesa e texto, e ta bisa: “Lo no ta maraviyoso si nos lo por mira e tempu ei yega? Tabata un placer pa a lesa esaki pa bo. Si bo tambe a disfrutá di dje, lo mi kier yama un otro biaha i considerá un otro texto.”

27 Ora e bel bek, e ta recordá e doño di cas di nan combersacion anterior i ta bisa cu lo e kier lesa for di Bijbel con condicionnan lo ta ora maldad ser eliminá. E ora ei e ta tene un consideracion bíblico breve cu e doño di cas. Den transcurso di hopi combersacion di telefon, 35 persona a invit’é na nan cas i el a cuminsá shete studio di Bijbel! Tin biaha ta difícil pa bo haci rebishita cerca personanan interesá durante e lunanan friu di winter debí na careteranan intransitabel, friu extremo of debí na malesa? Si ta asina, pakico no keda den contacto cu nan via telefon?

28 Cultivá Interes Hañá na Lugánan di Negoshi: Hopi mas ta enbolbí den traha di negoshi pa negoshi cu simplemente ofrecé revista. Hopi doño di negoshi tin un interes sincero den e berdad, i mester cultivá e interes ei. Den algun caso, lo por ta posibel pa tene un consideracion bíblico of asta studia ei mes na nan lugá di negoshi. Den otro casonan, abo i e persona interesá kisas por topa durante e pausa di merdia of na un otro ora cumbiniente.

29 Un superintendente biahero a bishitá e doño di un toko chikitu i a ofrecé pa demostrá un studio di Bijbel. Ora e doño a puntr’é con largu e demostracion ta dura, e superintendente biahero a bisa cu esei lo tuma solamente 15 minuut. Cu esei, e doño dje toko a cologá un borchi riba porta: “Bek den 20 Minuut,” a hala un par di stul, i nan dos a considerá e promé cincu paragrafnan dje buki Conocimentu. E homber sincero aki a keda asina impresioná cu loke el a siña cu el a asistí n’e Reunion Público i Studio di Toren di Vigilancia e diadomingo ei i a bai eens pa sigui e studio e siguiente siman.

30 Pa ofrecé un studio na un lugá di negoshi, lo bo por bisa esaki: “Ta tuma solamente 15 minuut pa demostrá nos programa di studio di Bijbel. Si por awor aki, gustosamente lo mi mustrá bo con esei ta bai.” Anto, tené bo n’e límite di tempu. Si no ta posibel pa tene un consideracion largu na un lugá di negoshi, lo por ta mas apropiado pa bishitá e doño di negoshi na su cas.

31 Haci Rebishita Asta Si Bo No A Laga Ningun Literatura: Tur chispa di interes ta merecé un rebishita, sea cu a laga literatura of no. Naturalmente, si bira bisto cu e doño di cas realmente no ta interesá den e mensahe di Reino, ta mihó pa dirigí bo esfuersonan un otro caminda.

32 Den e trabou di cas-pa-cas, un ruman muher a topa un señora cu tabata masha amigabel pero cu firmemente a nenga e revistanan. E publicador ta skirbi: “Dianan largu mi a pensa riba e señora i a dicidí cu mi kier a papia cuné atrobe.” Finalmente, e ruman muher a haci oracion, a tuma un curashi i a bati na porta dje señora. Pa su deleite e doño di cas a invit’é drenta. Nan a cuminsá un studio di Bijbel, i e siguiente dia nan a studia atrobe. Cu tempu, e doño di cas a bin den e berdad.

33 Planea di Antemano pa Logra Haci Mas Tantu: Ta recomendabel pa dedicá algun tempu tur siman na haci rebishita. Por logra haci hopi cu bon planeamentu. Haci areglo pa haci e rebishitanan den e mésun área cu lo bo ta trahando di cas pa cas. Ora di traha cu auto, mester tene e grupo chikitu di manera cu cada un lo tin pleno oportunidad pa haci rebishita. E shofer mester sa di antemano unda lo bai haci e rebishitanan di manera cu ta evitá corementu innecesario.

34 Esnan cu tin éxito den haci rebishita i den cuminsá studionan di Bijbel ta bisa cu ta esencial pa mustra un interes personal sincero den hende i pa keda pensa riba nan asta despues cu haci e bishita. Tambe ta necesario pa tin un tópico bíblico atractivo pa considerá i pa pone e fundeshi pa e rebishita promé cu bai for dje bishita inicial. Ademas, ta importante pa bolbe pronto pa cultivá e interes. Semper mester tene bon na mente e meta di cuminsá un studio di Bijbel.

35 Un cualidad vital pa tin éxito den e trabou di haci rebishita ta curashi. Con ta adkirié? Apostel Pablo ta contestá dor di bisa cu nos ta “tuma un curashi” pa declará e bon nobo na otronan “pa medio di nos Dios.” Si bo tin cu crece den e aspecto aki, haci oracion na Jehova pa yudansa. Anto, na armonia cu bo oracionnan, rebishitá tur persona cu mustra interes. Jehova siguramente lo bendicioná bo esfuersonan!

[Box on page 3]

Con pa Tin Exito den Haci Rebishita

■ Mustra un interes personal sincero den hende.

■ Scoge un tópico di Bijbel atractivo pa considerá.

■ Pone e fundeshi pa cada bishita cu lo sigui.

■ Keda pensa riba e persona despues cu bo bai.

■ Bolbe bek den un of dos dia pa cultivá e interes.

■ Tene na mente cu bo meta ta pa cuminsá un studio di Bijbel.

■ Haci oracion pa haña curashi p’e trabou aki.

    Publikashonnan na Papiamentu (Curaçao) (1986-2025)
    Log Out
    Log In
    • Papiamentu (Kòrsou)
    • Kompartí
    • Preferensia
    • Copyright © 2025 Watch Tower Bible and Tract Society of Pennsylvania
    • Kondishonnan di Uso
    • Maneho di Privasidat
    • Konfigurashon di Privasidat
    • JW.ORG
    • Log In
    Kompartí