Conocimentu for di Dios Ta Contestá Hopi Pregunta
1 Promé cu bo a yega na un conocimentu exacto dje berdad, probablemente bo tabatin hopi pregunta tocante bida cu bo no por a contestá. Ki felis bo tabata pa ricibí contestanan basá riba Bijbel pa e preguntanan ei! Awor abo por yuda otronan haña e mésun contestanan ei. (Compará cu 2 Timoteo 2:2.) Bo por compartí cu nan e conocimentu di Dios cu ta hiba na bida eterno. (Juan 17:3) Pero con bo por yuda un persona apreciá e balor di e conocimentu aki? Wel, pensa cua tabata e preguntanan cu e berdad a contestá pa bo. Kico ta loke buscadónan dje berdad tin gana di sa? Pensando den e direccion aki por yudá bo ofrecé e buki Conocimentu cu Ta Hiba na Bida Eterno. E sugerencianan cu ta sigui tal bes por yudá bo ora di prepará pa duna testimonio durante juni.
2 Ya cu hopi hende ta puntra nan mes pakico tin asina tantu sufrimentu den e mundu, por ta e introduccion aki ta haña un bon reaccion:
◼ “Ora desaster tuma lugá of ora actonan di crímen i violencia ta aumentá, hende hopi bes ta puntra pakico cosnan teribel asina ta sosodé. Kico lo bo contestá?” Permití e persona contestá i reaccioná riba loke e bisa. Despues bai na capítulo 8 den e buki Conocimentu, i hala atencion na loke §2 ta bisa. Splica cu e buki aki ta presentá Bijbel su splicacion en cuanto pakico cosnan malu ta sosodé, i bisa: “Si bo ta primintí di les’é, gustosamente lo mi kier laga e ehemplar aki cu bo.” Si e persona kier e buki, mencioná e contribucion.
3 Ora di haci rebishita caminda bo a laga e buki “Conocimentu,” lo bo por bisa:
◼ “Mi ta interesá den e conclusion cu bo a yega na dje en cuanto pakico tin asina tantu sufrimentu den e mundu. Bo ta di acuerdo cu Bijbel su contesta presentá den e buki?” Permití contesta. Lesa §17 na página 76 den e buki Conocimentu, i ofrecé pa lesa Romanonan 9:14 for dje doño di cas su Bijbel. Anto bisa: “E bon noticia ta cu Dios no ta causa nos dolor i sufrimentu inhustamente. El a primintí di duna nos bida eterno den pas i felicidad. E promé capítulo dje buki aki ta titulá ‘Bo Por Tin un Futuro Felis!’ Lo mi tin gana di splica con esei por ta cierto pa bo i pa bo sernan kerí.” Bai na capítulo 1, i demostrá nos método di studio. Abarcá mas tantu posibel dje capítulo te asina leu cu ta apropiado bou dje circunstancianan.
4 Lo bo por scoge pa usa e introduccion cu ta aparecé na página 3 dje foyeto chikitu “Con pa Cuminsá i Continuá Consideracionnan Bíblico” bou dje subtema “Behes/Morto”:
◼ “Bo a yega di puntra bo mes, ‘Morto ta fin di tur cos? Of tin algu otro despues di morto?’ [Permití contesta.] Bijbel ta clara cualkier pregunta cu nos por tin tocante morto. [Lesa Eclesiástes 9:5, 10.] Tambe Bijbel ta mustra cu tin un berdadero speransa pa personanan cu tin fe. [Bai na §13 na página 84 den e buki Conocimentu; lesa i splica e palabranan di Jesus hañá na Juan 11:25.] Henter e capítulo aki ta dedicá na contestá e pregunta, Kico ta sosodé cu nos stimánan morto? Si bo lo kier les’é, mi por laga e ehemplar aki cu bo.” Bisa e doño di cas e contribucion p’e buki.
5 Ora di haci e rebishita, lo bo por bolbe bisa ta ken bo ta i despues bisa:
◼ “Biaha pasá nos a papia tocante loke ta sosodé ora un persona muri. Hopi hende ta kere cu si tin bida despues di morto, esei lo ta sea den shelu of den fiernu. Pero bo a yega di pensa riba e posibilidad cu e mortonan lo biba atrobe aki mes riba tera? [Permití contesta.] Segun Bijbel, esnan resucitá lo ta entre e mansunan cu ta heredá e tera. [Lesa Salmo 37:11, 29, anto considerá §20 na página 88 dje buki Conocimentu.] E speransa ei a duna consuelo na miyones di hende cu tabatin miedu di muri. E buki aki lo yudá bo comprendé e asuntu mihó. Mi tin mag di demostrá bo con?”
6 Si bo ta preferá un presentacion simplificá, lo bo por purba esaki:
◼ “Lo mi kier mustrá bo un plachi den e buki aki, Conocimentu cu Ta Hiba na Bida Eterno. Esaki no ta un bunita plachi?” Habri e buki di manera cu e doño di cas por mira página 4-5. Permití su reaccion. Despues lesa e palabranan na página 5. Concluí dor di bisa: “Bo por haña e buki aki pa bo mes les’é. Nos no ta cobra p’e, pero sí nos ta aceptá un contribucion chikitu.” Averiguá cua lo ta un bon ora pa bolbe bek pa sigui cultivá e interes cu a ser mustrá.
7 Nos tin e conocimentu for di Dios cu ta contestá preguntanan importante di bida. Prepará diligentemente, i Jehova lo bendicioná bo esfuersonan pa compartí e informacion dunador-di-bida aki cu esnan cu ta buscando e berdad.