Fieldad Ta Ser Recompensá
1 Hebreonan 11:6 ta bisa nos cu Dios “ta bira recompensador di esnan cu ta busk’é cu empeño.” Un manera cu e ta recompensá su sirbidónan deboto cu tabata ‘fiel den poco cos’ ta dor di ‘nombra nan riba hopi cos.’ (Mat. 25:23) Cu otro palabra, hopi bes Jehova ta recompensá trabou diligente dor di duna su testigonan fiel privilegionan adicional di sirbishi.
2 Apostel Pablo su fieldad a ser recompensá cu un ministerio cu a hib’é na e stadnan i pueblitonan di Europa i Asia Menor. (1 Tim. 1:12) Aunke hopi esfuerso tabata enbolbí den cumpli cu su ministerio plenamente, Pablo a balorá mashá e privilegio cu el a ricibí. (Rom. 11:13; Col. 1:25) El a mustra su aprecio sincero dor di busca cu empeño oportunidadnan pa predicá. Mediante su actividad celoso, el a demostrá su fe claramente pa medio di su obranan. Su ehempel ta impulsá nos pa atesorá nos privilegionan di sirbishi.
3 Jehova A Duna Nos un Ministerio: Con nos por mustra e mésun punto di bista cu Pablo pa cu e privilegio di sirbishi aki? Nos ta busca maneranan pa aumentá nos participacion den e ministerio. Nos ta probechá di tur oportunidad pa duna testimonio informal i tambe di cas pa cas. Nos ta bai bek na tur e no-na-casnan i ta rebishitá tur persona cu ta interesá. I nos ta cumpli cu e citanan cu nos haci pa conducí studionan di Bijbel na cas.
4 Relacioná cu nos ministerio, Pablo a amonestá: “Ocupá bo den dje urgentemente.” (2 Tim. 4:2) Algu cu ta urgente ta rekerí atencion inmediato. Nos ta atendé nos ministerio den un manera urgente, dunand’e prioridad den nos bida? Por ehempel, nos lo no kier permití nos actividadnan di recreo i otro actividadnan personal den fin di siman interferí cu e tempu cu nos lo mester dedicá na e ministerio di veld. Siendo cu nos ta convencí cu e fin dje sistema aki ta acercando rápidamente, nos ta convencí tambe cu predicacion dje bon nobo di Reino ta e trabou di mas importante cu nos por haci.
5 Nos ta demostrá nos fidelidad na Dios dor di ta fiel i leal na dje i constante den e trabou cu el a asigná nos. Laga nos cumpli cu nos ministerio plenamente, di manera cu Jehova lo recompensá nos fieldad den gran forma.