Compartí cu Otronan E Secreto pa Felicidad den Famia
1 E famia ta e unidad básico di sociedad humano. Ta famianan ta forma un pueblito, un stad, un estado i nacionnan completo. Awe e famia ta bou di presion manera nunca promé. Influencianan poderoso ta obrando i ta menasá e existencia di bida di famia. Ki gradicidu nos ta cu Jehova, e Diseñador dje areglo di famia, a proveé nos cu instruccionnan di manera cu nos por logra felicidad den famia! Esnan cu ta sigui su instruccionnan ta ripará cu problemanan ta bira ménos i cu e resultado ta un famia exitoso. Durante september nos tin e privilegio di compartí cu otronan e buki E Secreto pa Felicidad den Famia. Tuma e iniciativa pa abordá hende riba e tópico di bida di famia. Sea amigabel, positivo i mustra dicernimentu. Kico lo bo por bisa?
2 Lo bo por cuminsá dor di haci un pregunta manera:
◼ “Bo a ripará cu pa hopi famia ta difícil pa wanta e presionnan di bida? [Permití contesta.] Informenan ta indicá cu hopi hende tin problema na cas. Kico bo ta kere lo yuda famianan haña mayor stabilidad i felicidad? [Permití contesta.] Como cu Dios a instituí e areglo di famia, lo no ta razonabel pa examiná e instruccionnan cu el a duna? [Lesa 2 Timoteo 3:16, 17.] E buki aki, E Secreto pa Felicidad den Famia ta contené instruccion probechoso asina.” Anto puntra e persona kico e ta haña ta un problema comun den famia, mustra e capítulo cu ta considerá e problema ei i ofrecé e buki.
3 Na e rebishita, lo bo por purba logra e meta di cuminsá un studio di Bijbel dor di bisa:
◼ “Mi a pensa riba loke bo a bisa tocante e tópico di bida di famia, i mi a trece algu cu mi ta kere cu lo bo gusta. [Mustra e foyeto Rekerí, bai na página 16, i lesa e seis preguntanan na cabes dje página.] Di mes, cada persona den e famia tin cu haci su parti pa contribuí na felicidad den famia. Si bo tin djis un par di minuut, lo mi mustrá bo con bo por saca e mihó probecho for dje informacion aki.” Anto cuminsá studia les 8.
4 Un otro manera pa cuminsá un consideracion ta dor di mencioná un problema, kisas dor di bisa:
◼ “Aunke tur hende kier tin un sintimentu di contentamentu i satisfaccion, ta parce cu hopi famia no tin esaki realmente. Kico bo ta pensa lo yuda nan haña berdadero felicidad? [Permití contesta.] Hopi tempu pasá, Bijbel a revelá e clase di problemanan cu nos lo a mira den famianan awe. [Lesa 2 Timoteo 3:1-3.] Sin embargo, tambe Bijbel ta bisa famianan kico pa haci pa solucioná e problemanan aki i pa obtené felicidad duradero. E buki aki, E Secreto pa Felicidad den Famia ta contené principionan bíblico.” Anto mustra e cuadro di repaso na fin di un capítulo cu ta apropiado, les’é i ofrecé e buki.
5 Ora bo regresá, usa e foyeto “Rekerí” pa cuminsá un studio. Lo bo por bisa:
◼ “Mi a keda contentu cu bo tabata dispuesto pa examiná e principionan di Bijbel cu ta aplicá na bida di famia. Experencia ta mustra cu ta logra mihó resultado ora sigui e conseho práctico hañá den Bijbel. Ata aki un splicacion simpel di pakico esei ta asina.” Lesa e promé paragraf di les 1 for dje foyeto Rekerí, incluyendo sea Salmo 1:1-3 of Isaías 48:17, 18. Si tin e oportunidad, considerá e resto dje les. Ofrecé pa bolbe bek pa studia e siguiente les huntu.
6 Tocante Nos Literatura: Sabiendo cu tur nos literatura ta balioso i cu pa publicá nan ta costa placa, bo sa vacilá pa ofrecé e revistanan, foyetonan of bukinan na hende cu bo ta topa? Con nos por ta sigur cu nos no ta dunando nos literatura na hende cu no ta apreci’é? Un manera ta dor di pidi e persona un contribucion pa nos literatura, como cu esaki lo por indicá si e ta apreciá loke el a haña.
7 Por ehempel, ora di ofrecé e buki “Felicidad den Famia,” lo bo por bisa esaki:
◼ “Mi tin sigur cu lo bo kier lesa e buki aki. Mi ta ofrecé bo e buki pa un contribucion chikitu. Mi ta spera sinceramente cu e contribucion ta un manera pa bo expresá bo aprecio pa e informacion excelente cu lo bo haña den e publicacion aki.” En general hende ta reaccioná positivo ora nos mencioná e contribucion ya cu nan ta comprendé cu e contribucion no ta pa ningun ganashi. Na mes momento, si e persona ta dispuesto pa contribuí cu e sumanan chikitu aki, nos por dicerní si e ta apreciá e literatura. Si nos no ta djis duna nos literatura pornada e hendenan lo ripará mas ainda cuantu balor nan tin.
8 Laga nos haci tur esfuerso posibel pa compartí cu otronan e secreto cu ta hiba na felicidad den famia cu ta, sigui e instruccionnan describí den e Palabra di Dios.—Sal. 19:7-10.