“Muhernan Cu Ta Trahando Duru den Señor”
1 Cu e palabranan citá ariba, Pablo a describí Trifena i Trifosa, dos ruman muher cu tabata traha duru den e congregacion di Roma. Di un otro ruman muher, Pérsis, Pablo a bisa: “El a haci hopi trabou den Señor.” Tambe el a haci mencion faborabel di Febe como “un defensor di hopi ruman.” (Rom. 16:2, 12) Den e Scritura, Dórcas a keda destacá como un ruman muher cu a “abundá den bon obra i donnan di misericordia.” (Echo. 9:36) Ki un bendicion hende muher spiritual ta pa e congregacion!
2 Nos ta apreciá e ruman muhernan cu ta traha duru den nos congregacion? Ta nan ta haci gran parti dje trabou di predicá, ta conducí mayoria studio di Bijbel i ta yuda hopi dje hende nobonan. Tambe nan ta dedicá bastante tempu na yuda yunan haci progreso spiritual. Muhernan cristian ta haci nan parti den edificá e spiritu di amor, goso, pas i celo den e congregacion. Den hopi manera nan ta duna apoyo, pa asina nan casá i otro miembronan di famia por haci mas den e sirbishi di Jehova.
3 Ruman Muhernan den Sirbishi di Tempu Completo: Entre esnan cu ta traha hopi duru den Señor ta rumannan muher misionero, i hopi di nan a participá den desaroyá e trabou den paisnan stranhero. Esposanan di superintendentenan biahero ta druk den e ministerio di veld n’e congregacionnan cu nan casá ta sirbi, i nan ta animá hopi ruman muher. No mester pasa por haltu dje ruman muhernan na Betel, kendenan cu celo ta efectuá sirbishi sagrado pa apoyá Jehova su organisacion. I nos ruman muhernan pionero regular, mediante nan fiel esfuerso den alabá Dios, ta yudando miles di hende siña conocé e berdad.
4 E hende muhernan fiel aki ta haña gran satisfaccion den e bida di sacrificio propio cu nan ta hiba. (1 Tim. 6:6, 8) Nan ta digno di encomendacion i di cualkier animacion i apoyo cu nos por duna nan.
5 Hende muher cristian ta un parti balioso di Jehova su organisacion, i ta efectuá sirbishi fiel cu ta un bendicion pa tur. Laga nos sigui apreciá tal hende muher i pidi den oracion pa Jehova su bendicion keda riba nan segun cu nan ta sigui ‘traha duru den Señor.’