Bo Tin e Spiritu di Sacrificio Propio?
1 Aprecio pa loke Jesucristo a logra inegoistamente pa humanidad, mester motivá nos tur pa usa nos abilidadnan, energia i puntonan fuerte den un manera cu ta demostrá sacrificio propio. E Scritura ta suplicá: “Presentá boso curpa como un sacrificio bibu, santu, aceptabel na Dios, un sirbishi sagrado.” (Rom. 12:1) Un examinacion propio periódicamente, lo yuda bo mira si bo ta demostrá e clase di actitud ei plenamente te caminda bo circunstancianan personal ta permití.
2 Den Busca Conocimentu Bíblico: Bo a apartá tempu pa riba un base regular bo lesa i studia Bijbel? Bo ta tene bo n’e programa ei? Prepará bon pa reunionnan di congregacion ta parti di bo rutina? Si bo ta cabes di famia, bo tin un studio di Bijbel regular huntu cu bo famia di cas? Pa haci e cosnan aki kisas ta rekerí pa sacrificá tempu cu bo ta dedicá na television, computer of otro actividad. Sin embargo, esta un sacrificio chikitu esei ta, sabiendo cu e tempu cu bo dedicá na e Palabra di Dios lo yuda bo yega na bida eterno!—Juan 17:3.
3 Den Entrená Bo Yunan: Infancia ta e mihó tempu pa cuminsá siña e caminda di sacrificio propio. Siña bo yunan cu mescos cu tin un tempu pa hunga, mester tin un tempu tambe pa trabou i pa actividadnan teocrático. (Efe. 6:4) Duna nan trabou útil pa haci na cas. Establecé un programa regular pa boso por participá den e ministerio cu nan. Reforsá boso instruccion cu boso mes bon ehempel.
4 Den Actividadnan di Congregacion: Ora tur hende den un congregacion ta dispuesto pa haci sacrificio pa logra cosnan cu ta beneficiá tur, esei ta enrikesé e congregacion. (Heb. 13:16 ) Ta posibel pa bo dedicá mas tempu n’e trabou di predicá e Reino i haci disipel? Bo por ofrecé bo mes pa yuda rumannan malu of di edad, kisas pa yuda nan cu transport pa yega reunion?
5 Promé cu Jesus a haci e sacrificio máximo di su bida humano, el a consehá su disipelnan pa enfocá nan bista riba interesnan di Reino, i asina pone tur otro cos den bida na di dos lugá. (Mat. 6:33) Eherciendo tal spiritu di sacrificio propio lo duna nos e mayor felicidad miéntras nos ta sigui sirbi Jehova cu alegria.