Mayornan—Inculcá Custumbernan Útil den Boso Yunan
1 Hende no ta adkerí custumbernan útil di naturalesa, ni pa casualidad. Ademas, ta tuma tempu pa inculcá bon custumber den yunan. “Inculcá” kier men “transmití gradualmente” of “laga drenta gota pa gota.” Mayornan mester ta consistente pa nan por “sigui cria [nan yunan] den e disiplina i reglamentu mental di Jehova.”—Efe. 6:4.
2 Cuminsá for di Infancia: E abilidad di siña i haci cosnan nobo cu mucha hopi chikitu tin, ta remarcabel. Aunke pa adultonan hopi bes ta difícil pa siña un idioma nobo, muchanan preescolar por siña dos of tres idioma pareu. Nunca pensa cu bo yu ta muchu yong pa desaroyá bon custumber. Si cuminsá duna mucha instruccion bíblico trempan i continuo, pa ora e mucha tin un par di aña bieu, su mente lo ta yená cu e conocimentu cu lo hacié “sabí pa salbacion.”—2 Tim. 3:15.
3 Haci Sirbishi di Veld un Custumber: Un custumber útil cu mester ser inculcá durante e añanan formativo di un mucha, ta di predicá e bon nobo dje Reino di Dios regularmente. Hopi mayor ta cuminsá cu esaki dor di bai cu nan yunan den e ministerio di cas pa cas ora cu e muchanan ta baby. E participacion regular di mayornan den e trabou di duna testimonio ta yuda nan yunan desaroyá aprecio i celo pa e ministerio. Mayornan por mustra nan yunan con pa participá den duna testimonio den tur rasgo di sirbishi di veld.
4 Loke tambe ta yuda e muchanan ta ora nan ta inscribí den e Scol di Ministerio Teocrático. Esei ta siña nan bon custumber di studia i con pa lesa cu comprendimentu. Nan ta siña combersá tocante Bijbel, haci rebishita i conducí studionan bíblico. Tal entrenamentu por inspirá nan pa traha pionero i procurá pa alcansá privilegionan special di sirbishi. Hopi betelita i misionero tin grato recuerdo di nan comienso den e Scol di Ministerio Teocrático i ta consider’é como un percuracion cu a yuda nan desaroyá custumbernan útil.
5 Nos tur ta manera klei den man dje Gran Trahador di Pochi, Jehova. (Isa. 64:8) Mas frescu e klei ta, mas fácil e ta pa moldea. Mas e para seca, mas difícil e ta bira pa manehá. Asina ta cu hende. Ora nan ta yong, nan ta mas moldeabel, i mas yong, mihó. Nan promé añanan di bida ta añanan di formacion, ora cu nan ta cuminsá haña forma den direccion bon of malu. Como un mayor cu ta interesá, cuminsá inculcá custumbernan útil dje ministerio cristian for di trempan den bo yunan.