Testificacion Exitoso via Telefon

¹ Nos meta como Testigo di Jehova no ta pa djis participá den predicá e bon nobo, sino tambe pa alcansá tur hende posibel cu e mensahe di Reino. (Echo. 10:42; 20:24) Aunke e trabou di cas pa cas ta sigui ta e manera principal pa alcansá hende, nos ta realisá cu ni sikiera via e método sistemático aki nos no ta haña contacto cu tur hende. P’esei pa ‘cumpli cu nos ministerio plenamente,’ nos ta usa otro métodonan—entre nan testificacion via telefon—pa haña personanan semehante na carné.—2 Tim. 4:5.

² Den hopi lugá, hende ta biba den fletnan di alta siguridad, complehonan di residencia cu hopi famia of bloknan di cas cu entrada cerá, caminda ta difícil pa nos usa nos método tradicional di cas pa cas pa alcansá hende. Asta den teritorionan caminda nos por traha di cas pa cas, un cantidad grandi di hende no ta na cas. Sin embargo, hopi publicadó tin bon éxito den alcansá e habitantenan aki via telefon. Trahando un mainta di cas pa cas, un pareha casá tabatin nuebe no-na-cas. Despues di a bai Salon di Reino bek, nan a busca e casnan aki den un buki di telefon cu ta pone e number di telefon segun e adres. Nan a bel e numbernan i a haña ocho dje habitantenan na cas!

³ Bo no tin masha gana di incluí testificacion via telefon den bo ministerio? Un ruman homber ta admití: “Ami no gusta niun hende bel mi na cas pa bende mi nada, pues mi tin un blokeo mental pa cu e tipo di testificacion aki.” Sin embargo, despues di a haci solamente dos yamada, e di: “Mi gust’é!” Nunca mi no a pensa cu esei por sosodé, pero mi gust’é! Na telefon e hendenan ta relax, i bo tin tur loke bo mester na man. Esaki ta great!” Un ruman muher tabatin un reaccion similar: “Mi no tabata masha entusiasmá tocante testificacion via telefon. Pa bisa bo berdad, mi no kier a hacié. Pero mi a purb’é i a hañ’é masha fructífero. Mi tin 37 rebishita cu mi a haña di testificacion via telefon i mas studio di loke mi por atendé!” Si bo ta dispuesto pa purba testificacion via telefon, bo tambe por tin éxito.

⁴ Con pa Organisá Testificacion via Telefon: E actividad di testificá dje congregacion ta cai bou di supervision dje superintendente di sirbishi. Dependiendo dje necesidad, e cuerpo di anciano por scoge pa nombra un otro anciano of un sirbidó ministerial capacitá pa traha den estrecho cooperacion cuné pa organisá e actividad di testificacion via telefon. E ruman encargá cu teritorio tambe mester ta enbolbí, ya cu ta e lo asigná e teritorionan i mantené un registro al dia. E superintendente di circuito tambe lo ta interesá den e progreso dje programa.

⁵ Si tin áreanan den boso teritorio cu no ta accesibel pa predicacion di cas pa cas, mester prepará teritorionan di telefon. E ruman homber asigná lo traha cuidadosamente un lista dje adresnan cu mester forma e teritorionan ei, i mester tene nan relativamente chikitu di manera cu por traha nan cu regularidad. Mester marca tur mapa di teritorio cu ta incluí e áreanan ei cu un nota cu ta bisa cu e seccion specífico ei ta designá pa testificacion via telefon.

⁶ Na unda bo por haña e numbernan di telefon? Podisé e biblioteca público por tin un buki di telefon cu ta pone e numbernan segun adres. Si un compleho residencial di alta siguridad tin su propio lista di telefon, kisas bo por haña e numbernan for di einan. Si no, kisas ta posibel pa skirbi nomber dje habitantenan for dje lista den lobi dje lugá i busca nan den un buki di telefon normal.

⁷ E ancianonan por desplegá un interes activo den e trabou aki dor di haci areglo pa rumannan cu experencia den testificacion via telefon entrená otronan, kisas mediante e programa Pioneronan Ta Yuda Otro Publicadónan. Periódicamente, por dedicá un parti di necesidadnan local den e Reunion di Sirbishi na con pa mehorá e éxito dje rasgo aki di duna testimonio.

⁸ Ora ancianonan haci bishita di pastoreo cerca rumannan inválido cu no por sali for di cas of cerca esnan enfermo, nan por ta alerto pa animá e rumannan aki pa participá den testificacion via telefon. Kisas un anciano por haci un par di yamada miéntras e publicadó ta observá. Despues e publicadó por haña un oportunidad pa haci un yamada. Hopi publicadó cu a cuminsá asin’akí, ta dedicá un par di minuut tur dia na e trabou aki, i nan gust’é mashá.

⁹ Sugerencianan pa Éxito: Ora Jesus a manda su disipelnan bai predicá, el “a manda nan dos dos.” (Luc. 10:1) Di con? E tabata sa cu dor di traha huntu nan lo a siña for di otro i animá otro. Mescos ta e caso cu testificacion via telefon. Dor di traha manera partner, boso por siña for di otro, considerá cu otro boso resultadonan i ofrecé sugerencia pa e siguiente combersacion. Asta durante un yamada, bo por yuda otro haña informacion apropiado.

¹⁰ Pa yuda bo pensa bon i pa concentrá, sinta caminda bo por pone bo material pa duna testimonio—Bijbel, buki Razonamentu, foyeto Rekerí, revistanan, etcétera—bo dilanti. Pone algun presentacion riba papel, tene nan caminda bo por mira nan. Sea prepará pa tene registronan exacto i completo, i incluí e fecha i ora cu bo a yama pa asina bo por sa ki ora bo tin cu yama bek pa sigui cultivá e interes.

¹¹ Hopi bes hende ta cauteloso ora nan tende un stem desconocí na telefon. P’esei sea caluroso, amigabel i cu tacto. E doño di cas tin solamente e zonido di bo stem pa determiná bo caracter i sinceridad. Relax i papia di curason. Papia slow i cla i cu suficiente volúmen cu e hende na telefon por tende bo. Duna e doño di cas chens pa papia. Usa bo nomber completo, i mencioná cu bo ta biba den e comunidad. Nos no kier pa e hendenan pensa cu nos ta bendedó via telefon. En bes di bisa cu bo ta yamando tur e habitantenan den un cierto edificio of compleho residencial, haci bo yamada personal.

¹² Presentacionnan na Telefon: Nos por adaptá hopi dje introduccionnan na página 9-15 dje buki Razonamentu, na testificacion via telefon. Lo bo por bisa: “Mi ta yamando na telefon pasobra mi no por bishitá bo personalmente. E propósito di mi yamada ta pa puntra bo opinion relacioná cu un pregunta hopi interesante.” Anto bo ta haci e pregunta.

¹³ Lo bo por usa e promé presentacion bou dje tema “Crímen/Siguridad” asin’akí: “Halo. Mi nomber ta _____. Mi ta biba den e comunidad. Mi kier sigurá bo cu mi no ta bendiendo nada ni esaki no ta un encuesta. Mi ta yama debí na mi preocupacion tocante e asuntu di siguridad personal. Tin bastante crímen rond di nos i e ta afectá nos bida. Bo ta kere cu e tempu lo yega ora hende lo por cana riba caya anochi i sinti nan mes safe? [Permití contesta.] Laga mi lesa loke Dios a primintí di haci.”

¹⁴ Usando e método directo pa ofrecé studio di Bijbel na telefon tabatin bon resultado. Bo por demostrá e studio den un par di minuut. Ofrecé e persona pa bishit’é na su cas pa sigui cu e studio, of si e persona no ta masha dispuesto pa haci esei, ofrecé pa sigui e studio na telefon riba un otro dia.

¹⁵ Ora bo ta concluí un combersacion, tene na mente pa bisa algu cu lo pone e persona laga bo bishit’é na su cas of post un literatura p’e. Si e persona ta vacilá pa duna bo su adres, ofrecé pa bel e atrobe. Kisas bo mester haci vários yamada promé cu e sinti su mes suficiente cómodo pa invitá bo na su cas.

¹⁶ Tuma e Iniciativa: Un ruman muher di 15 aña a cuminsá su sirbishi di mainta cu un yamada di telefon. El a papia cu un señora cu a bai di acuerdo pa aceptá e buki Conocimentu. Ora e ruman a bai entregá e buki na e cas, e señora kier a sa con bini e hóben tabata sa su number di telefon, ya cu ta un number privá. E ruman a marca number robes! E señora a aceptá un studio i awor e ta un publicadó no-bautisá.

¹⁷ Un ruman muher a tuma un teritorio di telefon, pero debí na miedu el a posponé pa trah’é durante tres siman. Kico a dun’é e curashi pa cuminsá? El a corda e artículo den Spierta! (na spañó) di 22 di januari 1997, titulá “Ora Mi Ta Débil, e ora ei Mi Ta Poderoso.” E artículo tabata tocante un Testigo cu ta predicá via telefon apesar di limitacionnan físico. E ruman muher a bisa: “Mi a haci oracion na Jehova i a pidié forsa. Mi a pidié duna mi e palabranan corecto pa haci mi presentacion.” Kico tabata e resultado di su promé dia di testificacion via telefon? E ta informá: “Jehova a contestá mi oracion. E hendenan a scucha mi, i mi a haci areglo pa un rebishita.” Despues su testificacion via telefon a resultá den un studio di Bijbel. E ta concluí: “Jehova a siña mi un biaha mas pa confia den dje i no den mi mes.”—Pro. 3:5.

¹⁸ Presentá e berdad via telefon a bira un método exitoso pa predicá e bon nobo. Prepará bon, i participá di henter curason. No bira desanimá si bo no tin un reaccion faborabel unbes despues di e promé par di yamadanan. Pidi Jehova su guia den oracion i papia cu otro publicadónan cu ta predicando den e manera excitante aki. Cu e deseo di no pasa niun hende por haltu den nos teritorio, laga nos efectuá nos ministerio cabalmente i cu un sentido di urgencia.—Rom. 10:13, 14.