Jehova Ta Duna Poder
1 Ki impresion bo tin di apostel Pablo? Segun nos ta lesa e buki di Echonan, nos ta apreciá con diligente e tabata den e sirbishi di Jehova. Con Pablo a logra haci tur e cosnan ei? E di: “Pa tur cos mi tin e forsa den birtud di esun cu ta duna mi poder.” (Fil. 4:13) Nos tambe por beneficiá dje poder cu Jehova ta duna. Con? Dor di saca probecho di seis provision cu e ta duna pa revitalisá i fortalecé nos spiritualmente.
2 E Palabra di Dios: Mescos cu nos tin cu come cuminda pa mantené nos forsa físico, asina nos tin cu nutri nos mes cu e Palabra di Dios pa por keda na bida spiritualmente. (Mat. 4:4) Bijbel ta percurá e poder pa sostené nos. Pa mantené nos celo i entusiasmo pa e berdad, nos tin cu haci studio personal i meditacion significativo, si ta posibel tur dia.—Sal. 1:2, 3.
3 Oracion: Ta importante pa hala cerca Jehova, foral den tempu di necesidad special. Mediante su spiritu, e ta duna poder vigorisante na esnan cu pidié esei den oracion. (Luc. 11:13; Efe. 3:16) E Scritura ta animá nos pa “perseverá den oracion.” (Rom. 12:12) Abo ta haci esei?
4 E Congregacion: Tambe nos ta ser fortalecé i animá dor dje reunionnan di congregacion i dor dje asociacion caluroso cu nos ta disfrutá einan cu nos rumannan. (Heb. 10:24, 25) Ora nos tin preocupacion, nan ta animá nos i amorosamente ta yuda nos.—Pro. 17:17; Ecl. 4:10.
5 E Ministerio di Veld: Participacion regular den e ministerio ta yuda nos sigui enfocá riba e Reino i su bendicionnan. Yuda otro hende siña tocante Jehova ta lanta nos ánimo. (Echo. 20:35) No ta nos tur por muda bai sirbi caminda tin mas necesidad ni participá den sirbishi di tempu completo, pero tin otro maneranan cu nos por tin un participacion significativo den e ministerio.—Heb. 6:10-12.
6 Superintendentenan Cristian: Nos ta beneficiá dje animacion i yudansa cu ancianonan ta percurá. Jehova a asigná nan pa pastoreá e tou di Dios bou di nan cuido. (1 Ped. 5:2) Superintendentenan biahero ta edificá e congregacionnan cu nan ta sirbi, mescos cu Pablo a haci den su tempu.—Rom. 1:11, 12.
7 Ehempel di Esnan Fiel: Considerando e ehempelnan positivo di colaboradónan fiel tantu di antigwedad como di tempu actual, ta yena nos cu vigor. (Heb. 12:1) Ora bo ta sinti necesidad di ser revitalisá, pakico bo no ta lesa un dje historianan di bida animador cu tin den nos revistanan of un informe edificante den e Anuario of algun dje relatonan excitante di e historia moderno di Testigonan di Jehova den e buki Proclamadónan?
8 Un ruman homber cu awor tin nobent’i picu aña, a aceptá e berdad na mucha. Miéntras e tabata un tiener ainda, su fe a ser poné na prueba. Pa cuminsá, algun persona cu tabata asociá activamente cu e congregacion a bandoná Jehova su organisacion. Despues tabatin e trabou di cas pa cas, cu el a haña difícil. Tog, el a dependé semper riba Jehova. No a tarda hopi cu e tabata disfrutá dje ministerio. I awe? Apesar di mal salú, ainda e ta un miembro dje famia di Betel na Brooklyn, i ta sirbi den e Cuerpo Gobernante. No ta duel e cu el a pega na Jehova su organisacion.
9 Un ruman muher cu ta miembro dje famia di Betel na Gran Bretania, a bautisá tempu cu e tabatin 13 aña. E siguiente aña el a cuminsá traha pionero huntu cu su ruman homber, i e aña despues di esei, nan a encarcelá su tata debí na su neutralidad durante Segundo Guera Mundial. E ruman muher a sigui acudí na Jehova pa dun’é poder, i el a sigui sirbi e Dios berdadero. Cu tempu, el a casa cu un ruman homber fiel, i huntu nan a sigui haci Jehova su boluntad. Despues di 35 aña casá, su esposo a muri di ripiente. Atrobe el a haña forsa for di Jehova, i el a sigui padilanti te cu awe, anticipando pa sirbi pa semper como un miembro di Jehova su famia terenal.
10 Jehova ta yuda i ta duna vigor na su sirbidónan fiel. “E ta dunando poder na esun cansá; i esun sin energia dinámico e ta haci abundá den pleno potencia.” Nos por obtené energia for dje fuente ilimitá aki di poder dor di saca probecho di tur seis provision mencioná ariba. Corda: “Esnan cu ta spera den Jehova lo recobrá poder. . . . Nan lo core i no fatigá; nan lo cana i no cansa.” (Isa. 40:29-31) Pablo a dependé mashá riba Jehova pa haña forsa, i nos tambe mester haci mescos.