April—Tempu pa Nos ‘Traha Duru i Haci Esfuerso’
1 E simannan rond di Memorial ta un tempu di refleccion pa e pueblo di Jehova. Esaki ta un tempu pa meditá riba loke e morto di Cristo a logra i pensa riba e speransa cu Dios a duna nos i cu a bira posibel dor di Jesus su sanger dramá. Ora bo pensa bek riba 19 di april di aña pasá, kico ta bini na bo mente? Bo por corda e caranan cu bo a mira e anochi ei?, e ambiente spiritual ricu cu tabatin na Memorial?, e consideracion bíblico serio i e oracionnan sincero? Kisas bo a dicidí cu lo bo bai demostrá mas plenamente e profundidad di bo gratitud pa e amor cu Jehova i Jesus a mustra na bo. Con e meditacion ei ta influenciá bo awor?
2 Ta bisto cu e pueblo di Jehova ta expresá gratitud den formanan cu ta bai hopi mas leu cu solamente palabra. (Col. 3:15, 17) Foral april aña pasá, nos a haci esfuerso pa demostrá nos aprecio pa e percuracionnan cu Jehova a haci pa salbacion dor di gasta nos mes den e ministerio cristian. Tabatin miles di pionero auxiliar, i riba islanan ABC nos a surpasá e máximo anterior cu 51 porciento. Nan esfuerso, huntu cu e esfuerso di tur otro proclamadó di Reino, a resultá den máximonan nobo di ora, revista i rebishita. Nos goso a aumentá ora nos a mira miles di studio nobo cuminsá i un máximo nobo di asistencia na Memorial!
3 Sí, e sigur cu nos ta di nos speransa, ta stimulá nos na accion. Ta precis manera apostel Pablo a skirbi: “P’esei mes nos ta traha duru i ta haci esfuerso vigoroso, pasobra nos a pone nos speransa den un Dios bibu, cu ta Salbador di tur clase di hende, specialmente di esnan fiel.”—1 Tim. 4:10.
4 Con lo bo demostrá bo fe den Jehova su percuracionnan pa haña bida durante e temporada aki di Memorial? April aña pasá nos tabatin 2.130 proclamadó di Reino riba islanan ABC. Nos por surpasá e cantidad ei april akí? E ta na nos alcanse. Pero tur publicadó, bautisá i no-bautisá, lo tin cu participá. Kisas hopi persona nobo tambe ta cualificá pa participá. Pues, segun cu bo ta traha plan pa traha duru i haci esfuerso e april akí, considerá e maneranan cu bo por stimulá otro hende pa compañá bo, incluso esnan mas nobo i ménos experenciá.
5 Con pa Yuda Algun Reanudá Nan Actividad: Si bo conocé algun publicadó cu tin un of dos luna sin sali den sirbishi di veld, kisas lo bo por animá nan i invitá nan pa compañá bo den sirbishi di veld. Si algun den congregacion a bira inactivo, e ancianonan lo haci un esfuerso special pa bishitá nan i animá nan pa cuminsá atrobe na april.
6 Nos tur tin cu sigui pidi Jehova pa su spiritu fortalecé nos den su sirbishi. (Luc. 11:13) Kico nos tin cu haci pa ricibí e spiritu ei? Lesa Dios su Palabra inspirá. (2 Tim. 3:16, 17) Tambe nos tin cu “tende loke e spiritu ta bisa n’e congregacionnan” dor di ta presente na tur cincu reunion semanal. (Rev. 3:6) Awor ta e tempu oportuno pa yuda esnan iregular i inactivo mehorá nan custumbernan di studio personal i bira constante den nan asistencia na reunion. (Sal. 50:23) Nos ta haci esaki miéntras cu nos ta vigilá nos propio bienestar spiritual cuidadosamente. Sin embargo, algu mas ta necesario.
7 Apostel Pedro a splica cu Dios ta duna su spiritu santu “na esnan cu ta obedec’é como gobernante.” (Echo. 5:32) Tal obedencia ta encerá haci caso dje mandato pa “predicá na e pueblo i pa duna un testimonio cabal.” (Echo. 1:8; 10:42) Pues, aunke ta cierto cu nos tin mester dje spiritu di Dios pa fortalecé nos pa predicá, ta cierto tambe cu segun cu nos ta demostrá nos deseo di kier agradá Jehova, mas e ta yuda nos. Laga nos nunca minimisá e importancia di dal e promé pasonan di obedencia di buena gana!
8 Con pa Yuda Esnan Yong: Mayornan, boso a mira evidencia cu boso yunan kier papia cu otro hende tocante e berdad? Nan ta compañá boso den sirbishi di veld? Nan comportacion ta ehemplar? Si ta asina, di con vacilá? Acercá un dje miembronan dje Comité di Sirbishi di Congregacion, i wak si boso yu ta cualificá pa ser contá como publicadó e april akí. (Wak e buki Nos Ministerio, página 99-100.) Reconocé cu boso yunan por contribuí den un manera poderoso na e gritu di alabansa na Jehova durante e temporada aki di Memorial.—Mat. 21:15, 16.
9 Un mama cristian na Georgia, Merca, semper a animá su yu muher hobencita pa papia cu otro hende tocante Jehova. Aña pasá ora cu e mucha muher tabata trahando den e ministerio cu su mama, el a laga un foyeto Rekerí cu un homber i a splica brevemente e página di contenido. E homber a puntr’é: “Cuantu aña bo tin?” E di: “Shete.” E homber a keda sorprendí di mir’é duna un presentacion asina significativo. Pa casualidad, e homber ei a lanta den ambiente dje berdad, pero nunca e no a acept’é seriamente como un manera di biba. No a tarda hopi cu nan tabata conducí un studio di Bijbel cu e homber, su señora i su yu muher.
10 Hopi mucha ta publicadó caba, i nos ta disfrutá di nan compania ora nan traha huntu cu nos den sirbishi. E muchanan aki por motivá i animá otro mucha di nan mes edad. Pero tambe april ta un bon tempu pa famianan individual fortalecé nan laso familiar i edificá spiritualidad dor di traha huntu den sirbishi sagrado. Cabesnan di famia mester hiba delantera den esaki.—Pro. 24:27.
11 Con pa Yuda Esnan Nobo: Ke tal di esnan nobo cu ken bo ta studiando Bijbel? Kisas nan por contribuí na e esfuerso special di april akí? Podisé nan a expresá e deseo di conta otro hende loke nan tabata siña ora boso a trata capítulo 2, §22, of capítulo 11, §14, dje buki Conocimentu. Si boso ta yegando na fin dje buki, prepará pa considerá e asuntu aki bon cla ora bo ta trata capítulo 18, §8, cu ta bisa: “Probablemente bo ta ansioso pa conta bo famianan, amigunan, i otronan loke bo ta siñando. En realidad, kisas ya caba bo ta haciendo esaki, asta mescos cu Jesus a compartí e bon nobo cu otro hende den un forma informal. (Lucas 10:38, 39; Juan 4:6-15) Awor kisas bo kier haci mas.” Esaki ta e caso cu e personanan cu bo ta studia cuné?
12 Bo studiante ta kere e Palabra di Dios? E ta aplicando principionan bíblico? El a pone su bida na armonia cu normanan divino? E ta asistí na reunionnan di congregacion? E kier sirbi Jehova Dios? Anto pakico no anim’é pa papia cu e ancianonan i asina nan por determiná si e ta cualificá pa bira un publicadó no-bautisá i traha huntu cu bo durante april? (Wak e buki Nos Ministerio, página 97-9.) Asina e por cuminsá experenciá personalmente con e organisacion di Jehova lo apoy’é den su esfuerso pa sirbi Jehova.
13 Ta berdad cu algun studiante ta progresá mas lihé cu otro. Pues, di acuerdo cu e instruccion duná den Nos Ministerio di Reino di juni 2000, página 4, §5 i 6, hopi ruman ta studiando un di dos buki cu hende cu a manifestá interes inicialmente, pero cu tabatin mester di mas yudansa pa por asociá activamente. Nunca nos no ta perde speransa cu e personanan aki di curason onrado lo bira berdadero disipel di Cristo, “sea den poco tempu of hopi tempu.” (Echo. 26:29) Sin embargo, si por describí e cantidad di luna cu bo tin ta studia cu e persona ei como “hopi tempu,” e temporada aki di Memorial lo no ta un bon chens pa bo studiante cuminsá demostrá con profundo su aprecio pa e rescate di Cristo ta?
14 Con pa Yuda Nan Participá: Nos ta siña hopi tocante con pa yuda esnan cualificá cuminsá den e ministerio dor di examiná e manera cu Jesus a entrená otro hende. E no a djis busca un multitud i manda su apostelnan bai cuminsá papia. Promé el a enfatisá e necesidad dje trabou di predicá, caba el a animá un actitud di haci oracion, i despues el a percurá tres cos básico pa nan: un partner, un teritorio asigná i un mensahe. (Mat. 9:35-38; 10:5-7; Mar. 6:7; Luc. 9:2, 6) Abo por haci mescos. Sea cu bo ta yudando bo propio yu, un studiante nobo of un persona cu no a raportá pa basta tempu, lo ta apropiado pa haci un esfuerso special pa alcansá e siguiente metanan.
15 Enfatisá e Necesidad: Inculcá den e persona e importancia dje trabou di predicá. Sea positivo tocante e trabou. Relatá experencianan cu ta mustra kico e congregacion ta logrando den e ministerio. Desplegá e spiritu cu Jesus a expresá na Mateo 9:36-38. Animá e prospectivo publicadó of persona inactivo pa haci oracion tocante su participacion personal den e ministerio i tambe p’e éxito dje trabou mundialmente.
16 Animá e Persona pa Pensa Riba e Hopi Oportunidadnan Cu Tin pa Duna Testimonio: Mencioná e posibilidad di reuní cu e grupo di studio di buki pa predicá di cas pa cas. Papia cuné tocante combersá cu famia i conocínan of cu coleganan of compañeronan di scol durante pausa. Ora di move cu transporte público, bo por cuminsá un combersacion hopi bes djis dor di mustra interes personal den otro pasahero. Ora nos tuma e iniciativa, hopi bes esaki ta crea un chens pa duna un bon testimonio. Di berdad tin hopi ocasion cu nos por compartí nos speransa cu otro hende “dia tras dia.”—Sal. 96:2, 3.
17 Pero probablemente ta preferibel pa abo cu e publicadó nobo traha huntu di cas pa cas mas pronto posibel. Si bo a pone e meta pa aumentá bo sirbishi durante april, pidi e sirbidó di teritorio si tin un teritorio cumbiniente disponibel. Si ta asina, esaki lo duna bo chens pa trah’é cabalmente. Por ehempel, ora bo caba cu sirbishi of ta bai reunion of otro lugá, kisas bo ta ripará un persona na cas caminda anteriormente bo no a haña hende of caminda nan a mustra interes. Si ta apropiado, haci un bishita corticu ora cu lo ta mas eficas. Esaki na su turno lo contribuí na un sintimentu di logro i goso den e ministerio.
18 Prepará un Mensahe Atractivo: E deseo di compartí e mensahe di Reino ta un cos, pero ta completamente un otro cos pa e persona sintié cu confiansa tocante su manera di comunicá, foral si e ta nobo of tin hopi tempu sin ta sali den sirbishi. Tempu cu bo dedicá na yuda esnan nobo i inactivo prepará, ta un bon inversion. Reunionnan di Sirbishi i reunionnan pa sirbishi di veld por percurá ideanan útil, pero no tin substituto pa preparacion personal.
19 Con bo por yuda esnan nobo prepará pa sirbishi? Cuminsá cu un presentacion pa revista, i ten’é simpel i breve! Pidi nan pensa riba sucesonan di noticia cu lo interesá hende den e teritorio, anto busca un punto den un dje revistanan actual cu ta relacioná cu esei. Practicá e presentacion huntu, i us’é den e ministerio mas pronto posibel.
20 Desaroyá Nos Potencial pa Futuro Aumento: Aña pasá e asistencia mundial na Memorial tabata mas cu 14,8 miyon hende. E cantidad di publicadó cu a raportá tabata un poco mas cu seis miyon. Esaki ta nificá cu 8,8 miyon hende tabatin suficiente interes pa bini na e programa special aki caminda nan a tende un splicacion di un dje siñansanan principal di Bijbel. Nan a cera conocí cu algun di nos personalmente, loke probablemente a laga un bon impresion riba nan. Hopi di nan ta papia bon di nos, ta contribuí cu nos obra mundial i ta defendé nos dilanti otro hende. E grupo grandi aki ta representá un potencial pa futuro aumento. Kico nos por haci pa yuda nan haci mas progreso?
21 Mayoria hende nobo cu asistí na Memorial ta bini pasobra un di nos a invitá nan personalmente. Generalmente esaki kier men cu nan tin por lo ménos un conocí den auditorio. Si un persona asistí riba nos invitacion, nos tin e responsabilidad pa lagu’é sintié bon biní i yud’é beneficiá plenamente dje programa. Como cu e salon lo ta yen, yud’é haña un caminda pa sinta. Fi’é un Bijbel, i invit’é wak huntu cu bo den buki di cantica. Contestá cualkier pregunta cu e por haci. Bo caluroso atencion personal por ta un factor principal den cultivá su interes. Claro cu nos tur ta compartí e responsabilidad aki, p’esei si nos mira un cara desconocí, extendé un caluroso bon biní i combersá brevemente pa cera conocí.
22 Asistencia na Memorial por tin un berdadero impacto riba un persona su forma di pensa. E echo cu el a bini e reunion kisas ta indicá cu e no a haña loke e ta buscando otro caminda i cu nos ta ofrecé algu cu e ta sinti un necesidad di examiná mas a fondo. E splicacion dje maraviyoso percuracion di rescate por ta un revelacion profundo pa un persona cu no tin idea di Jehova su amor infinito. Kisas e ta mira mesora cu nos ta distinto: sincero, amigabel, amoroso i respetuoso. Nos salon no tin nada cu ta parce loke kisas el a mira den iglesianan cu tin imágen i ritonan sin sentido. Esnan nobo lo ripará sigur cu e auditorio ta consistí di hende di tur ramo di bida i cu no ta pasa colect. Mirando tur e cosnan aki por ta un incentivo potente pa nan bolbe bini.
23 Despues di Memorial, mester tin un hende prepará pa duna yudansa na tur persona nobo cu a asistí. Si bo a invitá hende nobo, bo tin un responsabilidad special. Promé cu nan bai, haci sigur cu nan sa dje otro reunionnan cu tin na Salon di Reino. Mencioná e título dje siguiente discurso público. Laga nan sa e lugá i ora dje Studio di Buki di Congregacion cu tin mas cerca di nan cas. Despues, duna nan un foyeto Trinidad i splica nan tocante kico e consideracion lo ta. Splica di con henter e congregacion ta planea pa asistí na un congreso di distrito cu ta programá den futuro cercano.
24 Haci areglo pa un bishita cordial na nan cas. Haci sigur cu nan tin un ehemplar dje foyeto Rekerí i e buki Conocimentu, cu ta laga nan cera conocí cu e siñansanan fundamental di Bijbel. Si nan no ta studiando ainda, ofrecé nan un studio bíblico. Sugerí pa nan lesa e foyeto Testigonan di Jehova—Ken Nan Ta? Kico Nan Ta Kere? (publicá na spañó i ingles), cu ta presentá un cuadro cla dje manera cu nos ta funcioná como organisacion. Invitá nan pa wak nos videonan, manera esun titulá Henter Nos Asociacion di Ruman. Haci areglo pa nan topa otro hende dje congregacion. Den e lunanan binidero, keda tene contacto cu esnan nobo; invitá nan pa asistí na reunion ora e superintendente di circuito ta di bishita of ora bo tin asamblea di circuito of dia special di asamblea. Duna nan tur oportunidad pa demostrá cu nan ta “corectamente dispuesto pa bida eterno”!—Echo. 13:48.
25 Loke e Ancianonan Por Haci: Cu e esfuerso intensificá den e ministerio e april akí lo tin éxito of no, lo bai dependé pa gran parti dje ancianonan. Si bo ta un conductor di studio di buki, traha un lista dje cosnan cu bo por haci pa yuda tur hende den bo grupo participá den e actividadnan special. Tin personanan asigná na bo studio di buki cu ta yong, nobo, iregular of inactivo? Chek pa wak si mayornan, pioneronan of otro publicadónan a tuma iniciativa pa yuda nan. Percurá sea cual sea ta e yudansa personal cu abo mes por ofrecé. Un ruman muher cu tabatin dos aña iregular den sirbishi di veld, a pasa mas cu 50 ora den e ministerio april aña pasá. Kico a trece e cambio aki? El a bisa cu esei tabata e bishitanan di pastoreo edificante cu e ancianonan a haci.
26 Anciano i sirbidónan ministerial mester cooperá pa haci sigur cu tin suficiente teritorio, revista i literatura pa e luna binidero. Por haci areglo pa tene mas reunion pa sirbishi di veld? Si ta asina, laga e rumannan sa dje areglonan aki. Riba tur cos, den boso oracionnan privá i público, pidi Jehova su bendicion riba nos luna di mayor actividad di Reino.—Rom. 15:30, 31; 2 Tes. 3:1.
27 April aña pasá den un congregacion na Nort Carolina, e ancianonan a ègt animá e rumannan pa nan tin mayor actividad den e ministerio. Tur siman na reunion, nan a animá e publicadónan pa considerá huntu cu oracion si nan lo por inscribí como pionero auxiliar. Na tur oportunidad, tur den e cuerpo di sirbidó a papia cu entusiasmo tocante con pa haci april e mihó luna cu nunca. Como resultado, 58 porciento dje publicadónan a traha pionero e luna ei, incluso tur anciano i sirbidó ministerial!
28 E Goso di Participá Plenamente: Cua ta e bendicionnan di ‘traha duru i haci esfuerso’ den e ministerio? (1 Tim. 4:10) Relacioná cu nan congregacion su actividad celoso durante april aña pasá, e ancianonan mencioná ariba a skirbi: “E rumannan ta papia hopi bes di cuantu mas amor pa otro i con mas cerá cu otro nan ta sinti nan desde cu nan a cuminsá traha mas tantu den e ministerio di veld.”
29 Un ruman homber cu no por move mashá tabata anhelá di por participá den e actividad special durante april aña pasá. Dor di planea cuidadosamente i cu yudansa di su mama i rumannan spiritual, el a disfrutá di un luna productivo como pionero auxiliar. Con el a haña e experencia ei? E di: “Pa promé bes den mi bida mi a sinti manera un homber físicamente fuerte.”
30 No tin duda cu Jehova ta bendicioná ricamente esnan cu tin sumo aprecio pa nan privilegio di papia tocante su gobernacion real. (Sal. 145:11, 12) Segun cu nos ta conmemorá e morto di nos Señor, nos ta comprendé cu e bendicionnan pa debocion na Dios lo ta asta mas abundante den futuro. Apostel Pablo a anhelá e recompensa di bida eterno mashá. Sin embargo, e tabata sa cu esaki no ta algu cu e por a djis sinta man crusá i spera riba dje. El a skirbi: “P’esei mes en berdad mi ta trahando duru, haciendo esfuerso di acuerdo cu e funcionamentu di dje i cu ta obra den mi cu poder.” (Col. 1:29) Mediante Jesus, Jehova a haci Pablo poderoso pa efectuá un ministerio cu ta salba bida, i E por haci mescos pa nos awe. Esei lo ta bo experencia personal e april akí?
[Box on page 3]
Ken Abo Por Animá pa Predicá den April?
Bo yu?
Un studiante di Bijbel?
Un persona cu a bira inactivo?