Keda Kontentu ku Loke Bo Tin
1 E Skritura ta mustra nos ku nos tin deber di perkurá materialmente pa nos hendenan di kas, pero esaki no mester bira nos meta prinsipal den bida. Kosnan spiritual mester ta na promé lugá. (Mat. 6:33; 1 Tim. 5:8) Den e “tempunan trabahoso” aki ta difísil pa haña e balansa korekto. (2 Tim. 3:1) Kiko lo yuda nos logra esei?
2 Adoptá e Punto di Bista di Beibel: E Palabra di Dios ta spièrta nos ku korementu tras di plaka por kousa ruina spiritual. (Ekl. 5:10; Mat. 13:22; 1 Tim. 6:9, 10) Den e tempu krusial aki, un bida demasiado okupá ku trabou òf ku preokupashonnan finansiero ku ta pone aktividatnan spiritual—reunionnan, studio i sirbishi—na di dos lugá, lo por ta spiritualmente desastroso. (Luk. 21:34-36) Na kontraste Beibel ta bisa: “Si nos tin kuminda i paña pa bisti [i dak, NW], ku esakinan nos mester ta kontentu.”—1 Tim. 6:7, 8.
3 Esaki no kier men ku kristiannan mester opta pa hiba un bida di pobresa. Pero e konseho ei ta yuda nos rekonosé kiko realmente ta nos nesesidatnan material: kuminda, paña pa bisti i dak adekuá pa nos área. Si nos tin e nesesidatnan di bida, nos no mester sigui buska kontinuamente pa haña mas i mihó kosnan. Ora nos tin pensá pa kumpra algu òf pa tuma trabou èkstra, ta bon pa nos puntra nos mes: ‘Esaki ta ègt nesesario?’ Esei lo yuda nos hasi kaso di e konseho inspirá: “Laga boso karakter ta liber di amor pa plaka i sea kontentu ku loke boso tin.”—Heb. 13:5.
4 Si nos ta konfia den Yehova, lo e yuda nos. (Pro. 3:5, 6) Ounke nos tin ku traha duru pa kubri nos nesesidatnan di tur dia, nos no ta laga nos bida drai rònt di e kosnan ei. Sea ku nos tin tiki òf hopi, nos ta stèns riba Yehova p’e satisfasé nos nesesidatnan. (Fil. 4:11-13) Komo resultado, nos ta gosa di e felisidat ku Dios ta duna i tambe di hopi otro bendishon.
5 Imitá e Fe di Otro Rumannan: Un mama soltero ku tabata kria su yu muhé den e kaminda di e bèrdat, a simplifiká su bida gradualmente. Ounke el a disfrutá di e komodidatnan di su kas, el a muda bai un kas mas chikí i despues pa un apartamento. Esaki a pone ku e por a traha ménos ora na trabou i dediká mas tempu na sirbishi. Despues ku su yu muhé a bira grandi i a kasa, e mama a bai ku penshon adelantá, maske ku esaki a nifiká mas redukshon di su entrada. Awor nos ruman tin shete aña ta traha pionero regular i no ta duel e ku el a hasi sakrifisio material pa por a pone e Reino di Dios na promé lugá den su bida.
6 Un ansiano ku su kasá a traha pionero pa hopi aña miéntras ku nan a lanta tres yu. Komo famia nan a siña satisfasé nan nesesidatnan na lugá di nan deseonan. I nan a keda kontentu ku esei. E ruman hòmber ta bisa: “Nos tabatin ku biba mas simpel. Ounke tabatin biaha ku nos a pasa den pèrtá, Yehova semper a perkurá loke nos tabatin mester. . . . Ora mi mira e manera ku mi famia ta pone asuntunan spiritual na promé lugá, mi ta sinti ku ta asina kos mester ta i ku mi a logra algu.” Su esposa ta agregá: “Ora mi mira [mi kasá] okupá ku asuntunan spiritual, mi ta sinti un satisfakshon profundo.” E yunan tambe ta kontentu ku nan mayornan a disidí di sirbi Yehova tempu kompleto.
7 Beibel ta primintí hopi bendishon tantu awor komo den e bida ku ta bin na tur esnan ku skohe un bida di deboshon na Dios en bes di kore tras di kosnan material.—1 Tim. 4:8.