Sea Armoniosamente Uní
1 Kuantu biaha bo no a keda asombrá ku e diseño maestral di kurpa humano? (Sal. 139:14) Kada miembro di hende su kurpa ta traha na armonia ku otro. E Palabra di Dios ta kompará e kongregashon kristian ku un kurpa bon kordiná. Bou di e Kabes, Kristu, tur miembro di e kongregashon ta “bon hinká den otro [armoniosamente uní huntu, NW] i tení huntu pa medio di loke kada skarnir ta kontribuí.” (Efe. 4:16a) Pues di e manera ei Yehova por usa su pueblo uní pa logra kosnan maravioso.
2 Miembronan di e kongregashon di promé siglo a aktua “di ún akuerdo” pa atendé e nesesidatnan spiritual i físiko di otro. (Echo. 2:44-47) Ku e apoyo di Yehova, nan den un forma uní a konfrontá i vense oposishon feros. (Echo. 4:24-31) Nan a deklará e mensahe di Reino na unda ku nan a bai, i a kubri e parti di mundu ku tabata konosí e tempu ei ku e bon nobo. (Kol. 1:23) Den tempu aktual, e kongregashon kristian den un forma uní a logra e mesun kosnan aki, riba un eskala asta mas grandi. Kua ta e faktornan ku a kontribuí na e unidat aki?
3 Siñansa di Dios Ta Uni Nos: Rònt mundu nos ta uní mediante nos adorashon. Kon esaki ta posibel? Nos ta rekonosé Yehova su kanal visibel pa perkurá ‘kuminda spiritual na su debido tempu.’ (Mat. 24:45) Tambe nos ta apresiá e “donnan na hende” ku el a duna komo maestro den e kongregashon. Segun ku nos ta aseptá humildemente Yehova su areglonan pa alimentá nos den sentido spiritual, nos komprendementu di e Palabra di Dios ta oumentá i ta lanta un deseo den nos tur pa imitá Hesus i su disipelnan. Nos tin ku sigui studia e Palabra di Dios, hasiendo esfuerso sinsero pa “yega na e unidat di fe.” (Efe. 4:8, 11-13) Abo ta promové nos unidat spiritual dor di lesa Beibel tur dia?
4 Uní dor di Asosiashon Kristian: Amor ta trese nos huntu den asosiashon estrecho na reunionnan kristian. Na e reunionnan aki nos ta “paga tinu na otro.” (Heb. 10:24, 25, Beibel na papiamentu koriente) Esei ta enserá ku nos no ta djis wak e aparensia djafó di nos rumannan, sino di bèrdat ta siña konosé nan, i mira nan manera Yehova ta mira nan, komo presioso. (Hag. 2:7, NW, nota na pia di pág.) Segun nos ta skucha nan ekspreshonnan di fe, nos amor pa nan ta bira mas profundo i nos unidat ta bira mas fuerte. Bo ta konosí komo un persona ku ta asistí regularmente na e reunionnan di kongregashon?
5 Kompañeronan di Trabou den Fèlt: Prediká e bon nobo huntu ku otro rumannan kreyente ta uni nos den hasimentu di e boluntat di Dios. Apòstel Pablo a apresiá su “kompañeronan di trabou pa e reino di Dios.” (Kol. 4:11) Konta eksperensia i yuda otro den sirbishi ta yuda nos kumpli ku nos enkargo kristian i ta hasi nos laso di union mas fuerte.—Kol. 3:14.
6 Spiritu Santu Ta Kontribuí na Unidat: Segun ku nos ta hasi Yehova su boluntat ku diligensia, e ta bendishoná nos ku su spiritu. Esaki ta yuda nos plakia desakuerdonan i biba huntu den armonia. (Sal. 133:1) E ta motivá nos “pa preservá e unidat di e spiritu den e vínkulo di pas.” (Efe. 4:3) Nos kada un por kontribuí na e armonia ku ta eksistí den e pueblo di Dios dor di desplegá e frutanan di spiritu den nos trato ku otro.—Gal. 5:22, 23.
7 Sirbi huntu unidamente bou di Kristu komo kabes “ta kousa e kresementu di e kurpa pa edifikashon di su mes den amor.” (Efe. 4:16) Ademas, esei ta glorifiká Yehova, “e Dios di pas.”—Rom. 16:20.