Pone Metanan Spiritual
1 Lo ta un privilegio grandi si nos por alabá Yehova pa eternidat! Pa yuda nos alkansá e meta ei, nos tin ku pone metanan spiritual mas aktual i traha pa logra nan. Esaki ta yuda nos usa nos energia na un manera sabí. (1 Kor. 9:26) Ki metanan lo ta realístiko pa bo?
2 Studia Beibel: Bo ta prepará tur reunion di kongregashon? Si ta asina, bo ta apartá tempu pa hasi investigashon i pa meditá ora bo ta studia? Por ehèmpel, ora bo ta prepará pa e Studio di Toren di Vigilansia i pa e Studio di Buki di Kongregashon di tur siman, bo ta djis hala strepi bou di e kontestanan òf bo ta buska e tekstonan sitá i tambe ta pensa riba e motibunan di e splikashonnan duná? Lo bo por pone komo meta pa tur siman bo investigá un par di punto for di e lesamentu di Beibel asigná pa e Skol di Ministerio Teokrátiko? Pa bo hasi e tipo di investigashon spiritual aki ta tuma tempu i esfuerso, pero e ta trese gran rekompensa spiritual.—Pro. 2:4, 5.
3 Reunionnan di Kongregashon: Un otro meta ta pa asistí na tur sinku reunion di kongregashon ku regularidat. Nos por yuda drecha e spiritu di e kongregashon dor di yega sufisiente trempan pa por asosiá ku kompañeronan di fe i partisipá den e kantika i orashon di apertura. Tambe nos por hasi esfuerso pa komentá na tur reunion i purba mehorá nos komentarionan. Podisé bo por komentá kon un teksto bíbliko den e paragraf ta relashoná ku loke ta ser tratá òf bo por indiká kon e informashon ta apliká den nos bida di tur dia.—Heb. 10:24, 25.
4 Sirbishi di Fèlt: Nos sirbishi ta drecha hopi ora nos pone meta. Bo tin un meta personal di kuantu ora bo kier traha den sirbishi tur luna? Tin publikadó ta haña ku esei ta yuda nan. Òf bo por mehorá un sierto aspekto di bo sirbishi, manera por ehèmpel usa bo Beibel den e aktividat di kas pa kas, hasi rebishitanan mas efikas, hasi esfuerso pa kuminsá un studio di Beibel òf ser mas efikas ora di kondusí studio?
5 Mayornan, boso ta enkurashá boso yunan pa pone meta relashoná ku e sirbishi di Yehova? Yuda nan mira ku un ekselente manera pa demostrá kuantu apresio nan tin pa Yehova ta dor di sirbi komo pionero, misionero òf komo miembro di e famia di Bètel.—Ekl. 12:1.
6 Segun ku nos ta analisá nos aktividatnan, ta pone metanan spiritual, i ta traha pa alkansá nan, nos lo haña mas goso den nos sirbishi i nos lo ta un fuente di animashon pa otro rumannan.—Rom. 1:12.