Kaha di Pregunta

◼ Na ki momentu ta apropiá pa forma un grupo di otro idioma?

Ora tin basta hende di un otro idioma ta biba den e teritorio di un kongregashon, e ansianonan tin ku hasi loke nan por pa organisá e trabou di prediká den e idioma ei. (km-PA 7/02 pág. 1; km-PA 2/98 pág. 3-4) Kisas e hendenan di e idioma ei ta plamá den henter e teritorio di dos òf mas kongregashon bisiña. Den tal kaso, e superintendente(nan) di sirkuito lo duna e guia nesesario, i asina yuda e kongregashonnan enbolbí pa koperá ku otro den e aktividat di prediká. Tempu-tempu, por hasi areglo pa tene un diskurso públiko òf un Studio di Toren di Vigilansia pa haña sa kuantu hende lo asistí na e reunion di e otro idioma.

E siguiente rekisitonan ta determiná na ki momentu por forma un grupo di otro idioma: (1) Tin publikadó òf hende interesá ku ta komprondé e bon nobo mas mihó den e otro idioma. (2) Un ansiano òf sirbidó ministerial kualifiká ta disponibel pa hiba delantera i dirigí por lo ménos un reunion pa siman. (3) Un kuerpo di ansiano ta dispuesto pa sostené e grupo. Si tur e tres puntonan aki ta aplikabel, e ansianonan tin ku informá ofisina di sukursal pa asina por rekonosé e grupo ofisialmente i por duna nan mas instrukshon.

Mayoria grupo ta kuminsá tene e Studio di Buki di Kongregashon tur siman. Despues, e ansianonan por duna aprobashon pa nan tene mas reunion, manera e Reunion Públiko i e Studio di Toren di Vigilansia. Por tene asignashon Num. 2, 3, i 4 di e Skol di Ministerio Teokrátiko den un otro sala si tin un ansiano òf sirbidó ministerial kualifiká ku por papia e idioma pa sirbi komo konsehero. Sin embargo, e grupo lo reuní huntu ku e kongregashon pa e diskurso di kualidat di papia, diskurso di instrukshon, puntonan sobresaliente di Beibel i Reunion di Sirbishi. Tambe por hasi areglo pa e grupo por tin reunion pa sali den sirbishi di vèlt.

Tur esnan den e grupo tin ku traha direktamente bou di e supervishon di e kuerpo di ansiano. E ansianonan mester duna guia balansá i tuma inisiativa pa perkurá pa e nesesidatnan di e grupo. Ora e superintendente di sirkuito bishitá e kongregashon ku ta sostené e grupo, lo e hasi areglo tambe pa traha ku e grupo pa e por edifiká nan spiritualmente. Ku Yehova su bendishon, e grupo di otro idioma ku tempu lo por bira un kongregashon.