Un Atake di Kabayeria Ku Ta Enbolbé Bo
1 “E di seis angel a toka” su tròmpèt. Despues di esei, un kantidat di ‘dos shen mion ehérsito di hòmber riba kabai’ a saka un zonidu manera bos. Esaki no ta kualke forsa militar. “Kabes di e kabainan ta manera kabes di leon.” Kandela, huma i suafel ta sali for di nan boka, i nan “rabunan ta manera kolebra.” E atake simbóliko di kabayeria aki ta laga un destrukshon su tras. (Rev. 9:13-19) Bo sa di ki manera abo ta enbolbí den kumplimentu di e vishon profétiko remarkabel aki?
2 E restu ungí i nan kompañeronan, e otro karnénan, unidamente ta proklamá Dios su huisionan. Resultado di esaki ta ku kristiandat su kondishon spiritual morto ta ser eksponé abiertamente. Laga nos analisá dos rasgo di e vishon profétiko aki ku ta enfatisá e motibu pakiko e sirbishi di Dios su sirbidónan ta asina efektivo.
3 Siñá i Ekipá pa Hiba e Mensahe di Dios: Mediante e Skol di Ministerio Teokrátiko i otro reunionnan di kongregashon, Dios su sirbidónan ta ser siñá pa deklará e mensahe di Dios ku outoridat. Imitando Hesus i su disipelnan, nan ta sali en buska di esnan digno, predikando tur kaminda ku nan por haña hende. (Mat. 10:11; Mar. 1:16; Luk. 4:15; Echo. 20:18-20) E método pa prediká aki ta basá riba Beibel i el a resultá masha efikas!
4 Kumpliendo ku nan asignashon di prediká ku Dios a duna nan, predikadónan kristian a distribuí míles di miónes di Beibel, foyeto i revista. E publikashonnan aki ta ser publiká den kasi 400 idioma, i nan ta trata un gran variedat di tema presentá na un manera ku ta atraé vários klase di hende. Bo ta hasiendo bon uso di e instrumentonan aki?
5 Guia i Apoyo Selestial: Tambe e vishon profétiko ta laga nos komprondé bon kla ku e aktividat ku e atake simbóliko di kabayeria aki ta representá, tin apoyo di Dios. (Rev. 9:13-15) E trabou di prediká ta ser efektuá rònt mundu, no mediante sabiduria òf poder humano, sino mediante e spiritu di Dios. (Zak. 4:6) Yehova ta usa angelnan pa dirigí e trabou aki. (Rev. 14:6) Pues, huntu ku e esfuerso di Testigunan humano, Yehova ta perkurá apoyo selestial pa atraé hende mansu na dje.—Juan 6:45, 65.
6 Dor ku e pueblo di Yehova ta siñá i bon ekipá pa hiba Dios su mensahe, i ta traha bou di guia di angelnan, nan ta un ehérsito iresistibel, nada no por stòp nan. Laga nos sigui kumpli ku nos papel den kumplimentu di e vishon profétiko emoshonante aki.
[Study Questions]
1, 2. Den ki manera Dios su sirbidónan djawe ta enbolbí den kumplimentu di e vishon profétiko ku nos ta haña na Revelashon 9:13-19?
3. Ki entrenamentu bo a risibí pa deklará e mensahe di Dios na un manera efikas?
4. Ki instrumentonan hopi publikadó tin na nan disposishon pa yuda nan kumpli ku nan trabou?
5, 6. Kiko ta indiká ku Yehova su pueblo tin apoyo selestial?