“Laga Nos Halsa Su Nòmber Huntu”
1 “O engrandesé SEÑOR ku mi, i laga nos halsa su nòmber huntu,” e salmista a kanta. (Sal. 34:3) Nos binidero Kongreso di Distrito “Kana ku Dios” lo duna nos e oportunidat pa halsa Yehova su nòmber huntu ku nos rumannan di hopi kongregashon. Bo a hasi areglo pa bo tin transpòrt i tambe dia liber di trabou? Ta sabí pa nos hasi e kosnan aki hopi tempu di antemano.—Pro. 21:5.
2 Ora Nos Yega e Sitio di Kongreso: Tin hopi kos ku nos tin ku tene kuenta kuné pa nos por asistí na un kongreso. Si nos sali trempan nos lo por hèndel ku kosnan inesperá ku por tarda nos. Ademas nos lo tin tempu pa buska un lugá di sinta i partisipá di henter kurason den e kantika i orashon di apertura. (Sal. 69:30) Un par di minüt promé ku e seshon kuminsá, e presidente lo ta sintá riba plataforma miéntras ku ta toka e músika di Reino di introdukshon. E ora ei nos tur mester tuma asiento pa asina e programa por kuminsá na un manera digno.—1 Kor. 14:33, 40.
3 E Palabra di Dios ta konsehá nos pa ‘laga tur loke nos hasi, wòrdu hasí ku amor.’ (1 Kor. 16:14) Ora ku habri porta 8’or di mainta, nos lo mustra konsiderashon ku otro hende dor di no kore, ansha ni pusha pa nos por haña nos asiento preferí promé ku otro hende koh’é. Bo por warda asiento solamente pa esnan ku ta bin ku bo den e mesun vehíkulo òf ku ta biba den e mesun kas ku bo.—1 Kor. 13:5; Fil. 2:4.
4 En bes di bandoná e sitio di kongreso pa bai buska kuminda durante e pousa di mèrdia, por fabor, bini ku bo almuerso. Esaki lo duna bo chèns di disfrutá di asosiashon edifikante i pa ta presente for di komienso di e seshon parti atardi. Si ta nesesario, bin ku un djùk ku por bai bou di bo stul. No ta permití pa bin ku djùk grandi di piknik, artefaktonan di glas, ni bebida alkohóliko den e fasilidatnan di kongreso.
5 Un Bankete Spiritual Ta Spera Nos: Rei Josafat tabata un persona ku “a dediká [prepará su] kurason pa buska Dios.” (2 Kró. 19:3) Kon nos por prepará nos kurason promé ku e kongreso? E artíkulonan riba e último página di e ¡Despertad! di 22 di mei i e Spièrta! di 8 di yüni lo duna un bista adelantá di e bankete spiritual ku lo ser sirbí. Pakiko no tuma tempu pa reflekshoná riba e artíkulonan ei, i kuminsá antisipá loke Yehova tin wardá pa nos? Prepará nos kurason ta enserá tambe pidi Yehova yuda nos kapta e sentido di e instrukshonnan ku nos lo risibí i apliká nan.—Sal. 25:4, 5.
6 Nos tur ta anhelá pa siña mas di e Palabra di Dios pasobra nos sa ku ta pa medio di dje nos por krese pa haña salbashon. (1 Ped. 2:2) P’esei, laga nos asistí na nos Kongreso di Distrito “Kana ku Dios” i ‘halsa Yehova su nòmber huntu.’—Sal. 34:3.
[Study Questions]
1. Ki oportunidat nos lo tin pa halsa Dios su nòmber huntu, i kon nos por prepará for di awor?
2. Dikon ta bon pa plania pa yega e sitio di kongreso trempan?
3. Kon bo por mustra konsiderashon ku otro hende ora di buska asiento?
4. Kiko ta e areglonan pa e pousa di mèrdia, i dikon nan ta benefisioso?
5. Kon nos ta prepará nos kurason pa e informashon ku nos ta bai risibí?
6. Kiko nos ta deseá i dikon?
[Box on page 3]
Maneranan pa Halsa Dios Su Nòmber
◼ Plania di antemano
◼ Mustra amor na otro hende
◼ Prepará bo kurason