Mustra Interes Personal—Dor di Hasi Pregunta i Skucha
1 Mayoria hende ta gusta ekspresá nan punto di bista, pero nan no ta gusta pa hende dikta pa nan kiko nan tin ku hasi ni interogá nan. P’esei, komo ministernan kristian, nos tin ku siña e arte di usa pregunta pa animá hende pa ekspresá nan mes.—Pro. 20:5.
2 Nos preguntanan mester stimulá e personanan pa pensa, no intimidá nan. Ora un ruman hòmber ta prediká di kas pa kas, e ta puntra e hendenan: “Bo ta kere ku lo yega un tempu ku hende lo trata otro ku dignidat i rèspèt?” Dependiendo di loke e persona kontestá, e ta sigui puntra: “Kiko bo ta pensa ta nesesario pa logra esaki?” òf “Dikon bo ta pensa asina?” Ora un otro ruman hòmber ta duna testimonio informal i ta prediká na lugánan públiko, e ta puntra e personanan ku tin yu: “Kiko bo ta gusta mas dje echo ku bo ta mama [òf tata]?” Kaba e ta puntra: “Kiko ta preokupá bo mas?” Ripará ku e preguntanan aki ta permití e personanan ekspresá nan punto di bista sin ku bo ta laga nan sinti nan inkómodo. Dor ku sirkunstansianan ta varia, podisé nos lo tin ku ahustá e tópiko i e preguntanan ku nos ta hasi pa esakinan por pas ku e hendenan den nos teritorio.
3 Animá Hende pa Ekspresá Nan Mes: Si e personanan ta dispuesto pa bisa bo kiko nan ta pensa, skucha nan ku pasenshi sin interumpí nan innesesariamente. (Sant. 1:19) Reakshoná bondadosamente riba nan komentarionan. (Kol. 4:6) Kisas bo por bisa simplemente: “Esei ta un punto interesante. Danki pa kompartié ku mi.” Elogiá nan si bo por hasi esei sinseramente. Na un manera bondadoso, hasi preguntanan adishonal pa bo por haña sa kiko nan ta pensa i dikon nan ta pensa asina. Buska un base komun. Ora bo ke dirigí nan atenshon riba un teksto di Beibel, lo bo por bisa: “Bo a yega di pensa riba e posibilidat aki?” Evitá di ta dògmátiko òf di diskutí.—2 Tim. 2:24, 25.
4 E manera ku otro hende ta reakshoná riba nos preguntanan ta dependé mashá di e manera ku nos ta skucha. Hende ta ripará si nos ta skucha ku berdadero interes. Un superintendente biahero a bisa: “Bo pasenshi i disponibilidat pa skucha hende tin un poder asombroso pa atraé nan, i ta a la bes un bunita ekspreshon di interes personal amoroso.” Ora nos ta skucha otro hende, de fakto, nos ta tratando nan ku dignidat, i esaki por motivá nan pa skucha e bon nobo ku nos ke kompartí ku nan.—Rom. 12:10.