Yuda Otro Hende Bira Amigu di Dios
1 Awe, hende di tur nashon ta ser siñá tokante e kamindanan di Yehova. (Isa. 2:2, 3) Sin embargo, pa e personanan aki por “duna fruta ku perseveransia,” nan tin ku siña stima Yehova. (Luk. 8:15; Mar. 12:30) Sin e amor ei, nan lo no tin e fortalesa pa resistí influensianan insaludabel ni e kurashi pa hasi loke ta korekto. Un manera pa yuda otro hende kultivá un bon relashon ku Yehova ta di yuda nan haña apresio pa su kualidatnan. Animá nan pa analisá seriamente e informashon den e buki Hala Serka Yehova.
2 Bo Ehèmpel: Bo akshonnan por tin un efekto profundo riba kurason di studiantenan di Beibel. Ora nan mira ku bo ta balorá bo amistat ku Yehova i kon esaki ta influensiá bo bida, nan por sinti nan motivá pa nan mes tambe kultivá un relashon personal asina ku Yehova. (Luk. 6:40) Sí, hopi bes nos ehèmpel tin mas efekto riba otro hende ku loke nos ta bisa.
3 Un manera prinsipal ku mayornan ta siña nan yunan stima Yehova ta mediante nan ehèmpel. (Deu. 6:4-9) Un pareha ku kier a lanta nan yunan den e bèrdat a buska konseho serka mayornan eksitoso. E esposo a bisa: “Tur hende ku mi a papia kuné tabata di akuerdo ku ehèmpel di mayornan ta importante.” Pues, mediante henter nan manera di biba, mayornan por duna nan yunan un ehèmpel bibu di loke ta nifiká ser “amigu di Dios.”—Sant. 2:23.
4 Orashon Sinsero: Otro kos ku por yuda hende bira amigu di Yehova ta di siña nan hasi orashon di kurason. Bo por hala nan atenshon n’e orashon modelo di Hesus, i tambe na e hopi orashonnan sinsero registrá den e Skritura. (Mat. 6:9, 10) Bo por siña bo yunan i studiantenan di Beibel hasi orashon mediante bo propio orashonnan. Ora nan tende bo ekspreshonnan sinsero, nan ta komprondé kiko bo ta sinti pa Yehova. Animá nan pa “perseverá den orashon” ora nan haña nan ku prueba. (Rom. 12:12, NW) Segun ku nan mes ta mira kon Yehova ta yuda den tempu di nesesidat, nan ta kuminsá konfia den dje i stim’é manera un berdadero amigu.—Sal. 34:8; Fil. 4:6, 7.