Sigui e Kristu dor di Manifestá Dignidat
1 Beibel ta bisa ku e Soberano Universal, Yehova, ta bistí ku dignidat. (Sal. 104:1, NW) Hesus semper a papia i aktua na un manera ku a onra su Tata i tambe e areglonan di su Tata. (Juan 17:4) Nos kada un lo tin oportunidat pa imitá Hesus i duna gloria na Yehova durante nos binidero Kongresonan di Distrito “Sigui e Kristu!”
2 Adorashon ku Dignidat: Nos por onra Yehova ora nos ta sòru pa nos ta presente na e bankete spiritual ku el a prepará pa nos. Bo a papia ku bo doño di trabou i a regla bo asuntunan pa bo por asistí riba tur e dianan di kongreso, inkluso djabièrnè? Bo a plania pa yega sufisiente trempan pa bo por haña un lugá di sinta i partisipá na e kantika i orashon di apertura? Bo a plania kiko bo ta bai kome pa asina bo por kome na e sitio di kongreso huntu ku bo rumannan? Na inisio di kada seshon, ora ku e presidente pidi nos bondadosamente pa tuma asiento promé ku e músika kuminsá, nos mester terminá nos kòmbersashonnan mesora i sinta promé ku e programa kuminsá.
3 Ora nos ta presta bon atenshon na e programa tambe nos ta onra nos Tata selestial. Despues ku un reportero a bishitá un kongreso di distrito lokal, el a bisa ku kualke opservadó lo keda impreshoná ku “e kondukta ehemplar di e personanan presente, kendenan den un silensio respetuoso i ku interes den kosnan spiritual ta presta atenshon na loke ta ser bisá.” El a komentá tambe riba “e kantidat eksepshonal di mucha . . . , ku di un manera inusual tabata komportá nan mes bon òf asta tabata buska e versíkulonan den e Beibel Santu.” Durante e seshonnan no ta tempu pa kòmbersashon innesesario, pa manda mensahe via telefòn, kome òf kana rònt den e gangnan. Hóbennan mester ta sintá huntu ku nan mayornan pa nan mayornan por yuda nan benefisiá di e programa. (Deu. 31:12; Pro. 29:15) E esfuersonan ei ta mustra rèspèt pa otro hende i apresio pa e alimento spiritual di sumo importansia ku ta ser sirbí.
4 Aparensia ku Dignidat: Hopi ruman a ekspresá nan apresio pa e rekordatorionan den e diskurso “Manifestá Dignidat Kristian na Tur Momento,” presentá na e kongreso di aña pasá. E diskurso aki a enfatisá ku sirbidónan di Dios mester hasi esfuerso pa manifestá dignidat kristian den nan manera di bisti i di peña. E aña aki atrobe nos tin ku duna atenshon serio na e asuntu aki. Nos aparensia ta reflehá nos sintimentunan pa Yehova i pa e privilegio di por ta su Testigunan. Semper nos mester bisti manera hende “ku ta teme Dios.”—1 Tim. 2:9, 10.
5 Ta ora nos ta asistí na e programa di kongreso so nos aparensia mester manifestá dignidat? Kòrda ku hopi hende lo mira nos ku nos badge ora nos ta den e área di kongreso. Nos aparensia mester distinguí nos for di e públiko en general. P’esei, asta den nos tempu liber, manera ora nos ta sali pa bai kome despues di e programa, nos tin ku bisti manera ta pas pa ministernan ku ta den e área ei pa asistí na un kongreso kristian i nos no mester bisti jeans, shòrt òf flanèl. Nos lo por duna un bon testimonio na e komunidat! Yehova ta keda kontentu ora nos aparensia ta reflehá nos papel komo minister.
6 Resultadonan Satisfasiente: Ora nos ta manifestá dignidat kristian na nos kongresonan, nos ta krea oportunidat pa duna testimonio informal i ta laga un impreshon faborabel serka esnan ku ta opservá nos. Na final di un kongreso, un funshonario a remarká: “Nunka nos a yega di mira hende ku ta komportá nan asina bon. Boso ta aktua manera Dios ta spera di nos.” Ora nos ta manifestá dignidat, nos ta demostrá rèspèt i amor pa otro i tambe nos ta glorifiká Yehova. (1 Ped. 2:12) Asina nos ta demostrá tambe nos temor pa Dios i nos apresio pa e privilegio di ser instruí pa nos Tata. (Heb. 12:28) Laga nos tur hasi esfuerso pa manifestá dignidat segun ku nos ta spera ansiosamente riba e Kongreso di Distrito di e aña aki “Sigui e Kristu!”
[Study Questions]
1. Ki konekshon e tema di e kongreso di e aña aki tin ku manifestashon di dignidat?
2. Kon nos preparashon pa ta presente na kada seshon ta onra Yehova?
3. Den ki sentido nos ta duna dignidat na nos adorashon ora nos ta presta bon atenshon na e programa?
4. Dikon nos aparensia mester manifestá dignidat ora nos ta na kongreso?
5. Kon nos por keda ku un aparensia digno durante tempu liber den e área di kongreso?
6. Menshoná e resultadonan positivo di manifestá dignidat kristian.
[Box on page 5]
Rekordatorionan pa Kongreso di Distrito
◼ Orario di Programa: E programa lo kuminsá 1:20 p.m. tur e tres dianan. Portanan ta habri for di 12:00 a.m. Ora ku e músika di Reino di introdukshon kuminsá, nos tur mester tuma asiento pa asina e programa por kuminsá na un manera digno. Djabièrnè i djasabra e programa lo kaba 9:05 p.m. i djadumingu lo e kaba 8:10 p.m.
◼ Parkermentu: Lugánan di parker lo ta grátis i lo ser okupá segun e órden di yegada. Komo ku e lugánan di parker sa ta limitá, ta bon pa nos bai mas tantu posibel huntu den un outo en bes di kada hende den su outo.
◼ Wardamentu di Asiento: Bo por warda asiento solamente pa esnan ku ta bin ku bo den e mesun vehíkulo òf ku ta biba den e mesun kas ku bo.
◼ Kuminda: En bes di bandoná e sitio di kongreso pa bai buska kuminda durante e pousa, por fabor, bini ku algu di kome. Bo por bin ku un djùk chikí ku por bai bou di bo stul. No ta permití pa bin ku djùk grandi di piknik, artefaktonan di glas, ni bebida alkohóliko den e fasilidatnan di kongreso.
◼ Donashon: Organisashon di un kongreso di distrito ta trese hopi gastu kuné. Nos por mustra nos apresio dor di hasi kontribushon boluntario pa e obra mundial na nos Salòn di Reino òf na e kongreso. Si nos ta hasi un donashon den forma di chèk na un kongreso, mester skirbí e chèk na nòmber di “Watch Tower.”
◼ Aksidente i Emergensia: Si surgi un emergensia médiko na e sitio di kongreso, por fabor, avisá un ùsher den bisindario i e lo notifiká e Departamento di EHBO. Asina nos personal kualifiká di promé ousilio ku ta na e sitio por evaluá e seriedat di e situashon i duna asistensia.
◼ Grabamentu: No tin mag di konektá ningun tipo di aparato di graba riba e sistema di koriente òf sistema di zonidu. Por usa e aparatonan aki solamente na un manera ku no ta stroba otro hende.
◼ Fragansia: Awendia mayoria di kongreso ta tuma lugá den edifisionan será kaminda nos ta dependé di èrko. P’esei, lo ta bondadoso di nos parti pa limitá uso di fragansia, kolonia i perfume fuerte ku lo por kousa reakshon alérgiko serka esnan ku tin problemanan respiratorio òf otro problema relashoná ku esaki.—1 Kor. 10:24.
◼ Formulario Por Fabor Atendé: Mester usa un formulario Por Fabor Atendé (S-43-PA) pa duna informashon relashoná ku kualke persona ku mustra interes komo resultado di testimonio informal durante e kongreso. Publikadónan mester bin kongreso ku un òf dos formulario huntu ku nan. Lo tin formulario tambe na e Departamento di Literatura na kongreso. Mester entregá formularionan yená na e Departamento di Literatura òf na e sekretario di bo kongregashon ora bo ta bèk den bo kongregashon.—Wak Nos Ministerio di Reino di febrüari 2005, página 6.
◼ Restorant: Den hopi pais ta un kustumber pa duna tep pa e servisio risibí.