Kiko Lo Bo Hasi ku Bo Bida?
1 Hopi bes hende ta hasi mucha e pregunta: “Kiko bo ke bira ora bo bira grandi?” Komo un hobensitu, kiko lo bo a kontestá? Cowboy, bombero òf un superintendente di sirkuito? Òf komo un hobensita, kiko abo lo a bisa? Bailarina, verplegster òf un misionero? Awor ku bo ta mas grandi, bo tin ku hasi bo mes un otro pregunta: ‘Kiko lo mi hasi ku mi bida?’ Bo ta kla pa disidí?
2 Pa yuda bo tuma e mihó desishon posibel, e organisashon di Yehova a produsí e DVD titulá Hóbennan Sa Puntra—Kiko Lo Mi Hasi ku Mi Bida? Por fabor wak e i pensa seriamente riba henter e kontenido, inkluso e drama, entrevistanan i e informashonnan adishonal. Den e kuadro “Menú Prinsipal” bo ta haña e kontenido.
3 Drama: Segun ku bo ta wak e drama, konsiderá e preguntanan aki: (1) Ki similaridat tin entre Timoteo ku e Skritura Griego Kristian ta papia di dje i Andre? (Echo. 16:1; 1 Tim. 4:8; 2 Tim. 1:5) (2) Kon nan a pone preshon riba Andre p’e sobresalí den atletismo, i ken a preshon’é? (3) Ken tabatin un bon influensia riba Timoteo i riba Andre, i den ki maneranan? (2 Tim. 1:1-4; 3:14, 15) (4) Ki efekto e spièrtamentu na Mateo 6:24 i Filipensenan 3:8 tabatin riba Andre i ki efekto e tin riba bo?
4 Esenanan Selektá: Despues ku bo a kaba di wak henter e drama, bolbe pasa e siguiente esenanan i kontestá e preguntanan aki. “Pablo ku Timoteo”: Kiko tabata e último konseho ku Pablo a duna Timoteo? (2 Tim. 4:5) “Duna Yehova Lo Máksimo”: Ki klase di meta spiritual bo tin? “E Desishon di Sirbi Yehova”: Unda nos por haña berdadero felisidat? “Palabranan di e Wela”: Kiko malu tin den bira un strea den e mundu di Satanas? (Mat. 4:9) “Mi No Ta Lamentá”: Ki deskubrimentu por yuda bo haña satisfakshon den bida?—Pro. 10:22.
5 Entrevista: Segun ku bo ta wak kada un di e siguiente sekshonnan, kiko bo ta mira ku abo por hasi pa duna Yehova lo mihó di bo mes? (1) “Lo Bo Dediká Bo Mes na Dios òf na Metanan sin Balor?” (1 Juan 2:17); (2) “Siña Disfrutá di Bo Sirbishi.” (Sal. 27:14); i (3) “Un Porta Habrí pa Sirbishi na Yehova.”—Mat. 6:33.
6 Mirando Bèk: Bo por kontestá? (1) Ki karera e ruman hòmber i e ruman muhé tabata sigui i dikon? (2) Kuantu éksito nan tabatin? (3) Kiko a trese un kambio grandi den kada un su bida? (2 Kor. 5:15) (4) Ki kareranan teokrátiko a remplasá nan kareranan anterior, i dikon nan a sinti ku nan no por a sigui tur dos? (5) Nan tin duele ku nan a kambia e meta prinsipal den nan bida? (6) Kiko nan a bisa ku a ègt pone bo pensa riba loke bo mester hasi ku bo bida?
7 Otro Entrevistanan: Kiko bo a siña for di e entrevistanan aki ku por yuda bo dediká bo mes mas plenamente na e sirbishi di Yehova? (1) “E Importansia di Estudio Personal,” (2) “Otro Maneranan pa Duna Testimonio,” (3) “Sirbishi di Bètel,” (4) “Entrenamentu di Galaad pa Misionero” i (5) “Skol di Entrenamentu Ministerial.” Repasá e “Indèks di Temanan Relashoná,” i lesa mas tokante tópikonan ku ta interesá bo mas tantu.
8 Pues, bo a disidí kiko lo bo hasi ku bo bida? Pablo a urgi Timoteo: “Perkurá pa [òf, “reflekshoná riba,” NW] e kosnan aki; sea dediká na nan, pa bo progreso por ta bisto pa tur hende.” (1 Tim. 4:15) Nos ta urgi bo pa hasi meskos ku loke bo a mira i tende for di e DVD aki. Pidi Yehova yuda bo tuma un desishon sabí ku realmente lo duna bo goso i satisfakshon den bida awor i un futuro rekompensador i felis.
[Box on page 6]
MENÚ PRINSIPAL
Ver Drama
Escenas (11 opshon)
Entrevistas
Ver Todas
Secciones (3 opshon)
Al Mirar Atrás
Extras (Informashon Adishonal)
Otras Entrevistas
Índice de Temas Relacionados
Subtítulos
Para Sordos
Ninguno
Pa pasa dor di e menúnan, usa e opshonnan Más ▶, ◀ Volver, i esnan den e Menú Prinsipal.