Pone e Meta pa Kondusí un Estudio di Beibel
1 “Hisa boso kara wak i mira e kunukunan, pasobra nan ta blanku pa wòrdu kosechá.” (Juan 4:35) E palabranan ei ku Hesukristu a ekspresá siguramente ta apliká na e situashon ku ministernan kristian ta konfrontá awe.
2 Ainda nan ta haña hende sinsero ku ta deseoso pa siña e kamindanan di Yehova. Esaki ta bisto na e kantidat di disipelnan nobo ku ta batisá tur aña. Kiko lo bo por hasi si bo ta realmente interesá pa kondusí un estudio di Beibel?
3 Pone un Meta: Na promé lugá, pone un meta pa kuminsá i kondusí un estudio di Beibel riba un base regular. Tene bo meta na mente segun ku bo ta partisipá den sirbishi di vèlt. Siendo ku nos asignashon kristian ta enserá prediká i tambe siña hende, nos tur tin ku buska mas oportunidat pa kondusí estudio di Beibel.—Mat. 24:14; 28:19, 20.
4 Otro Puntonan pa Tene na Mente: Orashon sinsero ta indispensabel pa publikadónan di Reino. Tin biaha nos ta haña hende ku a resa pidi yudansa spiritual. Yehova ta usa nos pa haña e hendenan ei i pa siña nan. Esei ta realmente un bendishon!—Hag. 2:7; Echo. 10:1, 2.
5 Despues ku un ruman muhé a resa pidi Yehova un estudio di Beibel, el a pone ehemplarnan di e tratado Lo Bo Kier Sa Mas Tocante Bijbel? na un sitio bisto na su trabou. Ora un señora a kohe un di e tratadonan, les’é kompletu i a kuminsá yena e kupòn, e ruman a papia kuné i e por a kuminsá un estudio di Beibel ku e señora.
6 Otro publikadónan ku tin éksito den kuminsá i kondusí estudionan di Beibel por yuda bo alkansá bo meta di kondusí un estudio di Beibel. Hasi orashon tokante bo esfuersonan pa logra un estudio di Beibel i hasi bon uso di tur yudansa disponibel pa bo por alkansá e meta aki. Podisé pronto lo bo tin e goso di por kondusí un estudio di Beibel.