Ofresé e Revistanan Ku Ta Duna Testimonio di e Bèrdat
1 E Toren di Vigilansia Anunsiando e Reino di Yehova i e revista ku ta kompañ’é, ¡Despertad!, ta keda e hèrmèntnan prinsipal di e trabou di prediká i di hasi disipel. (Mat. 24:14; 28:19, 20) Ta un goso pa nos presentá e dos revistanan oportuno aki riba un base regular segun ku nos ta partisipá den e vários rasgonan di e sirbishi di Reino.
2 Atraves di añanan nos a mira kambionan den e tamaño i kontenido di e revistanan i tambe den e métodonan ku nos ta usa pa distribuí nan. A hasi e kambionan aki ku e meta pa hasi e revistanan mas atraktivo i efikas. Asina e mensahe di Reino por alkansá kurason di ‘tur klase di hende ku lo por wòrdu salbá i yega na konosementu di e bèrdat.’—1 Tim. 2:4.
3 Kuminsando na yanüari 2006, nos a bira ábil den usa vários presentashon pa ofresé ún edishon mensual di ¡Despertad! Awor nos lo bai usa e mesun método pa ofresé ún di e dos edishonnan mensual di E Toren di Vigilansia Anunsiando e Reino di Yehova den nos sirbishi públiko. Riba e último página di Nos Ministerio di Reino tin presentashonnan sugerí pa kada revista. Por lo general e presentashonnan aki ta resaltá e promé dos artíkulonan den e revista. Pero tin biaha nan ta hala atenshon na otro artíkulonan ku hopi hende ta haña interesante. Nos por tin mihó resultado ku e presentashonnan sugerí aki ora nos ta bon konosí ku e artíkulo ku nan ta hala atenshon na dje i ta usa nos mes palabranan pa adaptá e presentashon na nos teritorio.
4 Ounke den Nos Ministerio di Reino tin dos presentashon pa kada revista, sinti bo liber pa usa un presentashon kompletamente diferente. Un motibu pa hasi esei por ta ku un di e otro artíkulonan lo atraé mas hende den bo teritorio. Òf kisas bo ta pensa ku lo bo por formulá un presentashon mas efikas ora bo usa un artíkulo ku abo ta haña mas interesante.
5 Kon pa Prepará Bo Presentashon: Promé ku tur kos, bo mester ta bon familiarisá ku e artíkulo ku bo a skohe pa presentá. Podisé no ta tur biaha bo ta logra familiarisá bo mes ku tur e artíkulonan den e revista promé ku bo kuminsá us’é den sirbishi di vèlt. Sin embargo, bo mester por reflehá entusiasmo i sinseridat relashoná ku e artíkulonan ku bo ta skohe pa presentá. Bo por hasi esei solamente si bo ta bon konosí ku e informashon ku bo ta presentá.
6 Despues, sea fleksibel ora bo ta skohe bo palabranan di introdukshon. Pa kuminsá un kòmbersashon, kisas bo por usa un pregunta al kaso ku ta lanta interes i ku ta relashoná ku e artíkulo. Semper dependé riba e Palabra di Dios pa alkansá kurason. (Heb. 4:12) Selektá un teksto apropiá ku tin di haber ku e tópiko ku bo ta introdusí, preferibel un teksto ku ta ser menshoná òf sitá den e artíkulo ku bo ta hala atenshon na dje. Pensa kon pa relashoná e teksto ku e artíkulo.
7 Na Tur Oportunidat: Pa un presentashon por ta realmente efikas, bo tin ku us’é. Partisipá djasabra huntu ku e kongregashon den e trabou di duna testimonio ku revista. Ofresé e revistanan na hende ku anteriormente a aseptá otro literatura. Semper ofresé revista na bo studiantenan di Beibel i na otro hende ku podisé ta presente ora bo ta hasi un rebishita. Kisas bo por laga revista serka hende ku bo ta papia kuné ora bo ta hasi kompra, ora bo ta biaha òf miéntras bo ta den sala di espera na dòkter. Mehorá bo presentashonnan segun ku bo ta usa nan durante luna.
8 E Toren di Vigilansia i ¡Despertad! ta revistanan úniko. Nan ta halsa Yehova komo e Soberano di universo. (Echo. 4:24) Nan ta konsolá hende ku e bon notisia di e Reino di Dios i ta animá nan pa ehersé fe den Hesukristu. (Mat. 24:14; Echo. 10:43) Ademas, nan ta sigui vigilá susesonan di mundu segun ku esakinan ta kumpli ku profesia bíbliko. (Mat. 25:13) Prepará pa bo por ofresé e revistanan aki na tur oportunidat apropiá ku presentá! Asina bo por yuda hende den bo teritorio benefisiá di e revistanan aki.
9 Ora bo laga un revista, òf asta ora bo tabatin solamente un kòmbersashon plasentero riba un tópiko religioso ku un persona, hasi un pregunta òf deklarashon—ku bo a prepará di antemano—ku por habri kaminda pa un rebishita i un siguiente kòmbersashon riba kos spiritual. Si nos ta plama e simianan di e bèrdat ku entusiasmo, nos por ta sigur ku Yehova lo habri kurason di hende ku sinseramente ta deseá di konos’é i sirbié.—1 Kor. 3:6.
[Study Questions]
1. Kiko ta e papel di E Toren di Vigilansia i ¡Despertad!?
2. Ki kambionan tabatin den E Toren di Vigilansia i den ¡Despertad!, i dikon?
3. Kon nos lo usa e revistanan den e ministerio?
4. Dikon lo por ta benefisioso pa usa otro presentashonnan aparte di esnan sugerí den Nos Ministerio di Reino?
5. Kiko bo tin ku hasi promé ku bo prepará un presentashon pa ofresé un revista?
6. Kon nos por prepará nos propio presentashonnan?
7. Kon nos por sigui mehorá nos presentashonnan?
8. Den ki maneranan E Toren di Vigilansia i ¡Despertad! ta úniko?
9. Kon nos por pone un base pa un rebishita?