Kaha di Pregunta

◼ Ta apropiá pa un Testigu di Yehova risibí tratamentu i kuido na un hospital òf kas di kuido ku ta ser manehá pa un organisashon religioso?

Vários organisashon religioso tin hospital i kas di kuido ku ta duna tratamentu médiko òf kuido pa un tempu. Por lo general, no a establesé e fasilidatnan ei pa promové interesnan di Babilonia e Grandi. (Rev. 18:2, 4) Podisé e organisashon religioso a establesé e fasilidat pa sirbi originalmente komo un fuente di entrada. Awendia, tin hospital ku ta e nòmber religioso so nan a keda kuné, siendo ku den kaso di otronan ainda tin miembronan di klero ta hasi vários di e trabounan.

Si un Testigu di Yehova tin ku bai hospital òf un kas di kuido, e mes tin ku tuma desishon si lo e bai un fasilidat ku por tin lasonan ku un organisashon religioso òf nò. Kisas e konsenshi di un ruman ta permitié bai, pero e konsenshi di un otro nò. (1 Tim. 1:5) Tin sierto sirkunstansia ku por influensiá un hende su desishon, i ta bon pa tene kuenta ku nan.

Por ehèmpel, un hospital òf kas di kuido ku ta karga un nòmber religioso kisas ta e úniko ku tin den e área ei. Òf si tin un otro fasilidat den bisindario, esun ku posibel konekshon religioso kisas ta duna mihó servisio. E hospital ei ku ta karga un nòmber religioso kisas ta e úniko ku ta ekipá pa duna sierto tratamentu, òf podisé e ta e úniko hospital ku bo dòkter òf siruhano ta traha kuné. Ademas, tin bes hospitalnan ku konekshon religioso ta respetá bo punto di bista komo kristian enkuanto uso di sanger, siendo ku tin otro hospital privá òf públiko ku no ta hasi esei. Pues esakinan ta algun di e faktornan ku lo bo tin ku tene kuenta kuné ora bo ta disidí kua fasilidat pa bai.

Si bo disidí di bai un hospital òf kas di kuido ku konekshonnan religioso, podisé bo ta konsiderá ku ta paga bo ta paga pa e servisio ku bo ta risibí. Kisas bo ta konsiderá ku e organisashon religioso tin un sierto negoshi, i kumprando un servisio for di e negoshi ei lo bo no ta hasiendo un kontribushon direkto ni boluntario pa sostené religion falsu. Simplemente lo bo ta pagando pa un produkto òf un servisio.

Klaru, komo un kristian bou di tal sirkunstansia definitivamente lo bo tin ku sòru pa no partisipá den ningun akto di adorashon falsu. Tampoko lo bo no usa títulonan religioso manera “Pastor” òf “Sùr,” pa hendenan ku kisas ta traha òf bishitá e fasilidat. (Mat. 23:9) Lo bo tin ku perkurá pa henter e asuntu ta estriktamente un asuntu di negoshi den kua bo ta risibí tratamentu i servisio, i nada otro.

Na momento ku bo wòrdu hospitalisá, bo por indiká ku bo ta un Testigu di Yehova i ku lo bo ke haña bishita di e ansianonan lokal. Di e manera aki lo bo hasi sigur ku bo ta risibí e debido sosten spiritual durante e periodo ku bo ta keda den hospital.—1 Tes. 5:14.

Miembronan di famia ku ta kreyente, ansianonan lokal i otronan den e kongregashon mester perkurá na un manera responsabel pa e nesesidat spiritual di kualke ruman di edat ku ta biba den un kas di kuido, spesialmente si ta trata di un lugá ku ta ser manehá dor di un organisashon religioso. Lo ta un gran animashon si nos ta diligente den e kaso aki. Ya ku asina nos lo evitá ku esnan di edat avansá ta haña nan pa ekibokashon enbolbí den sirbishi religioso, selebrashon òf otro aktividat similar ku ta ser tené den e fasilidatnan ei.

Ku e puntonan aki na mente, kada un di nos lo tin ku konsiderá e sirkunstansianan enbolbí i despues tuma un desishon enkuanto kua hospital òf kas di kuido nos lo bai.—Gal. 6:5.