Perseveransia Ta Nesesario pa Prediká
1 Pa mas ku 30 aña, apòstel Pablo a haña satisfakshon den su karera komo evangelisadó. Meskos ku ta e kaso di kualke aktividat ku ta bale la pena, el a hañ’é ku algun desafio den su aktividat di prediká. (2 Kor. 11:23-29) Pero tòg, Pablo no a stòp di prediká. (2 Kor. 4:1) E tabatin konfiansa ku Yehova lo dun’é e forsa nesesario pa perseverá den su ministerio. (Fil. 4:13, NW) Dor ku Pablo a perseverá fielmente, e por a bisa: “Sea imitadónan di mi, meskos ku ami tambe ta di Kristu.”—1 Kor. 11:1.
2 Perseverá bou di Prueba Awe: Tur dia, hopi di nos rumannan ta enfrentá mofa, oposishon òf indiferensia di parti di miembro di famia, kolega di trabou òf kompañero di skol. (Mat. 10:35; Juan 15:20) Podisé abo tambe ta eksperensiá e kosnan ei. Fuera di eseinan, kisas bo ta luchando ku problema ku salú òf por ta tur dia bo tin ku resistí distraishon i tentashon ku ta pone bo fe i perseveransia na prueba. Algu ku por fortalesé nos ta ora nos konsiderá loke a yuda sirbidónan fiel di pasado i tambe kristiannan djawe enfrentá i vense opstákulonan.—1 Ped. 5:9.
3 Nos por haña forsa pa keda firme den nos ministerio, si nos hasi sigur ku nos tin ‘e armadura kompletu di Dios bistí.’ (Efe. 6:10-13, 15) Ta esensial tambe pa nos pidi yudansa den orashon pa nos por perseverá. Dios ta duna nos su spiritu santu pa por perseverá bou di prueba. (2 Kor. 6:4-7) Pa nos por ta eksitoso den e bataya kontra Satanas i su mundu, nos mester hasi kaso di Dios su rekordatorionan pa fortalesé nos mes. (Sal. 119:24, 85-88) Meskos ku un yu kisas lo lesa un karta personal di un tata amoroso bes tras bes, nos rutina di lesa Beibel tur dia ta fortalesé nos relashon ku Yehova. Mediante nos estudio personal i regular nos ta haña sabiduria pa trata ku prueba, i asina nos ta laga Dios su pensamentu influensiá nos desishonnan i fortalesé nos pa mantené integridat.—Pro. 2:10, 11.
4 Perseveransia Ta Trese Bendishon: Meskos ku den kaso di Pablo, ora nos perseverá fielmente miéntras nos ta kumpli ku nos ministerio, nos ta alegrá Yehova su kurason i tantu nos komo otro hende lo haña bendishon. (Pro. 27:11) Laga nos ta desididu pa perseverá den e ministerio, i di e manera ei proba ku nos fe ta firme i “mas presioso ku oro ku ta peresé, ounke ku e ta wòrdu probá dor di kandela.”—1 Ped. 1:6, 7.