Kon pa Prepará pa e Reunion di Sirbishi
1. Kiko ta e propósito di e Reunion di Sirbishi, i kon nos por benefisiá mas di dje?
1 E Reunion di Sirbishi ta spesialmente prepará pa ekipá nos pa nos por haña bon resultado den sirbishi. E reunion akí ta enfoká riba e trabou di prediká e bon nobo di Reino, hasi disipel i deklará ehekushon di e huisio divino ku ta aserkando. (Mat. 28:19, 20; Mar. 13:10; 2 Ped. 3:7) Nos ta benefisiá mas di e reunion importante akí ora nos ta bon prepará i kla pa partisipá.
2. Kon nos por prepará nos mes pa skucha un diskurso?
2 Diskurso: Por lo general, bo por haña e informashon pa e diskurso den e instrukshonnan pa e oradó. Repasá e informashon akí, entre otro e tekstonan menshoná, i pensa kon bo por apliká e informashon den bo sirbishi.
3. Kon nos por prepará pa un parti di konsiderashon mediante pregunta i kontesta?
3 Konsiderashon Mediante Pregunta i Kontesta: Lo dirigí e parti akí manera e Estudio di Toren di Vigilansia, ku un introdukshon i konklushon breve. Suprayá e puntonan prinsipal den kada paragraf, i prepará pa duna komentario breve i al kaso.
4. Kon nos por prepará pa e parti di konsiderashon ku e presentenan?
4 Konsiderashon ku e Presentenan: Lo presentá e parti akí den forma di un diskurso, pero e oradó lo hasi algun pregunta pa e presentenan por duna komentario. Si bo suprayá e puntonan prinsipal i buska e tekstonan menshoná, lo bo por duna komentario ora e hasi pregunta. E ruman ku tin e parti akí lo hasi tur su esfuerso pa enbolbé e presentenan ora e ta kubri e puntonan prinsipal.
5. Kiko lo yuda nos benefisiá mas di e demostrashonnan?
5 Demostrashon: Algun parti lo inkluí demostrashon realístiko pa mustra kon lo por usa e informashon den teritorio. Por pidi un ansiano, un publikadó eksperensiá òf un pionero pa hasi e demostrashonnan. Bo por prepará e parti akí dor di antisipá kon lo present’é. Ora ta tene un demostrashon di e presentashonnan sugerí, pensa kon abo lo bis’é i kon bo por adapt’é na diferente doño di kas. Kòrda bin ku e publikashon òf revista ku lo ser usá den e demostrashon. Durante e anochi ku boso ta tene boso Adorashon Komo Famia, kisas lo ta benefisioso pa praktiká algun di e presentashonnan akí.
6. Kiko ta algun motibu pa prepará pa e Reunion di Sirbishi?
6 E Reunion di Sirbishi lo ta mas dushi ora nos ta bon prepará i ta antisipá loke lo ser presentá. Si nos sigui e sugerensianan akí, nos lo enkurashá otro mas tantu. (Rom. 1:11, 12) Si nos apartá tempu pa prepará p’e Reunion di Sirbishi, nos lo ta mihó ekipá pa kumpli ku nos sirbishi.—2 Tim. 3:17.