Duna di Bo Mes pa Yuda Bo Studiantenan

1. Kiko ta nesesario pa yuda un studiante di Beibel?

¹ Pa yuda un studiante di Beibel pa e por dediká su bida na Yehova, mas ta nesesario ku djis studia Beibel regularmente kuné. Apòstel Pablo a kompará e relashon ku e tabatin ku esnan ku e tabata siña ku e relashon ku un mènchi tin ku su yunan ku e ta kuida ku ternura. Nos tambe ta kontentu pa duna di “nos mes bida,” esta, nos tempu i esfuerso sinsero, pa yuda nos studiantenan krese spiritualmente.​—⁠1 Tes. 2:​7-⁠9.

2. Dikon nos mester mustra interes personal, i kon nos por hasi esei?

² Mustra Interes Personal: Segun ku un studiante di Beibel ta apliká loke e ta siña, su konsenshi lo konmové pa stòp di asosiá íntimamente ku esnan ku no ta biba na armonia ku prinsipio di Beibel. (1 Ped. 4:⁠4) Kisas su famia ta rechas’é. (Mat. 10:​34-⁠36) Nos por trata na yena e bashí ku e ta sinti dor di mustra interes personal profundo den dje. Un misionero eksperensiá ta rekomendá: “No bai mesora despues di estudio. Si ta apropiá, keda i kòmbersá un ratu.” Sea atento pa duna yudansa práktiko na bo studiante. Por ehèmpel, bo por yam’é na telefòn òf bishit’é ora e ta malu? Bo por sinta huntu ku bo studiante na reunion i yud’é ku su yunan, si esei ta apropiá?

3. Kon nos por yuda nos studiantenan haña animashon for di e kongregashon?

³ Yudansa di e Kongregashon: Si bo ta traha den sirbishi den bisindario di bo studiante, pakiko no bishit’é un ratu pa lag’é sera konosí ku bo kompañeronan di sirbishi? Si ta apropiá, de bes en kuando invitá otro publikadó, entre otro ansiano, pa kompañá bo na e estudio. Ademas, asina ku bo habri un estudio, animá bo studiante di Beibel pa asistí na e reunionnan na Salòn di Reino. Di e manera ei lo e por tin asosiashon edifikante ku miembronan di e kongregashon ku lo por bira su famia spiritual.​—⁠Mar. 10:​29, 30; Heb. 10:​24, 25.

4. Kon nos esfuerso por ser rekompensá?

⁴ Un mayor ku ta hasi esfuerso pa yuda su yunan spiritualmente ta sumamente kontentu ora su yunan skohe pa ta na Yehova su banda i kana den e bèrdat. (3 Juan 4) Nos por eksperensiá e mesun goso ora nos duna di nos mes pa yuda nos studiantenan di Beibel.