Sea un Bon Ayudante na Porta

1. Kiko ta e benefisio ora nos traha huntu ku un otro publikadó den sirbishi?

¹ Na un okashon, Hesus a manda 70 disipel bai prediká, i el a “manda nan dos-dos.” (Luk. 10:⁠1) Sin duda e areglo akí a duna su disipelnan oportunidat pa yuda i animá otro miéntras nan tabata prediká. Ora nos ta traha ku un otro publikadó den sirbishi, kon nos por kooperá kuné?

2. Ora nos kompañero di sirbishi ta duna su presentashon, kon nos mester skucha i dikon?

² Skucha Bon: Skucha atentamente ora bo kompañero di sirbishi ta duna su presentashon. (Sant. 1:⁠19) Si e lesa un teksto, sigui e lesamentu den bo Beibel. Wak esun ku ta papia, sea ku ta bo kompañero òf e doño di kas. Si bo skucha bon ora bo kompañero ta papia, esaki por pone ku e doño di kas ta hasi meskos.

3. Ki ora nos kompañero di sirbishi lo deseá pa nos papia?

³ Diserní Ki Ora pa Papia: Ora nos ta traha ku un publikadó ku ta dunando su presentashon, nos ta onr’é dor di lag’é papia. (Rom. 12:⁠10) Nos no ta interumpié. Si e lubidá loke ku e kier a bisa òf e doño di kas ta bini ku opheshon òf pregunta i nos kompañero di sirbishi ta pidi yudansa, nos ta hasi esfuerso pa sigui papia riba e mesun tópiko i nos no ta kambia e kòmbersashon. (Pro. 16:⁠23; Ekl. 3:​1, 7) Si nos papia, nos palabranan mester aportá algu na e testimonio ku ta ser duná.​—⁠1 Kor. 14:⁠8.

4. Kiko lo duna nos mas goso i éksito den sirbishi?

⁴ Ora e 70 disipelnan ku tabata traha dos-dos a kaba di prediká, nan “a bolbe ku goso.” (Luk. 10:⁠17) Nos tambe lo tin goso i éksito den sirbishi si nos skucha i diserní na ki momento nos tin ku yuda nos kompañero di sirbishi ora nos ta traha di kas pa kas.