Papia ku Konvikshon Ora Bo Ta Siña Hende

¹ Predikadónan efikas, manera apòstel Pablo, ta komprondé ku manehá “e palabra di bèrdat na un manera korekto” no ta enserá solamente sita tekstonan for di e Santu Skritura. (2 Tim. 2:⁠15) Ora nos ta usa e Palabra di Dios, kon nos por “konvensé” esnan ku nos ta siña?​—⁠Echo. 28:⁠23.

² Laga e Palabra di Dios Papia: Promé, dirigí hende su atenshon na Beibel di manera ku nan ta haña rèspèt pa e sabiduria ku e ta kontené. E konfiansa ku nos tin den e Palabra di Dios por motivá nos oyente pa presta bon atenshon ora nos lesa un teksto di Beibel. (Heb. 4:⁠12) Nos por djis bisa: “Mi a benefisiá ora mi a haña sa kiko Dios ta pensa di e asuntu akí. Wak kiko su Palabra ta bisa.” Si ta posibel, lesa tekstonan direktamente for di Beibel i laga e Palabra di Dios mes papia.

³ Di dos, splika e teksto bíbliko ku nos a lesa. Pa hopi hende ta difísil pa komprondé un teksto e promé biaha ku nan les’é. Hopi biaha ta nesesario pa splika ki konekshon e teksto tin ku e tópiko. (Luk. 24:​26, 27) Hala atenshon na e palabranan klave den e teksto ku ta proba e punto prinsipal ku bo ta tratando. Hasi pregunta pa bo haña sa si e persona a komprondé e punto bon.​—⁠Pro. 20:5; Echo. 8:⁠30.

⁴ Rasoná Riba Tekstonan: Di tres, trata na yega na mente i kurason. Yuda e doño di kas mira kon e versíkulo ta apliká na dje personalmente. Ora nos rasoná ku un hende riba e tekstonan, nos por konvens’é pa kambia su manera di pensa. (Echo. 17:​2-4; 19:⁠8) Por ehèmpel, despues di lesa Salmo 83:⁠18 na página 13 den e buki Beibel Ta Siña, nos por rasoná riba e importansia di sa un hende su nòmber si nos ke desaroyá un relashon personal kuné. Despues, kisas bo por puntra: “Bo ta kere ku si bo sa Dios su nòmber, esei lo por hasi bo orashonnan mas signifikativo?” Mustra e doño di kas ki relashon e teksto tin ku su bida i asina lo e por mira e balor práktiko. Ora nos ta siña hende e Palabra di Dios na un manera konvinsente, esei por yuda hende sinsero kuminsá adorá e Dios bibu i berdadero, Yehova.​—⁠Jer. 10:⁠10.

[Preguntanan di Estudio]

1. Kiko uso efikas di e Palabra di Dios den nos ministerio ta enserá hopi bes?

2. Kon nos por yuda hende haña mas rèspèt pa e Palabra di Dios?

3. Despues di lesa un teksto, kiko nos por hasi pa yuda nos oyente kapta e sentido di e teksto?

4. Kiko ta e di tres kos ku nos tin ku hasi pa konvensé hende ora nos ta siña nan?