Siña Publikadónan Nobo pa Prediká
1. Kon bo a sinti bo e promé biaha ku bo a sali den sirbishi?
1 Bo ta kòrda e promé biaha ku bo a prediká di kas pa kas? Probablemente bo tabata hopi nèrvioso. Si bo a traha ku esun ku a studia Beibel ku bo òf un otro publikadó, sin duda lo bo tabata kontentu ku e tabata huntu ku bo pa yuda bo. Awor ku bo tin eksperensia komo un predikadó, bo ta den un mihó posishon pa yuda esnan nobo pa prediká.
2. Kiko publikadónan nobo mester siña?
2 Publikadónan nobo mester siña kon pa kuminsá un kòmbersashon ku e doño di kas, kon pa usa Beibel di kas pa kas, kon pa hasi rebishita i kon pa kuminsá i kondusí estudio di Beibel. Tambe nan tin ku siña kon pa partisipá den e otro rasgonan di sirbishi manera, entre otro, prediká riba kaya i na lugánan di negoshi. Bo por yuda nan mehorá den e áreanan akí tantu mediante bo ehèmpel komo mediante bo sugerensianan.
3. Kon nos por yuda otronan mediante nos ehèmpel?
3 Siña Nan Mediante Bo Ehèmpel: Hesus a mustra su disipelnan kon pa prediká. (Luk. 8:1; 1 Ped. 2:21) Ora bo hasi afsprak pa traha ku un publikadó nobo, prepará un presentashon simpel ku e publikadó por imitá, kisas usando un presentashon ku tin den nos publikashonnan. Anto bis’é ku lo bo papia sea na e promé kas òf e promé dos kasnan pa e por mira bo presentashon. Ora boso ta kana bai na e siguiente kas, bo por puntra e publikadó si e ta haña ku bo presentashon tabata efektivo. Esaki lo yud’é mira e balor di traha ku otro publikadó den sirbishi i lo ta mas fásil p’e aseptá kualke sugerensia ku bo dun’é despues ku e kaba di hasi su presentashon.
4. Kon nos por yuda un publikadó nobo despues di skucha su presentashon?
4 Duna Sugerensia: Ademas, Hesus a duna su disipelnan instrukshon kon pa prediká. (Mat. 10:5-14) Bo por yuda un publikadó nobo na e mesun manera. Ora ta su turno pa papia, skucha bon. Despues ku boso bai for di e kas, dun’é elogio spesífiko i sinsero, asta si bo ta mira ku tin aspekto di su presentashon ku mester mehorá. Promé ku bo dun’é un sugerensia, kisas lo bo ke wak na e siguiente kas si el a mehorá den e aspekto ei. Por ta e tabata nèrvioso. Tene kuenta tambe ku no ta tur publikadó tin e mesun abilidat, i hopi biaha tin vários manera korekto pa hasi algu.—1 Kor. 12:4-7.
5. Kiko nos por bisa ora nos ta tuma inisiativa pa duna sugerensia?
5 Tin bes un publikadó nobo lo pidi bo sugerensia. Pero si e no hasié, tuma inisiativa pa yud’é. Kon bo por hasi esaki ku takto? Tin publikadó ku eksperensia simplemente ta puntra, “Mi tin mag di duna bo un sugerensia?” òf, “Kon bo ta haña ku bo presentashon a bai?” Un otro opshon ta, “Nobo nobo ku mi a kuminsá prediká, no tabata fásil pa . . . , pero loke a yuda mi ta . . . . ” Tin bes ta benefisioso pa boso dos wak kiko e buki Rasonamentu ta bisa. Pa bo no desanim’é, duna sugerensia riba un aspekto di su presentashon so.
6. Kon “heru ta mula heru” den sirbishi?
6 Heru Ta Mula Heru: Pablo a animá Timoteo, kende tabata un evangelisadó eksperensiá, pa sigui okupá su mes ku siñamentu i pa hasi progreso. (1 Tim. 4:13, 15) Pues, maske ta hopi tempu pasá bo a kuminsá prediká, semper bo mester sigui mehorá bo abilidatnan. Siña for di otro publikadónan ku bo ta prediká kuné, asta di esnan ku tin ménos eksperensia den sirbishi, i sea alerta pa yuda otronan bondadosamente, spesialmente publikadónan nobo, pa nan bira predikadónan ábil di e bon notisia.—Pro. 27:17.